Mulwol ni Ngan Thapeg ni Ngan Nang, February 2012

Pi Matanang ko re Tabinaw

Mu fil e re n’ey, ma rogon nib mangil, mag weliy ko boech e walagey nib ppin ni gabe guy. Mu murwel ko pi duwer ni nge ayuweg nem ni nge gel nag e pi walagem nib ppin man fal’eg fare Ulung ko ppin ko Galasia ni bang ko yafos rom.

Mich, Tabinaew, Ayuw

“Gur pi matanang ko re tabinaw,” ke yog President Gordon B. Hinckley (1910–2008) fini ke pii’ ngodad re babyor ni “Tabinaw: N’en Ni Ngan Noeg Ko Fayleng” u re ulung ko Relief Society ko 1995. “Gimed pi chitingin ko pi bitir. Gimed e gidii’ nibe chathowliy nagrad min tay nga lan gumircha’rad pi n’en ni ngan rin’ ko yafos rorad. Dariy reb e muruwel nibe yib nib chugur ko machalbog boed e muruwel ni ngan chathowliy pi bitir ku Got.”¹

Ba chugur ko 17 e duw ni re babyor ney ke gel nag e muruwel rodad ni th’abi ga’fan ni ngad gel nag pi gidii’ ko tabinaw—dem turug e gin’ rodad. Barbara Thompson, chiney e bin l’agruw e counselor ko Relief Society presidency, e bay u lane Salt lake Tabernacle napan ni President Hinckley e bi’eg ko somm’on fare n’en ni ngan noeg. “Rib falflan’ chirofen nem,” ke yoeg. “Kug thamiy nrib ga’fan re mulwol riy. Ma ku lemnag chirofen nem, ‘Rib mangil e pi thin ney ko pilabthir. Ma ku b’tuf bo’or e muruwel ko pilabthir.’ Kug lemnag ko somm’on ni dari ga’ fan rog ni bachan daworug mabgol ma dari’ e bitir rog. Machane rib papay ke yib re tafney ngog, ‘Machane ir e baga’fan ngog. Gag chongin e tabinaw. Gag e bitir, walagen, auntie, cousin, niece, ma ba’ e titaw nge tuwtuw rog. Ya ku ba’ e muruwel—nge pi tawa’ath—ni bachan gag bee’ ko reb e tabinaw. Ma ku bayay, f’anre kemus gag ko tabinaw rog, gag reb e chongin ko tabinaw rok Got, ma ka bay e muruwel rog nggu ayweg min gel nag yug boech e tabinaw.’”

Ma ku bayay, gathi kemus bagdad ni bay. “Re ayuw nib ga’,” be yoeg Sister Thompson, “ni bay rodad fini gadbe gel nag pi tabinaw rodad e ngan nang min lek pi machib ko Kristus min pagan’ gad ngak ni nge ayuwegdad.”²

Ke yib ko pi Chep nib Thothup

Proverbs 22:6; 1 Nephi 1:1; 2 Nephi 25:26; Alma 56:46–48; Doctrine and Covenants 93:40

Kakrom Rodad

“Fini Sister Bathsheba W. Smith ke muruwliy ko bin aningeg e general president ko Relief Society [ko 1901 mada ko 1910], ke guy nib ga’fan ni ngan gel nag pi tabinaw, me ere ke fal’eg pi lesson ni nge fil rogon palibthir ni fan ko pi sister u lane Relief Society. Pi machib ni bay e thin ko mabgol, bitir u yal, nge bitir ni kan gargel. Pi machib ney ke gel nag e thin ko President Joseph F. Smith marnga’agen e Relief Society nge uragon be ayuweg pi ppin u muruwel rorad ko tabinaw rorad:

“‘Fini dariy e lowan’ fa dariy e nang fan ko uragon ni ngan gagyeg nag e tabinaw, pi muruwel riy, nge pi micheg nge motochiyel ni bay uthilin pi pum’on nge ppin, nge thilin pilabthir nge bitir, ba aram me yaen re ulung ney fa ba chugur riy, ma dakaen re tawa’ath nge thin thothup ni bay ko re mo’lung nem, yad kan fal’eg rograd ma ku rayog ni ngar pi’ed e lowan’ nib fel’ rogon ko pi muruwel nem nib ga’fan.’”³

© 2011 ko Intellectual Reserve, Inc. Gubin ni mat’won ma bay. Nni yoloy u Mariken. Kan micheg nag ko thin nu Ngalis: 6/11. Micheg nag i pilyeg: 6/11. Ni Pilyeg ko Visiting Teaching Message, February 2012. Yapese. 10362 905

Mange Rayog Nggu Rin?

Uragon ni rayog ni nggu ayweg pi ppin ney ni gu matanang ni ngar gel nag pi tabinaw?
Uragon rayog ni nig ayuweg tabinaw rog nib fel rogon?