Jipan̄ Jodikdik ro Bōk En̄jake ko ilo Jetōb

Jen Melissa Merrill

Māākjiin ko an Kabun̄

Ejjeļo̧k emaron̄ kipel jodikdik ro n̄an bōk en̄jake ko ilo jetōb, ak rein jinen im jemān im ritōl ro rejeļā, ewōr wāween ko n̄an kōjparok en̄jake ko me rej tōlļo̧k n̄an oktak.

Ke Vyacheslav im Zoya Gulko jen Ukraine kar jino ekkatak kōn Kabun̄ in, leddik eo nejier 13 iiō rūttoon, Kira, eaar jab m̧ōņōņō. Eaar m̧akoko in bōk koņaan ilo katak ko an mijenede, im ke eaar jeļā bwe elder ro rej itok n̄an m̧weo im̧weer, eaar “kwaļo̧k an kabokļo̧k kōjem in ruum̧ eo an,” jinen ej keememej wōt.

Būratōr im Sister Gulko, ro raar pepe ippān doon n̄an kobatok ilo Kabun̄ eo, kar kile bwe eļan̄n̄e remaron̄ in kōpooj juon iien em̧m̧an n̄an Kira n̄an en̄jake Jetōb eo, būruwōn emaron̄ in en̄jake. Kōnke naan in kam̧ool eo an Sister Gulko make eaar ijjino ke eaar pād ilo juon iien peptaij an bar juon armej, eaar kajjitōk ippān Kira n̄an itok n̄an peptaij eo—n̄an jipan̄ e jāniji nuknuk ko tokālik. N̄an bwilōn̄ eo an Sister Gulko, Kira eaar errā.

“Eaar waļo̧k!” Sister Gulko ej keememej. “Jemedwōj Ilan̄ eaar jerbal ilo juon wāween elukkuun kabwilōn̄lōn̄.” Kira eaar en̄jake Jetōb eo, im juon wiik ālkin peptaij eo an ro jinen im jemān, raar errā n̄an ioon mijenede ro. Eaar jino riiti Bok in Mormon eo. Jet wiik tokālik, Sister Gulko eaar kile juon peba ej etoto ilōn̄in tebōļ eo an Kira; jeje ko ioon raar naan ko jen 2 Nipai 2:25. Ruo im jimettan allōn̄ ālkin peptaij eo aer make, Gulko eaar pād ilo peptaij eo an leddik eo nejier. Kiiō, 20 iiō ko tokālik, Kira eaar m̧are. E im ļeo pāleen, Dave, kar liāp ilo tampeļ im rej kaajiririik ruo nejiero ļaddik ilo ko̧jpeļ in. Eaar jerbal kōn tōmak ilo elōn̄ kūr ko im ej niknik wōt ilo Kabun̄ in.

Jen en̄jake jab in, Zoya ej ba eaar ekkatak juon katak eaorōk me ej jerbal n̄an ro jinen im jemān ro etto aer membōr in Kabun̄ in āinwōt n̄an e im ļeo pāleen āinwōt membōr ro rekāāl: ro jinen im jemān im ritōl ro rejjab maron̄ kipel ajri ro nejier n̄an ko̧jpeļ eo, ak remaron̄ karuwaineneik er n̄an likūt im ejaaki en̄jake ko aer make ilo jetōb. En̄jake kein remaron̄, kwaļo̧k kōlaajrak in jeram̧m̧an ko, tōlļo̧k n̄an oktak.

Ak ta wāween eo em̧m̧antata n̄an ilo̧k n̄an ejaake kain en̄jake rot kein? Ro jinen im jemān im ritōl ro jen aolepān laļ in rej kwaļo̧k ta eo eaar jerbal n̄an er.

