Kar kōkajoorļo̧k jen Naan eo
Pija ko jen Josué A. Pena im Gloria Hiatt
Jodikdik ro rej kam̧ool kōn iien ko ilo an jeje ko katakin er, kaenōm̧m̧an er, im kar tōl er.
Kōm ar kajjitōk ippān jodikdik ro n̄an jiron̄ kōm kōn juon iien me raar kakilōklōk juon eoon eaar jipan̄ er, āinwōt Elder Richard G. Scott jen Doulul eo an Jon̄oulruo Rijilōk ro kar kōnono kake ilo Oktoba 2011 kweilo̧k eo eļap (lale turājet). Errein rej jet iaan uwaak ko aer.
Aenōm̧m̧an n̄an Eō
Anij eaar kalim̧m̧ur e kōn aenōm̧m̧an ilo jetōb eo an im kar jiron̄ e bwe apan̄ im kaen̄taanan ko an renaaj an jidik wōt iien (lale D&C 121:7).
Eoon eo me ekkā an letok n̄an eō aenōm̧m̧an ilo iiō ko ej Doctrine and Covenants 121:7, ke Rikanaan Joseph Smith eaar pād ilo Jikin Kalibuuj eo ilo Liberty eaar kūr n̄an Jemedwōj Ilan̄ kōn jipan̄. Iaar kakkilōklōk eoon in ilo jemenere im bar kememej e n̄e Ij aikuj kaenōm̧m̧an. Ej kakememej eō bwe Jema ilo Lan̄ ej iakwe eō im ejeļā kōn apan̄ ko aō. Iaar kōjerbal eoon in n̄an bōktok n̄an eō aenōm̧m̧an ilo tōre in inepata im m̧ōjņo ko.
Eoon in eaar jipan̄ eō ke Iaar pād ilo juon bade me eaar oktak n̄an juon mejatoto eo iaar jeļā ijjab aikuj in kar pād ie. Iaar meanwōd n̄an jiron̄ ro m̧ōtta jaab ilo aer kajjitōk bwe in idaak dānin kadōk ak kōbaatat. Eoon in eaar letok n̄an eō kajoor eo Iaar aikuji n̄an jutak kōn tōmak ko aō.
Eoon in eaar barāinwōt jipan̄ eō kōm̧m̧ani kālōt ko reppen. Ro m̧ōtta im N̄a kōm ar jepeļo̧k jen doon enan̄in ļalem iiō ko. Kōm ar ikkure ippān doon, jam̧bo ippān doon, iaio ippān doon kajjojo wiik. Ak eaar jino iaio ippān ro kar m̧ōttan ro me Iaar jab kōņaan in pād ipeļaakier. Ilo jem̧ļo̧kin eaar kōm̧m̧an bwe in kālōt kōtaan e āinwōt juon m̧ōtta ak dāpdāp n̄an tōmak ko aō kōn Naan in Mālōtlōt im kien erreo. Iaar ilbōk. Ikar jab jeļā n̄an jutak kōn ta eo Iaar jeļā emaron̄ in kar pen. Ak Iaar kajjieon̄ in m̧ōttāik ro m̧ōtta rekāāl, aolep iien ļōmņak kōn kallim̧ur eo an Jemedwōj Ilan̄ n̄an Joseph Smith ke aolep men renaaj em̧m̧an.
Ejjeļo̧k juon men keidi eaorōkļo̧k kōn tōmak eo aō, im Iaar en̄jake m̧ool eo im lan̄lōn̄ eo ejjeļo̧k jem̧ļo̧kin kōn kālōt eo ejim̧we Iaar kālōt e. Eoon in eaar kōkajoor naan in kam̧ool eo aō im kar letok jipan̄ eo Iaar aikuji.
Lauren J. 16 iiō, Arkansas, USA
M̧ōjņo̧ ko Rej Erom Kajoor
Allōn̄ ko m̧okta jen teej in kaddeļo̧n̄ eo n̄an high school, Iaar jab en̄jake aō pojak. Iaar lukkuun jeļā bwe enaaj kar pen n̄an jejjet kōm̧m̧ane. Kōn menin Iaar kūr n̄an Jemedwōj Ilan̄ ilo jar. Ke Iaar jar, naan kein raar itok n̄an ļōmņak eo aō. “Eļan̄n̄e armej rej itok n̄an Eō Inaaj kwaļo̧k n̄an er aer m̧ōjņo̧. Ij leļo̧k n̄an armej m̧ōjņo̧ bwe ren maron̄ ettā bōro; im Aō jouj ebwe n̄an aolep armej ro rej kōttāik er Im̧āō; bwe eļan̄n̄e rej kōttāik er Im̧aō, im wōr aer tōmak ilo N̄a, innām Inaaj kōm̧m̧an mennin m̧ōjņo̧ ko ren erom kajoor n̄an er” (Ether 12:27).
Iaar kile bwe n̄e Ij jar n̄an Jemedwōj Ilan̄ kōn kajoor n̄an jelm̧ae apan̄ ko im teej ko, Ej kōjeram̧m̧an eō im jipan̄ eō anjo ioon m̧ōjņo̧ ko aō. Kwaļo̧k n̄ūrbōktak eo aō n̄an Irooj eaar juon jokālōt eo em̧m̧an tata imaron̄ kar kōm̧m̧ane. E ej rūkaki eo em̧m̧antata, im Ijeļā E eaar jipan̄ eō.
Irvin O. 16 iiō, El Salvador
Jar Aolep iien
Jar iien otemjej bwe jān anjo ioon rikapo eo—bwe jān maron̄ anjo ioon Setan im deeor jān pein rijerbal ro an Setan (lale D&C 10:5).
Eoon in eaar jipan̄ eō jelm̧ae kapo ko. N̄e Ij tin kōm̧m̧ani men ko Ijeļā ke rebōd, eoon in im ennaan eo an ej waļo̧k tok ilo ļōmņak eo aō. Kajjojo iien Ij jar ālkin aō bōk im̧we eo, Ij bōk jipan̄ eo me ij aikuji n̄an anjo ioon kapo ko ij jelm̧ai.
Jesse F. 17 iiō, Utah, USA
Ij Pād Ippān
Kwon kijenmej ilo en̄taan ko, bwe jenaaj bōk elōn̄. Jej aikuj niknik kaki, bwe Irooj ej pād ippād, aaet m̧ae jem̧ļo̧kin raan ko ad (lale D&C 24:8).
Kakkilōklōk e eoon in eaar juon kōjeram̧m̧an, eļaptata n̄e Ij en̄jake mijak ak make iaō. Jabdewōt iien ij kememej e, Ij bōk peran im en̄jake em̧m̧anļo̧k. Āinwōt likao ro im jiron̄ ro, jej aikuj tōl im rie, eļaptata n̄e jej ioon apan̄ im idajon̄jon̄ ko reppen. Men̄e jet iien ilju im jekļaj eo ejjab lukkuun in alikar ak kabwereer, Ijeļā bwe Imaron̄ lōke ilo Irooj im bōk An jipan̄.
Ke Iaar dik, kar katakin eō ilo m̧weo im ilo Būraimere bwe Irooj enaaj aolep iien pād iturājet eļan̄n̄e Inaaj kōm̧m̧ane ijo kuņaō. Kōnke kōn katak ko im barāinwōt eoon in, Ijeļā bwe Imaron̄ aolep iien pedped wōt ilo E.
Sofia I. 15 iiō, Uruguay
Pija ko jen Welden C. Andersen im Christian Ibanez