Mulwol ko Bin Somm’on e Presidency, October 2012
Reb e Key ko Tabinaew nib Fafalen’
Fare author nu Russia i Leo Tolstoy e ke tabab nag e babyor rok Anna Karenina ko pi thin ney: “Pi tabinaew nib falfalen’ e gubin ma ta’abrogon; gubin e tabinaew nib kirebaen’ e ba thilthil rogon.”1 Napan ni danug nang fan nike yoeg Tolstoy ni pi tabinaew nib falfalen’ e ba ta’abrogon, mug pir’eg ta’aban’en ni oren e ta’aborogon: bay e kanawo’ ko n’ag fan nge pi n’en ni dani mangil ko boech e gidii’ ni yibe pag ma yibe gay e n’en nib mangil.
E gidii’ u lane pi tabinaew nib kirbaen’, i yaed ma, badake ma pir’eg e tin tagan, dani ma n’ag fan, ma dani pag e tin nike buch ni kafram nike kireb nag e tafney roraed.
“Arrogon, machane …” ma tabab ko picha’an ni ba kirebaen’. “Arrogon, machane dam nang gelngin rogon nike kireb nag e tafney rog,” ke yoeg bee’. “Arrogon, machane dam nang gelngin nib tagan,” ke yoeg bagyaed.
Sana l’agruw ma yow mangil; sana dariy bagyow.
Bo’or e rogon e lanin’uy nibe kireb. Bo’or e rogon e amith. Machane n’en ni ku na’ab ngay e napan ni gadad ma weliy fan e domomow rodad ma gadad fal’eg laniyaen’ dad ni gadad be yoeg e pi mornga’agen boech e gidii’ ni yibe tagan nag raed ni dabyog i n’ag fan nge kireb roraed, ta’ab ngiyal’, ma gadad ta’ gadad ni gadad mangil ma dariy ban’en nib kireb rodad.
Fare Kus ko fare Pilung
Imoy ba yaat ku Welsh napan 13 century ni mornga’agen ba pilung nike sul nga tabinaew me pir’eg e kus rok nibe maap e racha’ u owchen nga but. Me mil fare pumo’on u na’un nga waen ma, muruw rok, me guy ni fare pagal ni madway ni faak e daki moey ma way rok e ke taflang. U fithik e domomow me girngiy fare pilung e saydon rok me li’ fare kus nge yim’. Ta’aboch riy, me rung’ag ba luman e bitir rok nibe yoer—fare bitir e kab fas! To’ban fare modway e bay ba wolf riy nike yim’. Fare kus, ni riyul’, e kari matangiy fare faak fare pilung ko ba wolf nib golumor.
Biney e yaat nib gaa’ tamilang, machane be dag ban’en ni ngan nang. Ke dag rogon ni fare yaat ni gadad be yog rodad mornga’agen ni mongfan nima mithmith boech e gidii’ e gathi gubin ngiyal’ ma aram rogon ko tin riyul’—boech ngiyal’ dabun dad ni ngad nanged e tin riyul’. Gadad ba’adag ni ngad thamiyed e domomuw rodaed ni ngad teled e tirodad e kireb nge domomuw. Boech ngiyal’ ma pi kireb ney e rayog ni nge paer ni bukun e pul fa duw. Boech ngiyal’ e ma paer napan e yafas rom.
Tabinaew nikan Kii’ u But
Papa’ e dabiyog ni nge n’ag fan e faak nib pagal nike chuw ko kanawo’ ni kan fil ngak. Fare pagal e bay e tafagar rok ni dabun e papa’ rok, ma ke rrin’ bukun ban’en ni gathi aram rogon nibe leam nag e papa’ rok ni ra rrin’. Biney e n’en nike buch u thilin e papa’ nge bitir, ma pangin ni rayog ni nge rrin’ fare pagal, me chuw u tabinaew ma dabki sul. Dakir yow ma non ngorow.
Ke mat’aw fare papa’? Sana.
Ke mat’aw fare pagal? Sana.
Gum nang ni biney e tabinaew e kan kii’ u but ma ke kirebaen’ ya dariy bagyow fare papa’ nge pagal ni ra n’ag fan rok bagyow. Dabyog ni dabir sap gow ko tin kireb ban’en nike buch rorow. Kar suguyew gumircha’en row ko domomuw ko bin ni tu’ufeg nge n’ag fan. Ra bag yow ma ke chuweg ir ko kanawo’ ni ngar ayuweg new yow nga mangil e yafas rorow. Fare fu’oth u thilin row e ke m’ug ni rib to’ar ma rib ga’ ridan ni ra bagyow ma ke mang e kalbus ko ya’el ko birok e nam.
