Ken Sommʼon e Babyor ku Nephi
Suwon nge muruwel rokʼ
Chipin Lehi nge ppin rokʼ ni Sariah, nge aningeg i pagael ni fak, ni kanoeg, (ni tabab ko bin ilal) Laman, Lemuel, Sam, nge Nephi ngoraed. Somoel e yoeg ku Lehi ni nge chuw u lan e nam nu Jerusalem, ni bachan e ke prophesy nag ko gidiiʼ morngaʼagen e pi denen roraed ma kuʼurgayed rogon ni ngar feked e pogofan rokʼ. Me fek chon e tabinaew rokʼ ngar milekag gaed ni dalip e rran nga wuruʼ e binaw. Nephi e fek walagen ngar suloed ko nam nu Jerusalem ni yaed be leak babyoren e Jews. Chipin e gafgow ni ur tayed. Rifeked e pi ppin ni fak Ishmael ngar leʼengiyed. Rifeked chon e tabinaew roraed nga ranoed nga wuruʼ e binaw. Pi gafgow nge pi kirbaenʼ roraed u wuruʼ e binaw. Woʼen e milekag roraed. Rabaed nga bangi day ni ba gaaʼ. Walagen Nephi e ur togopluw gow ngakʼ. Dakiyog ni ngar fulwegew lungun, ma aram me toey ba barkow. Mar tunguyed fithingan e ginnʼem ni Galwog. Mar thʼaebed bangi day nib gaaʼ nga barbaʼ ma ranoed ko fare nam nni michmicheg ngoraed nge ku boech banʼen. Ireray rogon fare chep ku Nephi; ara, gag, Nephi, e gu yoloey e pi babyor ney.
Guruy Ni 1
Nephi e tabab i ngongoliy babyoren e gidiiʼ rokʼ—Lehi e guy u malikʼay baelʼ i nifiy ni yib u lang nga butʼ me biʼeg bake babyor ni bay e prophecy riy—I pining e magaer ku Got, me yoeg ni bay yib fare Messiah, me prophesy nag e mogothgoth ni bayi aw nga Jerusalem—I gafgow nga paʼ e pi Jews. Napʼan 600 e duw nga mʼon ku Kristus (M.K.).
1 I gag, Nephi, e gargelegeg e gallabthir rog ni yow ba gol, ere ni fil ngog urngin mit e llowaenʼ ko chitamag; ma bayoʼor e kirbaenʼ ni kug guy u lan e pi rran rog, aram rogon machane, ri gub tʼuf rokʼ Somoel u langgin urngin e pi rran rog; arragon, ni bachan e ke tamilang anʼug u rogon falʼngin nge tin riyulʼ rokʼ Got nib miith, ere arfan ni nggu ngongoliy babyoren e pinʼen ni i buch rog u lan e pi rran rog.
2 Arragon, nggu ngongoliy bbabyor u rogon e thin ko chitamag, ni llowaenʼ ko Jews nge thin ko pi gidiiʼ nu Egypt.
3 Ma gumnang ni pi babyor ney ni gube ngongoliy e ba riyulʼ; ma gube ngongoliy nga paʼag; ma gube ngongoliy u rogon e pi llowaenʼ ni gumnang.
4 Me yibi buch ni bin sommʼon e duw ni ke suwey Zedekiah, ni pilung nu Judah, (ma chitamag, i Lehi, ni urngin e pi rran rokʼ ni ke paer riy u Jerusalem); ma ku lan e re duw nem me yib e profet nib yoʼor, ni yaed be prophesy nag ko gidiiʼ ni thingar ra kalgaed ngaenʼraed, fa dangay ma fare binaw nib gaaʼ nu Jerusalem e thingar ni gatheay.
5 Ere me yibi buch ni chitamag i, Lehi, e napʼan ni meybil ngakʼ Somoel, arragon, u poloʼ i gumʼirchaʼen, niffan ko gidiiʼ rokʼ.
6 Me yibi buch u napʼan ni meybil ngakʼ Somoel, me yib baelʼ i nifiy u lang nga butʼ nge yibi aw nga dakean bangi war u pʼoewchen nga mʼon, ma bayoʼor banʼen ni guy nge tin ni rungʼag, ma bachan e pinʼen ni guy nge tin ni rungʼag me tʼon ma be rur nib gel.
7 Me yibi buch ni sul nga tafen u Jerusalem; me yaeni pag ir nga dakean e bet rokʼ, ni bachan e ke sug ko fare Kan ni Thothup nge pinʼen ni ke guy.
8 Ma aram rogon ni ke sug ko fare Kan ni Thothup, min fek nga palog u malikʼay, me guy ni ke mab e tharmiy me mudugil u waenʼ ni ke guy Got ni be paer u gilʼilungun, ni ke liyeg yu ulung i angel nib yoʼor u yalen e mathaʼeg ni yaed be tang ma yaed be oge magaer ko Got roraed.
