Enaan eo an Būreejtōnji eo Kein Kajuon
Juon Kii n̄an juon Baam̧le Em̧ōņōņō
Rijeje in Russia eo eļap Leo Tolstoy eaar jino bok eo an Anna Karenina kōn naan kein: “Baam̧le ko rem̧ōņōņō rej aolep āinjuon jen doon; aolep baam̧le rejjab m̧ōņōņō ilo jekjek eo aer make.”1 Tōre in me ejjeļo̧k ippa kam̧ool eo an Tolstoy bwe baam̧le ko rej aolep āinjuon jen doon, em̧ōj aō lo juon men eo bwe aolepāer rej juon wōt juon wūn: ewōr ippāer juon wāween jeorļo̧k bōd im meļo̧kļo̧k jab wānōk ko an ro jet im kalimjōk wōt men eo em̧m̧an.
Ro ilo baam̧le ko rejjab m̧ōņōņō, ilo bar juon wāween, ekkā aer lo bōd, dāpij illu ko, im epen aer maron̄ joļo̧k kar en̄jake ko renana m̧okta.
“Aaet, ak …” jino ippān jabdewōt ro rejjab m̧ōņōņō. “Aaet, ak kwojab jeļā ewi jon̄an an kar kōmtak eō,” juon ej ba. “Aaet, ak kwojab jeļā ewi jon̄an an nana,” bar juon ej ba.
Bōlen erro jim̧or rejim̧we; bōlen ejjeļo̧k iaer.
Ebooļ jekjek ko kōn ellotaan. Ebooļ jekjek ko kōn kōmetak. Ak ta eo Iaar kile ej bwe emakijkij in ad kwaļo̧k ad illu im jubōro kōn en̄jake ko ad jen ad kwaļo̧k bwebwenato ko ad make kōn wūn ko an ro jet me rej liaakeļo̧k m̧akūtkūt ko aer āinwōt juon en̄jake im ļōmņak eban jako ilo, ejja iien in wōt, kotak liaakeļo̧k ko ad make āinwōt ko rerreo im ejjeļo̧k ruweir.
Kidu eo Nejin Irooj eo
Ewōr juon bwebwenato in Welsh jān kein 13 epepen eo ej kōn juon irooj eo eaar jepļaak n̄an m̧weo im lo kidu eo nejin ej ebūtbūt bōtōktōk laļļo̧k jān imejān. Em̧m̧aan eo eaar bwijakorkorļo̧k n̄an lowaan m̧weo im, ilo an kor, kar lo bwe ļaddik eo nejin edik eaar jako im peet eo an eaar okjak. Ilo illu irooj eo eaar kanōk namōjtak jāje eo an im man kidu eo nejin. Jidik iien tokālik, eaar ron̄ ainikien jan̄ an ļaddik eo nejin—nin̄nin̄ eo eaar mour! Iturin nin̄nin̄ eo ej babu juon olip emej. Kidu eo eaar, ilo m̧ool, jojomar e nin̄nin̄ eo nejin irooj eo jān juon olip elāj.
Men̄e bwebwenato in ej kaitoktoklimo, ej kōmeļeļeik juon meļeļe. Ej kōpeļļo̧k ļōmņak eo me bwebwenato eo jej jiron̄ n̄an kōj make etke ro jet rej m̧akūkūt ilo juon wāween ejjab aolep iien errā ippān m̧ool ko—jet iien jejjab kōņaan jeļā m̧ool ko. Em̧m̧anļo̧k n̄e jej en̄jake m̧ool eo ad ilo ad illu jen dāpdep wōt ilo ad kōmōn̄ im ellotaan. Jet iien ņota kein remaron̄ pād wōt ium̧win allōn̄ ak iiō ko. Jet iien remaron̄ pād wōt toon wōt ad mour.
Juon Baam̧le Eaar Jepelļo̧k
Juon baba eaar jab maron̄ jeorļo̧k an ļaddik eo nejin bōd kōn an kar em̧m̧akūt jān iaļ eo eaar ekkatak ie. Ļaddik eo eaar wōr ro m̧ōttan ro jemen eaar jab kōmālimi, im eaar kōm̧m̧an elōn̄ men ko reoktak n̄an ta eo jemen eaar ļōmņak ej aikuj kar kōm̧m̧ani. Menin eaar kōm̧m̧ane juon jeppelļo̧k ikōtaan jemen im ļaddik eo nejin, im ke ļaddik eo eaar maron̄, eaar em̧m̧akūt jān m̧weo im jab bar ro̧o̧l. Eaar jab emakijkij aer bar kōnono ippān doon.
Jemen ej ke jim̧we an en̄jake? Bōlen.
Ļaddik eo ej ke jim̧we an en̄jake? Bōlen.
Men eo Ijeļā in ej bwe baam̧le in eaar jepelļo̧k im jab m̧ōņōņō kōnke ejjeļo̧k juon iaero jemen ak ļaddik eo nejin raar jab maron̄ joļo̧k an doon bōd. Raar jab maron̄ relikļo̧k n̄an ememļo̧kjeņ ko renana aer n̄an doon. Raar kobrak buruwer kōn illu ijjelo̧kin kōn iakwe im jeorļo̧k bōd. Kajjojo iaer raar ko̧o̧te an doon iien em̧m̧an n̄an kareel an doon mour n̄an em̧m̧anļo̧k eo. Jepelļo̧k eo ikōtaer eaar kanooj mwilaļ im dōbakbak jon̄an kajjojo raar erom juon rikalbuuj ilo jetōb ioon āne eo ānen make.
