Poraus seni ewe Aewin Presetensi, October 2012
Ew Kiien Pwapwa non Famini
Emon chon mak mi napanap seni Russia itan Leo Tolstoy a poputani noun puk a iteni Anna Karenina ren ekkei kapas: “Iteiten famini mi pwapwa mi nonno chok; iteiten famini ese pwapwa ese pwapwa non pwisin napanapan.”1 Use sinei non fatafatoch usun Tolstoy pwe iteiten famini mi pwapwa mi nonno fengen, nge ua fen kuna eu mettoch mi nonno fengen me neir: mi wor ar napanapen omusomus me monuki ekkewe tipisin ekkoch me ra kutta met mi murino.
Ekkewe mi nom non famini rese pwapwa, mi sokono, fan chommong ra etipisi ekkoch, ra song ren fansoun nangatam, me rese tongeni omusano tipisin emon seni nom.
“Ewer, nge …” ena met ekkewe rese pwapwa ra apasa. “Ewer, nge kese sinei ifa ukukun watten an efeingauaei,” emon a apasa. “Ewer, nge kese sinei ifa ukukun ngawen at ewe,” pwan emon a apasa.
Naman ir me ruemon mi pung; naman ir me ruemon rese pung.
Mi wor chommong tetenin song. Mi wor chommong tetenin metek. Nge met ua kuna pwe fan chommong sia ekieki pwe ach song mi pung pwe sipwe ekinamweieno netipach sia pwisin fori non ach ekiek ewe popun ewe emon a fori met a fori iwe sise tongeni omusano tipisin me pwe ewe emon mi namanam tekia, nge nupwen sia fori ei, sia pwan ekieki pwe kich mi nimenimoch me ese wor tipisich ren met a fis.
Noun ewe Prince we Konak
Mi wor ew tuttunapan ekkewe chon Welsh seni nom non ewe ier engorou rupuku usun emon prince mi niwin ngeni imwan me a kuna noun konak me mi wor cha won mesan. Ewe mwan a muttir tonong me, a fokkun nuokus, pwe a kuna pwe noun we monukon emon at ese nom me an ewe nenien annut fan itan monukon mi fen turuno. Ewe prince a fokkun song iwe a etau noun we ketinas me a nieno noun konak. Ekkis fansoun mwirin, a rongorong noun we at a kechiw—ewe monukon mi manau! Nepekin ewe monukon mi wor emon wolif mi mano. Ewe konak a fen tumunu noun ewe prince we monukon seni ewe wolif mi mochen nieno ewe monukon.
Ei tuttunap mi ekkis amwarar, nge a aitikich eu mettoch. A aitikich pwe naman ewe tuttunap sia pwisin ereni kich usun pwata ekkoch aramas mi fori met ra fori naman ese fich ren met mi weswesen fis—fan ekkoch sise mochen sinei met mi ennet. Sia mochen mefi pwe kich mi pung non ach song ren ach anommu ach ekiekingau me song. Fan ekkoch ach song mi tongeni nom ren fitu maram ika fitu ier. Fan ekkoch ach song mi tongeni nom non unusen manauach.
Eu Famini mi Aimufesen
Emon sam ese tongeni omusano noun we at ren an riki seni ewe an ra aiti an epwe fiti. Ewe sam ese pwapwaiti chienan ewe at, me ewe at a fori chommong metoch mi u ngeni met seman a ekieki pwe mi och epwe fori. Ekkei mettoch mi fori eu aninifengen nefinen ewe sam me noun we, me nupwen a tongeni, ewe at a su seni imwer me ese niwin. Rese kan kapas fengen.
Ewe sam a mefi pwe i mi pung ren met a mefi? Naman.
Ewe at a mefi pwe i mi pung ren met a mefi? Naman.
Nge met ua sinei pwe ei famini mi aimufesen me rese pwapwa pokiten ewe sam me ewe at rese tongeni omusomus fengen. Rese tongeni monuki ekkewe mettoch ra chechemeni usun ewe emon pwe mi ngau. Netiper mi uren song ese wor tong me omusomus. Ir me ruemon ra sonani seni pwisin ir ewe tufich ne efeiochu manauen ewe pwan emon. A usun ewe neni nefiner mi fokkun anonnon me watte iwe a usun ir me ruemon mi chon fotek non pekin ngun won ar pwisin kukun fonu.
