Pweng sin Prestuhnsi Se Met, Ohktohpa 2012
Ki Se nuh ke Sucu Engan
Mwet sihm pwengpweng fin acn Russia Leo Tolstoy el sramtweack puk lal Anna Karenina ke kahs inge: “Sucu engan nuh kwewa oacna sie; sucu suhpwacr nuh kwewa suhpwacr ke ohiyac la sifacna.”1 Ke nga tiac luhlahlfongi suwohs oacna Tolstoy lah sucu engan nuh kwewa oacna sie uh, nga konwacack ma oacna sie oasr yurin inkaiyacn sucu an: oasr ohiyac yohrohlos in nuhnak muhnahs ac muhlkuhnlah ma sesuwohs luhn mwet sahyac ac suk ke ma wo.
Mwet oasr ke sucu suhpwacr uh, ke ohiyac sahyac, kwacna suk ke ma koluk, nuhnkweyac, ac tiac kuh in muhlkuhnlah ma koluk tuh sikyak met ah.
“Ahok, tuhsruhktuh …” muhtwacwacack selos suc suhpwacr. “Ahok, tuhsruhktuh kom tiacna etuh luhpah el ahkngalyeyuc uh,” sie fahk. “Ahok, tuhsruhk kom tiacna etuh kolukiyacl,” sie sahyac fahk.
Sahp kwewana pwacye; tuh sahp tiac.
Oasr ohiyac in ahkkoluk puhkantwen. Oasr ohiyac in ahkngalye puhkantwen. Tuhsruhktuh ma nga akihlen pa kuht ke ahksuwohsye ahngyahng lasr ac ahkfalye nuhnak lasr ke kuht fahk sifacna mwe sramsram ke ohiyacn mwet sahyac ac ahkkolukye mukwikwi lalos nuh ke sie ohiyac ma tiac kuh in eis nuhnak muhnahs tuh, ke oacna sie pacl, kuht ahkfuhlwactye mukwikwi lasr nuh ke nwacsnwacs ac suwohs.
Kosro nuhtin Fihsrack
Oasr sie sramsram mahtuh luhn mwet Wales ke yac siofok singucul tolu ke sie fihsrack suc fohlohk nuh lohm sel ac konwacack lah oasr srah kahklah ke muhtuhn kosro nahtuhl. Mukul sac silahklahk nuh loac ac, ke puhla sahngweng lal, liye lah tuhlihk mukul ahwowo se nahtuhl ah wacngihnlac ac mwe oan lal ikihlyuckyak. Ke ahngyahng luhn fihsrack sac el olwack katlas nahtuhl ac uniyac kosro soko nahtuhl ah. Tiac paht, el lohng mukul nahtuhl tuhng—ahwowo el moul! Sisken ahwowo sac wolf soko misac oan siskacl. Kosro soko ah, ke ma pwacye, loangwelah ahwowo se nuhtin fihsrack sac liki wolf ahkmas soko ah.
Finne sramsram soko inge sramlacp, sramsram soko ahkuhtweyac ohiyac se. Sramsram soko inge ahkkahlwemye tuh sramsram kuht fahk sifacna ke efuh ohiyacn mwet sahyac tiac insese nuh ke ma pwacye pacl nuh kwewa—kuhtuh pacl uh kuht sruhnga etuh ma pwacye kac. Kuht kena puhla suwohs sifacna ke ahngyahng lasr ke kuht sruokyac nuh ke ohiyac ac puhla koluk lasr. Kuhtuh pacl puhla koluk inge kuh in sun mahlwem kuh yac pucspucs. Kuhtuh pacl ma inge sun lusen moul nohfohn.
Sucu Se Orekwaclihk
Sie pahpah tiac kuh in nuhnak muhnahs nuh sin tuhlihk mukul nahtuhl suc som liki inkacnek soko ma lutiyuck nuh sel. Oasr kawuck luhn tuhlihk mukul se pahpah sac tiac insese nuh kac, ac el oruh ma puhkantwen sahyacn ma pahpah tuhmwacl nuhnkuh muh el enenuh in oruh uh. Ma inge oruh sie akuhkuhin inmahsrlon pahpah ac tuhlihk mukul nahtuhl, ac ke pacl tuhlihk mukul sac kuh, el som liki lohm ah ac tiac fohlohk. Elos tiac arlac sulpac sramsram.
Kuh pahpah sac puhla suwohs? Sahp.
Kuh tuhlihk mukul sac puhla suwohs? Sahp.
Ma nga etuh ke sucu se inge pa elos fahsrelihk ac suhpwacr ke srihpen pahpah ac tuhlihk mukul nahtuhl tiac kuh in nuhnak muhnahs nuh sie sin sie. Elos tiac kuh in ngwetlah ahluhkwelah ma elos esam ke ma koluk elos oruh nuh sie sin sie. Insiyaclos sesseslah ke ahngyahng ac tiac ke luhngse ac nuhnak muhnahs. Kais sie eslah pacl wo in kahsruh sie moul luhn mwet sahyac ke ma wo. Fahsrelihk se inmahsrloltahl ah sikyak arlac loal ac sralacp oruh kais sie kapihr ke ip luhn nguhn ke tuhka emtucng se lal sifacna.
