Men ko Rem̧m̧an rej Jab Bōjrak Aer Itok

Jen Caitlin A. Rush

Ilo an ro jet ajļo̧k kōn m̧ōkaj in an oktak iien, Iaar m̧ōņōņō n̄an kememej n̄an lan̄lōn̄ eo im erem̧aanļo̧k n̄an ilju im jeklaj.

Eaar juon jotaan Bōļaide āinwōt raan ko jet. Ro m̧ōtta repaaktata im n̄a kar jijet ilo m̧weo im̧ō ālkin kar alooje juon pija, jab emakijkij ilo kōnono innām buuļ ettōn̄. Juon mejatoto eo kōn wōnm̧aanļo̧k wōt in m̧ōņōņō eaar kobrak mejatoto eo, im iaar jab maron̄ dāpij aō ettōn̄ ilo an bwebwenato ko im ļōmņak ko jepooļ ruum̧ eo. Jet iian armej ro iaar ioon er juon allōn̄ m̧okta ļo̧k; jet iaar jeļā kajier aolep 25 iiō ko aō.

Ilo juon iien juon iaan ro m̧ōtta jān etto im n̄a kar aikuj in kwaļo̧k ememļo̧k ko kōn jet iaan ro m̧ōttam ilo kaļļej jān jet iiō ko im̧aan ļok. Ilo am kar kōnono, iaar ļōmņak kōn ewi jon̄an aō būrom̧ōj kōn rein m̧ōtta, kōn ewi jon̄an limo eo kar ippam̧, im ewi jon̄an am kar epaak. Kiiō kōm̧ ar kadiwōjļo̧k im kar emm̧akūtļo̧k n̄an jikin ko ipeļaakin laļ in, lo kōm make ilo jekjek ko kōm̧ jamin kar ioon e. Iaar bōk kūtuwō kōn en̄jake jidik kōn būrom̧ōj, innām kar lale peļaakin ruum̧ eo ilo māj ko rettōn̄ rej jepooļeō ilo iien eo im kar m̧weiūr kōn juon ļōm̧nak ejidimkij: men ko rem̧m̧an rej wōnm̧aanļo̧k wōt.

Ļōmņak in eļemwaan eaar lukkuun in bwe an aorōk n̄an n̄a, eļaptata jān an iien otemjej pen n̄an n̄a n̄an jelm̧ae oktak eo im pere eo n̄an kōtļo̧k men ko rem̧m̧an. Ij ajļo̧k kōn tōre ko ilo pād ilo tōre jab in, kijerjer n̄an bōk lan̄lōn̄ eo edipio eo Ij kōtmāne im ļōmņak in mour kake. Ijeļā n̄e ewōr ippa men ko rem̧m̧an, im Ikōņaan dāpij wōt im jamin kōtļo̧k e; jowan in im limo ilo jotaan in Bōļaide eo eaar juon jotan em̧m̧an. Ekkā n̄e ij kile ewi jon̄an an em̧m̧an men ko, em̧ōkaj aō ļōmņak kōn ewi wāween an aolep men kadu kitier, bwe enaaj āliktata jako ilo tōre ak jekjek.

Ak jotenin ajļo̧k eo itulowa eaar jaab itok. Jijet bajjōk, jepooļ kōn armej ro Ij iakwe, Ijeļā men̄e jet men rem̧m̧an rej itok n̄an juon jem̧ļo̧k im bwe ejjeļo̧k pere me elōn̄ men ko reppen kōn ilju im jekļaj, men ko rem̧m̧an rej itok wōt. Im aolep iien renaaj waļo̧k—toon wōt aō naaj kōtļo̧ki. Men̄e ro Ij iakwe er, bōbrae enaaj obrak kōn kāāl im armej ro rekabwilōn̄lōn̄ im en̄jake ko Ijan̄in kar loi.

Jet iien epen n̄an wōnm̧aanļo̧k, ak jej aikuj. Im wōnm̧aanļo̧k jab meļeļe meļo̧kļo̧k ro m̧ōttad, kejekdo̧o̧n ememļo̧kjeņ ko. Ej meļeļein kōpeļļo̧k būruwōd n̄an m̧ōņōņō eļap im eļap en̄jake ko.

Jet wiik ālikin Bōļaide jab eo, būreejtōnji eo an ro rūm̧m̧an ded ro ilo branch eo aō kar kōtļo̧k er. Ilo an ro jet jān branch eo edik maron̄ kwaļo̧k, eaar pen n̄an ļōmņak kōn ta eo eaar waļo̧k ilo branch eo ilo aer pedped ioon em̧m̧aan rein im kōrā ro ippāer, ro im kōm̧ ar jino iakwe er im lōke er. Ak Iaar kiil mejem im ālij ippa make naan ko raar itok n̄an eō Bōļaide eo: Men ko Rem̧m̧an rej Jab Bōjrak Aer Itok Kar kaenōm̧m̧an eō im pojak n̄an oktak eo.

Oktak ej iaļ eo an Irooj. Ej kōņaan bwe jen m̧ōņōņō im eddōkļo̧k, n̄an m̧ōņōņō im wōnm̧aanļo̧k wōt ilo mour ko ad. Mour in ej juon em̧m̧akūt, im ilo ad pād lan̄lōn̄ kōn kiiō im m̧aanjabpopo n̄an apan̄ ko jab loi, jej aikuj wōnm̧aanļo̧k, pād wōt ilo laudin̄din̄, būruwōd ej peļļo̧k n̄an en̄jake ko im men ko rem̧m̧an me rej itok wōt ilo iaļ eo ilo ejjeļo̧k pere.

Pija ko jen Matthew Reier