Nge sia feioch, Semach won Nang ewe mi uren tong me mirit mi awora eu napanap ne pworacho ngeni ewe namanam tekian ruemon mi aimufesenir. Ewe angangen Achesefan mi napanap me watte mi eu angangen omusomus me achesefani aramas mi napanap seni meinisin. A watte seni met ua tongeni weweiti, nge ua pwarata ren unusen netipei me nguni pwe mi ennet me mi watte an manaman. Ewe Chon Amanau a fangano pwisin I fan iten ach tipis. Me ren I sia angei omusomusen ach tipis.
Ese Wor Eu Famini Mi Unusuch
Kich meinisin mi tipis. Fan ekkoch kich meinisin sia mwanino, en me pwan ngang. Kich meinisin mi feingau. Kich meinisin mi efeingaua ekkoch.
Me ren ach Chon Amanau angangen fangano kich mi tufichin angei manau fefeita me manau ese much. Nupwen sia etiwa An napanap me pworacho ngeni ach namanam tekia ren ach pweteteno netipach, sia tongeni awora achesefan me omusomus non ach kewe famini me pwisin manauach. Kot epwe anisikich pwe sipwe tongeni omusano ekkoch, me pwe sipwe mochen wesen achocho, pwe sipwe akkom omusomus ese nifinifin ika sise mwan, pwe sipwe nikitano ach song me sisap chuen ekieki usur. Kinisou ngeni Kot, ewe a fangano Noun we Anaemon, me kinisou ngeni ewe Nau, ewe a fangano Manauan fan itach.
Sia tongeni mefi an Kot tong fan itach iteitan ran. Sia tongeni fangano pwan och ngeni ekkewe aramas unukuch usun met sia kaeo non ewe kon mi fel itan “Because I Have Been Given Much”?2 Ewe Samon a suki ewe asam ngeni kich pwe sia tongeni angei omusomusen ach tipis. Met esap pung ika sipwe nikitano ach ekieki usun pwisin kich me ach namanam tekia me sipwe pwan suki ewe asamen omusomus ngeni ekkewe sia fiu ren—akkeuin ngeni ekkewe chon ach famini?
Nesoponon, ach pwapwa ese feito seni ach sipwe unusoch nge fen seni ach manaueni ekkewe nongonong seni nang, pwan non kukkun mettoch. Ewe Aewin Presetensi me Mwichen Engon me Ruemon Aposel mi fen apasa: “Pwapwa non manawan ar famini a tongeni awora murino famini non fansoun manawer iei popun ewe asukunen ewe Samol Jises Kraist. Ponuetan pupunu me famini ra awesano me fori won ar angang, me unusen mokutukut ren ar urumot won An Kot kokkot ika a forata ren ei nongonongun achifoua, iotek, aier, omusono, sufon, tong, memefen netipeta ren tumunun ar famini non tong me wenechar me wiser ngeni ar famini a awora anean en non manawer me titi seni met ese och won an we famini.”3
Omusomus mi nom nukunapan ekkei nongonong, mi feito seni an Semach won Nang kokkoten pwapwa. Pokiten omusomus mi ochufengeni ekkoch nongonong, a pwan ochufengeni aramas. A eu kii, a suki asam mi nok, a ewe nepoputan eu an mi wenechar, me a eu mettoch sia mochen non ew famini mi pwapwa.
Amo ita Kot epwe anisikich pwe sipwe anapano ach omusomus fengen non ach famini, anapano ach omusomus fengen ren ekkoch, me pwan anapano ach tufichin omusano pwisin kich. Ua iotek pwe sipwe kuna pwe omusomus mi eu napanap mi fokkun murino mi nonno chok me nein ekkewe famini mi pwapwa.
© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun ewe First Presidency Message, October 2012. Chuukese. 10370 901
Afanafan seni Ei Poraus
“Nupwen ka ammonata ne aiti ewe nesen, kopwe pwisin esinuk ifa usun ewe nongonong mi nono ngeni eu mettoch chon ewe famini mi fen pwisin kuna non manauer” (Teaching, No Greater Call [1999], 171). Ekieki usun om kopwe tungor ngeni emon chon ewe famini ne aporausa usun eu fansoun a pwisin kuna mettoch mi murino ren omusomus. Kapas fengen usun ekkei mettoch, kopwe esinna ekkewe feiochun omusomus. Kopwe osupwano ren om apasa om kapasen pwarata usun auchean ach omusomus fengen.