2012
Apwonueta Ach Kewe Pwon mi Pin
October 2012

Poraus seni Fefin Chon Amwa, October 2012

Apwonueta Ach Kewe Pwon mi Pin

Kopwe anneani ekkei mettoch iwe, nupwen mi och, kopwe aporausa ren ekkewe fefin ka churir. Kopwe aea ekkewe kapas eis ne anisuk ne apochokuna ekkewe fefin ka churir me pwan aochu manauom ren aean Fin Anisi.

Apungan Fin Anisi

Nuku, Famini, Aninis

Ach fori angangen an fefin chon amwa a pwarata pwe kich chon kaeo me a pwan eu napanap ne apwonueta ach kewe pwon mi pin nupwen sia angang ngeni ekkoch me a apochokuna emon me emon. Eu pwon mi pin mi eu pwon mi weswesen pin me mi nom feinfeino nefinen Kot me Noun kewe semirit. “Nupwen sia weweiti pwe kich ekkewe semiritin ewe pwon mi pin, sia sinei io kich me met Kot a mochen seni kich,” Elter Russell M. Nelson seni ewe Mwichen Engon me Ruemon Aposel a apasa. “An annuk mi mak non netipach. I ach Kot me kich Noun kewe aramas.”1

Kich fefin chon amwa sia tongeni apochokunata ekkewe sia churi pwe repwe achocho ne apwonueta ar kewe pwon mi pin. Ren ach fori ei, sia pwan anisir ne ammonata ngeni ewe efeiochun manau ese much. “Emon me emon fefin non ei Mwichefen mi fen fori pwon mi pin ren ewe Samon mi wor wiser ne aninis ne amanaua ngunun aramas, ne emweni ekkewe fefin seni unusan fonufan, ne apochokunata ekkewe imwen Saion, me forata ewe muun Kot,”2 Elter M. Russell Ballard seni ewe Mwichen Engon me Ruemon Aposel.

Nupwen sia fori me apwonueta pwon mi pin, sia winiti pisekin angang non poun Kot. Sipwe tongeni pwarata ach nuku me apochokunata an ekkoch nuku non Semach won Nang me Jises Kraist.

Seni ekkewe Pukfel

1 Nifai 14:14; Mosaia 5:5–7; 18:8–13; Doctrine and Covenants 42:78; 84:106

Seni Ach Uruo

Ewe tempel mi eu nenien kinisou ngeni sounang meinisin, ewe Samon a pwarata ngeni Joseph Smith non 1833. A eu nenien kaeo fan iten aramas meinisin mi angei ewe kokko ngeni ewe angangen afanafan non wiser kewe meinisin; pwe repwe unusoch non ar weweiti usun ar angang, usun ekkewe nongonong, me usun ekkewe kinikinin ewe kapas allim, usun mettoch meinisin mi namwot ngeni ewe muun Kot won fonufan (D&C 97:13–14).

Fefin seni Fin anisi non Nauvoo, Illinois, nepoputan ewe ier 1840 ra anisir ne ammonata ngeni ekkewe angangen ewe tempel. Non ekkewe angangen ewe pristut mi napanap ekkewe Sounang non Fansoun Soponon mi angei non ewe Nauvoo Tempel, ra kuna ewe manamanen Kot (D&C 84:20). “Nupwen ekkewe Sounang mi apwonueta ar kewe pwon mi pin, a awatteno ei manaman me a nonnom rer non ar kewe ranin sosot me ekkewe ier mwer.”3

Non ewe Mwichefen ikenai, fefin me mwan mi nukuchar seni unusan fonufan ra angang non ewe tempel me ra kuna pochokun seni ekkewe feioch sia chok tongeni angei seni ekkewe pwon mi pin non ewe tempel.

© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun Visiting Teaching Message, October 2012. Chuukese. 10370 901

Esinesin

  1. Russell M. Nelson, “Covenants,” Liahona, Nov. 2011, 88.

  2. M. Russell Ballard, “Women of Righteousness,” Liahona, Dec. 2002, 39.

  3. Daughters in My Kingdom: The History and Work of Relief Society (2011), 133.

Met Ua Tongeni Fori?

  • Ifa usun ai kewe pwon mi pin mi apochokunaei?

  • Ifa usun ua anisi ekkewe fefin ua churi pwe repwe apwonueta ar kewe pwon mi pin?