Wo ohiyac, Pahpah Ma Pahtpaht lahlmwetmwet ac pahkotwen tuhmasr Inkuhsrao orwaclah sie ohiyac in kuhtanglah ohiyac inse fuhlwact se inge. Iwaclah yohk ac pahtpaht pa sie mukwikwi wolacna ke nuhnak muhnahs ac ahksuwohsyeyucklac. Yohk srihpac ke ma inge ahluhkwelah kahlwem luhk, tuhsruhktuh nga ahkpwacyeike insiyuck ac nguhnihk nohfohn ke ma pwacye ac kuh wolacna kac. Mwet Lahngo el kihsackuhnuhllah in moli ma koluk lasr. Ke El kuh in eis nuhnak muhnahs.
Wacngihn Sucu Suwohswohs
Kuht nuh kwewa oruh ma koluk la. Kuht nuh kwewa oruh tahfonglac, wikomyang ac nga. Kuht nuh kwewa kihneta. Kuht nuh kwewa ahkngalye mwet sahyac.
Ke srihpen kihsackuhnlah luhn Mwet Lahngo lasr uh kuht kuh in eis engan ac moul ma pahtpaht. Ke kuht insese nuh ke inkacnek Lal ac kuhtanglah inse fuhlwact lasr ke ahkmuhlahlahye insiyacsr uh, kuht kuh in us mihslac ac nuhnak muhnahs nuh ke sucu lasr ac moul lasr sifacna. God el ac kahsrwe kuht in luhngse sang nuhnak muhnahs, in luhngse fahsr mael luo, in taltal koluk emet finne tiac tahfonglac lasr, in fihliyac nuh sahyac puhla koluk mah ac tiac sifil tuhfa. Kuloh nuh sin God, suc sang Wen Sefanna Nahtuhl, ac nuh sin Wen, suc sang moul Lal kacsr.
Kuht kuh in puhla luhngse luhn God kais sie lwen. Nga muh kuht kuh in srihke yohk likina met ah in eis kuhtyang sifacna nuh sin mwet wiyacsr oacna lutiyuck ke on in alu kahto soko uh “Because I Have Been Given Much”?2 Leum el ikacslah sruhnguhl ma lwelah kuht in eis nuhnak muhnahs. Na suwohs muhkwena kuht fin eslah inse fuhlwact ac srohwohsr lasr ac muhtwacwacack in ikacslah sruhnguhl insewowo luhn nuhnak muhnahs nuh sin mwet suc kuht oruh upac nuh se—yohkna nuh sin mwet nuh kwewa ke sucu lasr sifacna uh?
Ke sahflahiyac ah, engan uh tiac tuhkuh ke ma suwohswohs tuhsruhktuh ke orekmakihn ip yohk wolacna, finne ke ohiyac srihsrihk. Prestuhnsi Se Met ac U luhn Mwet Sap Singucul Luo elos fahkwack: “Engan ke moul in sucu kuh in sikyak fin sucu uh moulkihn luti luhn Leum Jisus Kraist. Pahyuck ac sucu wowo uh oreklac ac ahknoeyuck ke ip yohk ke luhlahlfongi, pruhe, auliyak, nuhnak muhnahs, ahkfuhlwact, luhngse, pahkomuhta, orekma, ac kain in mukwikwi wo sahyac pac.3
Nuhnak muhnahs oasr infulwacn ma pwacye fihsracsr inge, ma tuhkuh ke plwacn engan luhn Pahpah tuhmasr Inkuhsrao. Ke srihpen nuhnak muhnahs kapsracni ip yohk uh, e kapsracni mwet uh. Ma inge pa sie ki, kuh in ikacslah sruhnguhl kaul uh, pa muhtwacwacackiyacn sie inkacnek suwohswohs, ac pa finsrak se ma wo emet ke sie sucu engan.
Lwelah God elan kahsrwe kuht in srihke yohk likina met ah in sang nuhnak muhnahs nuh sin sucu lasr uh, yohk nuh sin sie sin sie, ac sahp sang nuhnak muhnahs yohk nuh sesr sifacna. Nga pruhe lah kuht kuh in puhlakihn nuhnak muhnahs ke sie inkacnek wolacna oacna inkaiyacn sucu engan uh oacna sie.
© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn First Presidency Message, October 2012. Kosraean. 10370 868
Luti ke Pweng Se Inge
“Ke kom ahkolah kais sie lesin an, siyuck sum sifacna ma ip yohk an pa oacna ma se tuh sikyak nuh sin mwet ke sucu ke moul lalos sifacna” (Teaching, No Greater Call [1999], 171). Nuhnkuh in suli mwet ke sucu an in akacsruhi ke mukwikwi wo ma sikyak nuh selos kuh elos liye ke nuhnak muhnahs. Sramsramkihn puhlakihn inge, ahkuhtweyac in wo mwe insewowo luhn nuhnak muhnahs. Ahksahfye in oruh fahkwack luhlahlfongi lom ke yohk srihpac luhn nuhnak muhnahs nuh sin sie sin sie.