9 Me yibi buch ni guy Beeʼ ni ke yib u lukngun e tharmiy nga butʼ, me guy nib gaelgael raʼen ko yalʼ ni misiwʼ.
10 Ma ki guy ragag nge lʼagruw niiʼ ni yaed be leak, ni kub gaelgael rameʼeraed ko tʼuf u lan e lang.
11 Mi yaed yib nga butʼ nga ranoed u dakean e fayleng; me yib fachaʼ niʼir e mʼon nge yibi sakʼiy nga pʼoewchen e chitamag, me piiʼ bake babyor ngakʼ me yoeg ngakʼ ni thingari biʼeg.
12 Me yibi buch u napʼan ni be biʼeg, me yib fare Kan ni Thothup rokʼ Somoel nga dakean.
13 Me biʼeg, ni gaʼar: Gafgow, nri gafgow e bayi aw nga Jerusalem, ni bachan e kug guy e pi ngongol romed nib kireb! Arragon, ma rib yoʼor banʼen ni biʼeg e chitamag ni morngaʼagen yu Jerusalem—ni thingar ni gatheay, nge pi gidiiʼ ni yaed ma paer u rom; boʼor i yaed e yira liiʼ ko sayden, ma ku boʼor i yaed e bay ni fekraed ni kalbus nga Babylon.
14 Me yibi buch u napʼan ni ke biʼeg make guy e chitamag boʼor banʼen ni rib mangil mab maʼangʼang, me non nib yoʼor banʼen ni yoeg ngakʼ Somoel nib gaaʼ laman; ni boed ni gaʼar: Rib mangil mab maʼangʼang e pi muruwel rom, O Somoel ni Got ni Gubin ma Rayog Rokʼ! Gilʼilingum e bay u tharmiy nib tolang, nge gelingim, nge falʼngim, nge murnguy rom e ke langob nga dakean e pi gidiiʼ nu fayleng; ma bachan e gur e gab sug ko murnguy, ere dab mu pag e piʼin ni yaedra yib ngom ngar mʼaed!
15 Ere aray rogon ni pining e chitamag e soerokʼ ngakʼ e Got rokʼ; ya kari falfalaenʼ e yaʼel rokʼ, nge gumʼirchaʼen ni sug ko falfalaenʼ, ni bachan e pinʼen ni ke guy, arragon, pinʼen ni ke dag Somoel ngakʼ.
16 Me ere chiney e gag, Nephi, e dagur yoloey gubin babyoren e pinʼen ni yoloey e chitamag, ya boʼor bogi banʼen ni yoloey ko pinʼen ni guy u malikʼay nge tin ni i likʼay nag; nge ku boʼor boech banʼen ni yoloey ni i prophesy nag me weliy ko bitir rokʼ, ni ireram e pinʼen dab gu yoloey babyoren.
17 Machane gura yoloey chipin e pinʼen ni i buch rog u lan e pi rran rog. Ere, nggu ngochngoch nag i ngongoliy chipin e chitamag, nga dakean e pi yuyang i plate ney ni kug ngongoliy nga paʼag; ma tomuren ni kug muʼ i ngochngoch nag chipin e chitamag ma arame bay fin gu ngongoliy babyoren e birog e yafos.
18 Ere gubaʼadag ni ngam nanged, ni tomuren ni ke dag Somoel bogi banʼen ni boʼor nib mangil ngakʼ e chitamag i, Lehi, arragon, ni morngaʼagen e mogothgoth ni bayi aw nga Jerusalem, ye iyaen nga fithikʼ e gidiiʼ nu rom, me tabab i prophesy nag ma be tamilngeg ngoraed morngaʼagen e pinʼen ni ke guy make rungʼag.
19 Ma aram me paer e pi Jews nga ur moning gaed ngakʼ ni bachan e pinʼen ni ke weliy ni be micheg u morngaʼagraed; ya i weliy ni be micheg morngaʼagen e pi denen roraed ni ubchiyaʼ nge pi ngongolen e fananikan roraed; maki weliy ni be micheg ni pinʼen ni ke guy maki rungʼag, nge pinʼen ni biʼeg u lan e fare ke babyor, e be dag nibe gagyel nag e wub rokʼ ba Messiah, nge fare woʼen e bayul ko fayleng.
20 Ma napʼan ni rungʼag fapi Jews e pinnʼey mar damomuw gaed ngakʼ; arragon, ni ku boed rogon ko pi profet ni kakrom, ni ur yinʼed raed nga wean, ma ur malang niged raed, mar liiʼed raed ngar mʼaed; ma kur lemniged ni ngar feked e yafos rokʼ, nge chuw. Machane musap gaed, gag, Nephi, e nggu micheg ngomed ni wurngaenʼ rokʼ Somoel e ke longob nga dakean gubin e piʼin ni ke melʼegraed, ni bachan e mich roraed, me piiʼ gelingraed ni ngar chuw gaed u paʼ e pi toʼogor roraed.