Ilo m̧ool, Jemād Indeeo ilo Lan̄ eo eakwe im māletlet eaar kōpooj wāween ko n̄an eļļā ioon utiej bōro in ejjeļo̧k tokjān. Pinmuur eo eļap im ejjeļo̧k jemļo̧kin ej m̧akūtkūt eo eutiej an jeorļo̧k bōd im kajim̧we bōd. Ļap eo an eļapļo̧k jān meļeļe eo aō, ak Ij kam̧ool kōn aolepān buruwō im aolepān aō kōn m̧ool eo an im kajoor eo eļap. Rilo̧mo̧o̧r eo eaar leļo̧k E make āinwōt wōņāān jerawiwi ko ad. Jen E jej bōk jeorļo̧k bōd.
Ejjeļo̧k Baam̧le Ej Weepān
Ejjeļo̧k iaad ejjeļo̧k an jerawiwi. Kōj aolep rej kōm̧m̧an bōd, ekoba kwe im n̄a. Kōj aolep kar ikkinejnej. Kōj aolep kar kakkinejnej ro jet.
En̄in ej jen katok eo an Rilo̧mo̧o̧r eo ad jemaron̄ mour ippān Anij im mour indeeo. Ilo ad errā ilo iaļ ko An im eļļā ioon ad utiej bōro jen kapidodoik buruwōd, jemaron̄ bōktok kajim̧we bōd im jeorļo̧k bōd n̄an baam̧le ko ad im mour ko ad make. Anij enaaj jipan̄ kōj kōļapļo̧k jeorļo̧k bōd, kōļapļo̧k m̧ōņōņō in ilo̧k ippān ruo m̧aiļ, kein kajuon joļo̧k ruōm̧ men̄e jet men eaar jab ad bōd, door itulik ņota ko im jab bar kōļapļo̧ki. Kam̧oolol n̄an Anij, eo eaar letok Nejin Emake Wōt Jitōn Bōro, eo eaar leļo̧k mour eo An kōn kōj.
Jemaron̄ en̄jake iakwe eo an Anij n̄an kōj aolep raan. Jej aikuj ke leļo̧k eļapļo̧k jidik kōj make n̄an ro rūtrir āinwōt an katakin ilo al in ejitōn bōro “Because I Have Been Given Much”?2 Irooj em̧ōj an kōppeļļo̧k kōjem eo n̄an kōj n̄an ad jeorļo̧k bōd. Enaaj ke jim̧we wōt n̄an door itulik ad make ļōmņak kōn kōj make im utiej bōro im jino kōppeļļo̧k kōjem in kōjeram̧m̧an eo an jeorļo̧k bōd n̄an jabdewōt ro epen ad jeorļo̧k aer bōd—eļaptata n̄an aolep ro ilo baam̧le eo ad make?
Ilo jem̧ļo̧kin, lem̧ōņōņō ejjab m̧ōkaj an itok jān wāppen ak jen kōjerbal pedped ko rekwojarjar, aaet ilo bun̄tōn ko reddik. Būreejtōnji eo Kein Kajuon im Doulul eo an Jon̄oulruo Rijilōk ro raar kwaļo̧k: “Lem̧ōņōņō ilo mour in baam̧le ej waļo̧k tōprak n̄e raar ijjino ioon pedped ko an Irooj Jisōs Kraist. M̧are ko repen aer rub im baam̧le ko rej ejaak wōt ioon pedped ko an tōmak, jar, ukweļo̧k, jeorļo̧k bōd, kautiej, io̧kwe, jeļā ņae doon, jerbal, im m̧akūtkūt ko rem̧m̧an n̄an kōkm̧anm̧anļo̧k doon.”3
Jeorļo̧k bōd ej pād jim̧we ilo likwōļepen m̧ool kein raorōk, kar ijjino ioon karōk in m̧ōņōņō eo an Jemedwōj Ilan̄. Kōnke jeorļo̧k bōd ej kobaik pedped ko, ej kobaik armej. Ej juon kii, ej kōppeļļo̧k kōjām ko reļak, ej jinoin juon iaļ em̧ool, im ej juon ian kōjatdikdik ko ad rem̧m̧antata n̄an juon baam̧le em̧ōņōņō.
Anij en jipan̄ kōj bwe en ļapļo̧k jidik ad jeorļo̧k bōd ilo baam̧le ko ad, ļapļo̧k ad jeorļo̧k an doon bōd, im bōlen ļapļo̧k ad jeorļo̧k ad make bōd. Ij jar bwe jen maron̄ en̄jake jeorļo̧k bōd ilo juon wāween em̧m̧an me enan̄in aolep baam̧le ko rem̧ōņōņō rej eier wōt juon.
Katakin jān Ennaan In
“Ilo am̧ kōpooj kajjojo katak, kajjitōk ippam̧ make ekōjkan an pedped eo āinwōt juon men ro uwaan baam̧le eo kar en̄jake ilo mour ko aer make” (Teaching, No Greater Call [1999], 171). Ļōmņak n̄an karuwaineneik ro uwaan baam̧le eo n̄an kwaļo̧k en̄jake eo aer em̧m̧an ak ilo aer kautiej jeorļo̧k bōd. Ekkōnono kōn en̄jake kein, kōmejajaik kōjeram̧m̧an ko an jeorļo̧k bōd. Kōjemļo̧ke kōn kwaļo̧k naan in kam̧ool eo kōn aorōk eo an jeorļo̧k an doon bōd.
Pija eo jen David Stoker