Leļo̧k n̄an Jodikdik ro Iien ko Rem̧m̧an n̄an Jerbal

Granja Viana Ward ilo São Paulo Brazil Cotia Stake eo eaar wōr juon aer jon̄ok eo eļap kōn m̧akūtkūt ilubwilijin likao ro. Ak ritōl ro aer raar kile bwe jet iaer raar jelm̧ae apan̄ ko aer make im pen aer kakūrm̧ool jerbal ko aer ilo priesthood eo.

Ālkin an bisoprik im ritōl ro an Doulul eo an Likao ro kar ko̧o̧njeļ ippān doon, raar ļōmņak n̄an kōļapļo̧k aer kōļmenļo̧kjeņ kōn m̧akūtkūt ko aer n̄an jerbal in jipan̄ im ejjab lōn̄ wōt in ilo kalimomo ak kam̧ōņōņō. Menin ekoba loļo̧k membōr ro rejeniknik an doulul eo, bōk koņaer ippān ilo jerbal ippān mijenede ro, im letok letak kwojkwoj eo n̄an membōr ro rej pād wōt ilo m̧ōko im̧weer. M̧akūtkūt kein rej kōm̧m̧an bwe likao ro en wōr aer iien em̧m̧an n̄an jerbal kōn ekkatak ko raar katak kaki ilo jemnere im ilo raan in Jabōt (lale 2 Nipai 2:26).

Ilo juon tōre, “m̧akūtkūt kein ilo jetōb raar kōm̧m̧an oktak,” juon ritōl an priesthood eo eaar ba.

“Kōm kar bwilōn̄ ke ilo kar juon Jabōt in jitlo̧k, aolep likao ro nejūm raar kwaļo̧k naan in kam̧ool ko aer,” eaar ba. “Ke raar kōm̧m̧ane āindein, elōn̄ iaer raar keememej ilo kōmjaļaal jetōb eo em̧m̧an raar en̄jake ilo tōre ko. Juon likao eaar kwaļo̧k en̄jake eo kōn leto letak kwojkwoj eo n̄an juon membōr erūtto ilo ward eo am me eaar wōr an nan̄inmej in ānbwin ium̧win jilu iiō ko. Lio pāleen, juon sister eo etiljek, eaar karuwaineneik likao ro nejūm kōn lan̄lōn̄ im kōjatdikdik. Ālkin kain̄i eo, eaar kwaļo̧k n̄an er m̧ōņōņō eo eaar en̄jake ilo mour eo an kōnke ko̧jpeļ eo men̄e jorrāān ko reļļap im mālijjon̄ ko ej jelm̧ai. Raar en̄jake Jetōb im kile oktak ko ko̧jpeļ eo ej kōm̧m̧ani ilo mour ko an armej. En̄jake in eaar lukkuun kajoor me renaaj keememej e ium̧win iiō ko rej itok—bōlen n̄an aolepān mour ko aer.”

Eaar kile bwe ejjan̄in kar lo juon kain uwaak jen jabdewōt “ikkure in football ak m̧akūtkūt in Ippān doon eo ekam̧ōņōņō.” Ijjelo̧kin, eaar ba, en̄jake eo eaar katakin e aorōk eo an im̧we kōn kain en̄jake ko me jodikdik ro remaron̄ en̄jake Jetōb.

“M̧akūtkūt in ippān doon ko raorōk,” ej wōnm̧aanļo̧k. “Ak en̄jake ko an jetōb raorōk ilo jipan̄ ro kalōk naan in kam̧ool ko aer make.”

Kajjojo Jabōt ilo Rennes Ward, Angers France Stake, Sister Delphine Letort, āinwōt būreejtōn eo an Doulul eo an Jiron̄ ro, kar leļo̧k juon kaat n̄an kajjojo jiron̄ ilo jarlepju eo im kar kajjitōk ippāer n̄an kālet juon m̧ōttāer me eaar jab pād ilo m̧ōn jar eo im jeje n̄an e. Jiron̄ eo eaar jeje kōn katak eo an wiik eo—ta eo raar katak ak ta eo eaar im̧we er—barāinwōt juon kakeememej em̧m̧an, an make. Innām Sister Letort ak juon iaan rikakpilōklōk ro an raar jilkinļo̧k kaat ko ilo mail n̄an ro raar jab pād ilo m̧ōn jar eo.

