Imaron̄ ke Peptaij Barāinwōt?
Im ajri ro nejier raikuj in peptaij n̄an jeorļo̧k jerawiwi ko aer n̄e eralitōk aer iiō (lale D&C 68:27).
“Nuno im Miriam, komiro naaj ke ļoor waanjon̄ak eo an Jisōs Kraist im peptaij ilo Jādede in tok?” Sister Silva eaar kajjitōk.
Paulo eaar jab tōmak kōn lo̧jiln̄i. Sister mijenede ro raar kūr būratōr im sister ro an 10 aer iiō n̄an peptaij!
“Aaet! Aaet!” Po ro raar ba ilo aer m̧ōņōņō.
Miriam eaar jab bōjrak an ettōn̄ dikdik. Nuno eaar leļo̧k kam̧m̧oolol n̄an Sister Lopes. Bubu eaar ettōn̄ dikdik jān jea eo an ekilep ebūrōrō ilo kona eo.
Ium̧win jejjo wiik ko sister mijenede ro raar katakin Paulo im ro jein im jatin ilo m̧weo im̧ōn jibweer ilo juon āne ilo Sao Miguel eo emaroro, im em̧ōļoļo–1,000 m̧aiļ (1,600 km) ettoļo̧k jān ioon āne Portugal. Paulo eaar iakwe kōpeļļo̧k m̧ōttan eo ilōn̄ in kōjām eo im̧aan an Jibwin im en̄jake aim̧ōlo̧lo̧ in lojet ilo an kar lale an Sister Lopes im Sister Silva itok ilo iaļ eo tok n̄an katakin kōn ko̧jpeļ eo
Sister mijenede ro raar ba rainin enaaj juon katak ejeno̧lo̧k. Kiiō Paulo eaar jeļā etke. Nuno im Miriam renaaj etal in peptaij, āinwōt an kar Jisōs kwaļo̧k! Paulo eaar barāinwōt kōņaan ļoor waanjon̄ak eo an Rilo̧mo̧o̧r.
“Sister ran, Imaron̄ ke peptaij barāinwōt Jādede in tok?” eaar itok limo ilo an kar kajjitōk, kepaaktok Bok in Mormon eo n̄an ippān.
Sister Silva eaar ettōn̄ dikdik ak eaar kōjōboulul bōran. “Joļo̧k bōd, Paulo. Irooj eaar jiron̄ kōj bwe jej aikuj aolep peptaij ak ālkin ad ralitōk iiō dettad. Kōnke kwoj jiljino wōt, kojjab jeļā nana im em̧m̧an n̄an kālōt ko am̧.”
“Ak, sister ran,” Paulo eaar jum̧ae, “Iaar jar im riiti Bok in Mormon ippān baam̧le eo aō, āinwōt am̧ kar katakin eō. Ij etal n̄an Būraimere kajjojo wiik ippān Bubu im Ulepa Mário. Ijeļā Kabun̄ in ej m̧ool! Imaron̄ ke peptaij ippān Nuno im Miriam?”
“Em̧ōj am̧ kōm̧m̧ane juon jerbal ilo mour kōn kien ko im katak kōn ko̧jpeļ eo,” Sister Lopes eaar ba. “Ak kwoj aikuj in bar kōttar ruo iiō m̧okta jen am̧ maron̄ in peptaij.”
Kabin būruwōn Paulo eaar jino in bwil, im bwil in dān kōmjaļaaļ eaar kobrak māj ko mājen. Eaar kelōn̄ kelaļ im ettōr n̄an ruum̧ eo an itulōn̄, ijo eaar kiki ippān ro jein im jatin.
Ālkin an jan̄ ilo pet eo piten ium̧win jet minit, Paulo eaar ron̄ an juon tallōn̄ ilo jikin iwe eo. Ulepa Mário eaar jijet ioon kein kiki eo an Paulo.
“Paulo, eita?” Ulepa Mário eaar kajjitōk,
“Sister Silva im Sister Lopes raar ba Ijjab maron̄ in peptaij, ak Nuno im Miriam remaron̄,” Paulo eaar ba. “Ikōņaan juon membōr in Kabun̄ in! Ij iakwe al al ko ilo kweilo̧k in kwojkwoj eo im katak kōn jeje ko rekwojarjar ilo Būraimere. Ijjab kōņaan make iaaō.”
“Paulo, komaron̄ in m̧ōttan wōt Kabun̄ in, men̄e kwoj dik wōt n̄an peptaij,” Ulepa Mário eaar ba ilo ettā.
“Ekōjkan?” Paulo eaar bōk kūtwōn n̄an pet eo an.
“Ekwe, kwojeļā ke bwe Būraimere ej kōpooj juon būrookraam̧ in kweilo̧k in kwojkwoj eo,” Ulepa Mário eaar ba. “Rūkaki in Būraimere eo am eaar jiron̄ eō bwe ej pukōt ro rekōņaan kwaļo̧k aer naan in kam̧ool ilo būrookram̧ eo. En̄in ej juon wāween eo komaron̄ in bōk kuņaam̧ ilo m̧ōn jar eo,” Ulepa Mário eaar kōm̧eleļeiki.
“M̧ool ke?” Paulo eaar jijet im jelm̧ae eo ulepen. Eaar ļōmņak ium̧win juon minit. “Bōlen Imaron̄ barāinwōt kwaļo̧k aō naan in kam̧ool ilo peptaij eo an Nuno im Miriam!”
“Ej juon ļōmņak em̧m̧an!” Ulepa Mário eaar ba. “Men̄e kwoj dik wōt n̄an peptaij, kwoj maron̄ in wōr wōt am̧ naan in kam̧ool.”
Paulo eaar kelo̧k jān jikin kiki eo an im ekairiir laļ ļo̧k ilo jikin iuwe ko.
“Kwoj etal n̄an ia, Paulo?” Ulepa Mário eaar kajjitōk,
“Ij etal in kakilōklōk kilen kwaļo̧k naan in kam̧ool eo aō n̄an mijenede ro!” Paulo eaar ikkūr ļo̧k kōn m̧ōņōņō. “Inaaj kwaļo̧k e ilo aō kōttar n̄an peptaij!”
Pija ko jen Jared Beckstrand