Nuknuk im Baotokūm

Ilo laļ in rainin, elōn̄ rejjab meļeļe ak kautiej baotok eo ekwojarjar an ānbwinnid, Armej ro rekwojarjar ilo Raan-ko Āliktata rej alikkar jen aer ekkōņak ilo juon wāween eo ej kwaļo̧k aiboojoj an ānbwinnid (lale For the Strength of Youth [booklet, 2011], 6–8). Ilo peij 52 ilo bok in, Mary N. Cook, rikakpilōklōk eo kein kajuon ilo būreejtōnji eo eutiej an Doulul eo an Jiron̄ ro, ej ekkōnono kōn jon̄ok in.

“Ilo an juon tampeļ ekkal, kōjparok eo eļap ej bōk jikin n̄an lale bwe ej kōjparok im aiboojoj, itulowaan im namōjen. Juon kii n̄an karōk tampeļ ko ej meļeļe juon tampeļ ej bōk jikin Irooj—ej m̧weo Im̧ōn. Jej kautiej tampeļ ko āinwōt em̧ ko rekwojarjar ijo ro wōt rereeo remaron̄ deļo̧n̄i. Jej kautiej tampeļ ko kōnke kain̄i ko rekwojarjar im bujen ko jej bōk koņaad ie rej kōm̧m̧an bwe en pidodo n̄an ad jepļaak n̄an Jemedwōj Ilan̄.

“Ānbwinnimi eļapļo̧k an aiboojoj jen tampeļ eo eaiboojoj ioon laļ in. Kom̧ij m̧aan ak kōrā ro rejitōn bōro nejin Anij! Ejja pedped kein wōt—rej jutak kōn, nōbar, im kautiej—rej jerbal eļapļo̧k n̄an kōjparok im bōbrae eo kom̧ij leļo̧k n̄an ānbwinnimi.”

Elmakot kein remaron̄ jipan̄ eok katakin ajri ro nejūm̧ kajim̧we pedped ko kōn ekkōņak nuknuk im baotokūm. Barāinwōt keememej bwe am̧ waanjon̄ak ilo karbab ilo nuknuk enaaj katakin ajri eo nejūm̧ wāween an aorōk ekkōņak eo ejjejet.

Elmakot ko n̄an Katakin Jodikdik ro

Riit ippān jodikdik ro nejūm̧ ilo jekjōn eo kōn nuknuk im Baotokūm̧, ilo Non Kokajur Jodrikdrik ro. Kōm̧m̧ane menin enaaj lewaj juon iien em̧m̧an n̄an ekkōnono kōn katak ko, kōjeram̧m̧an ko, im kakkōl ko an jon̄ok eo im n̄an uwaak jabdewōt kajjitōk ko ļaddik ak leddik eo emaron̄ wōr ippān.
Ļōmņak in kōm̧m̧ane juon nokon in jota eo an baam̧le kōn aorōk eo an nuknuk im baotokūm. Komaron̄ kajjitōk ippān baam̧le eo am, Eļan̄n̄e Irooj eaar pād ilo m̧ōn jar eo ippam, ewi wāween am̧ naaj kar kōņaan nuknuk? Ewi wāween am̧ naaj kar kōņaan kwaļo̧k eok make n̄an E? Ewi wāween am̧ naaj kar en̄jake n̄e kwaar karbōb ilo nuknuk? Komaron̄ barāinwōt ekkōnono kōn ewi wāween nuknuk jejjet n̄an iien ko jet, āinwōt jikuuļ, jerbal ak iien ikitōltōl ko.

Elmakot ko n̄an Katakin Jodikdik ro

Ad nuknuk ej jutak kōn ta eo eaorōk n̄an kōj. N̄an kōmeļeļeik pedped in, ļōmņak in kōm̧m̧an juon nokon in jota eo an baam̧le ilo wāween eo rej nuknuk āinwōt juon mijenede ak ekkōņak nuknuk in jar.
Men̄e ilo juon iiō edik, ajri ro remaron̄ jino nuknuk karbab. Bar etale ippān ajri eo nejūm̧ unin tōl ko ilo peij 7 in Non Kokajur Jodrikdrik Ro im leļo̧k kanuknuk eo me rej kautiej unin tōl kein.

Pija jen scott greer