Machane, Chitamangdad nu Tharmiy ni Manechubog nib llowan’ ma gadad ba tu’uf Rok e ke pi’ e kanawo’ ni ngan chuw ko biney efu’oth nib uf’uf. Fare Bayul nib mangil mab manemus e bin tha’abi mangil e mithmith ko n’ag fan nge sul nga ta’abang. Rogon fan e rib ga’ ko rogon ni gumanang, machane gube micheg u fithik gum’ircha’eg e n’en ni riyul’ riy nge gelngin nib polo’. Fare Tathpeg e ke pii’ Ir ninge bayul nag e pi denen rodaed. U Dakean me yag e n’ag fan ngodad.
Dariy Reb e Tabinaew nib Macholbog
Dariy bagdad ni dariy e denen rok. Gadad gubin ma gadad ma ngongliy e oloboch, ni godow mu’un ngay. Gadad gubin ma kad mad’ad gaed. Gadad gubin ma kad madad niged bee’.
Dakean e maligach ku Tathapeg rodad e rayog ni ngeyog e falfalen’ nge yafas nib manechubog. Napan ni gadad ra fol ko pi kanawo’ Rok ma gadad pag e uf’uf rodad ni ngad munguy niged gum’ircha’dad, ma rayog ni ngad feked i yib e mangil nge n’ag fan nga lan e tabinaew rodad nge lane yafas rodad. Ra ayuweg dad Got ni ngad n’aged fan, ma gadad adag ni ngad daroed ko bin migid e mile, ni ngan mang e bin somm’on ni ngan siroq mus ni gathi kireb rodad, ma gadad tay e pi kireb nga orel ma dabkin n’anggin nge ga’. Ke magaer Got, nike pii’ Faak nib Ma’agirag nib Tu’uf Rok, ma fare Faak, e ke pii’ e yafas rok ni fan ngodad.
Rayog ni ngad thamiyed e tu’ufeg rok Got ngodad ni gubin e rran. Dabin ni paged gadad ko pi tafagar rodad rogon ni kan fil u lane fare tang “Bachan Nib Yo’or Nikan Pii’ Ngog”?2 Ke bing Somoel e maab ngodad ni ngan n’ag fan rodad. Dani mangil ni ngad paged e tirodad e kireb man tabab i bing e ra maab nem ko n’ag fan ngak e picha’an ni kad magawon gaed rok—ni baga’ ni tabinaew rodad?
Ko tomren, ma falfalen’ e darma yib ko tha’abi mangil machane ngan rrin’ e pi kenggin e yalen nib thothup, mus ni kanawo’ nib achig. Fare Bin Somm’on e Presidency nge fare Ulung ko fare Ragag nge L’agruw i Apostle e kar ga’ar gaed: “Falfalen’ u lane yafas ko tabinaew e baga’ ni ma buch napan ni kan pir’eg u dakean e pin’en ni ke fil Somoel ni Yesus Kristus. Mabgol nib mangil rogon nge pi tabinaew nib mangil e ke fal’ ma ke paer u dakean e pi kenggin e yilen ko mich, meybil, kalngan’, n’ag fan, tay fan, tu’ufeg, adag, murwel, nge gubin e tin mangil ban’en.”3
N’agfan e kan tay u lukngun e pi n’ey nib riyul’ nib moem, nikan pir’eg ko tanam ko falfalen’ rok e Chitamangdad nu Tharmiy. Ya n’ag fan e ma peth e pi kenggin e yilen, ma peth nag e gidii’. Ba key, nima bing e maab nib lok, tabolngin e kanawo’ nib yul’yul’, nge reb e bin tha’abi mangil e athap ni fan ko tabinaew nib falfalen’.
Ay gi ayuweg dad Got ni ngad n’ag fan e kireb ko tabinaew rodad, man n’ag fan rodad, ma sana ngad n’ag faned rodad. Gube meybil ni ngad nanged e n’ag fan ni reb e kanawo’ nib falel’ ni oren e tabinaew nib falfalen’ ma ba ta’aborogon.
© 2012 ko Intellectual Reserve, Inc. Gubin ni mat’won ma bay. Nni yoloey u Mariken. Kan micheg nag ko thin nu Ngalis: 6/11. Micheg nag i pilyeg: 6/11. Ni pilyeg ko First Presidency Message, October 2012. Yapese. 10370 905
Rogon ni ngan Fil ko Biney e Mulwol
“Napan ni gara fal’eg rogon ko re lesson, mag fithem ko rogon fare kenggin e yilen ni boed ban’en nike buch u lane tabinaew ko tiroraed e yafas” (Teaching, No Greater Call [1999], 171). Mu pining gothon fare tabinaew ni ngan weliy e pin’en nib mangil nike buch roraed fa n’en ni kar guyed ko kalngan’ nib mangil. Mu weliy e pin’ey nike buch, moeg e tawa’ath nima yib ko n’ag fan. Mu’ nag ko mich ko n’en nib ga’fan ni ngan n’ag fan rodad.