M̧akūtkūt eo eaar ļam waan bōtaab wājepdik, eaar ba, eaar jab wōt juon wāween n̄an ro me raar jab pād n̄an jeļā bwe raar keememej er ak barāinwōt n̄an ro me raar je naan ko n̄an an ļapļo̧k aer ļōmņak kōn kajjojo iaer.

“Bwe jān men ko redik im reļam waan men ko reļļap rej kūrm̧ool,” eaar ba (lale Alma 37:6). “Kōm kar lo an waļo̧k. Jiron̄ ro kar kōketak er, im en̄jake in eaar jipan̄ kōļapļo̧k naan in kam̧ool ko aer.”

Kobaik Jodikdik ro ippān Naan eo an Anij

Alma eaar katakin bwe kwaļo̧k kōn naan an Anij ewōr juon kajoor ewājepdik ie (lale Alma 31:5). David Elmer, juon ritōl an Doulul eo an Likao ro ilo Texas, USA, kar jeļā menin im kar leļo̧k n̄an likao ro raar tōl er juon tūreep in alooj an Scout kōn juon en̄jake eo eļap tokjen me emaron̄ kar jipan̄ kōpooj er n̄an ilju im jekļaj.

Brother Elmer eaar jar im kejōkļo̧kjeņ kōn ta eo emaron̄ kwaļo̧k im kar en̄jake n̄an kōnono jān ennaan eo an Elder Neil L. Andersen jen Doulul eo an Jon̄oulruo Rijilōk ro. Ilo tūreep eo, Brother Elmer eaar katakin jen ennaan eo, ekoba bwebwenato eo Elder Andersen eaar kwaļo̧k kōn Sidney Going, juon m̧ōkade rugby in New Zealand eo eaar kabōjrak jidik an ikkure n̄an jerbale juon mijen. “Ami mijen enaaj erom juon iien ekwojarjar n̄an bōktok ro jet n̄an Kraist im jipan̄ kōppopo n̄an Itok eo Kein Karuo an Rilo̧mo̧o̧r eo, “Elder Andersen eaar ba.”¹

En̄jake eo eaar lukkuun kajoor, Brother Elmer eaar ba, kōnke eaar katakin jen naan ko an juon rikanaan emour. Ilo jem̧ļo̧kin nokon in jota eo, aolepān likao ro im ritōl ro raar likūt etaer ioon bo̧o̧l in rugby ko āinwōt juon kalim̧m̧ur n̄an jerbale mijen ko im āinwōt juon kakeememej kōn ta eo raar katak kake im en̄jake. Elōn̄ iaan ro jemān im ritōl ro raar pād ilo bon̄ōn̄ eo kōnono ippān likao ro ekōjkan an mijen ko aer jelōt mour ko aer.

“Anij eo ad ej ad make; Ejeļā kōn jodikdik ro Nejin,” Brother Elmer eaar ba. “Ej ļōmņak kōn mour ko aer im idajon̄jon̄ ko im kōn ta eo ej waļo̧k ippān ajri rein. Kwoj jamin jeļā ekōjkan An jerbal ilo mour ko aer. Kōn menin kōj āinwōt ritōl ro aikuj pojak im kwaļo̧k mejatoto eo n̄an er n̄an en̄jake Jetōb. Kom maron̄ kōm̧m̧ane menin jen jeje ko rekwojarjar im jen naan ko an rikanaan ro, bōtaab ej Rilo̧mo̧o̧r eo, ejjab kōj, eo ej jerbal ilo būruweer.”

Jokkin wōt Juon

Brother Elmer eaar ba ekōņaan bwe likao ro ren keememej jet men kōn tūreep eo: aer katak kōn ko̧jpeļ eo eaar jokkin wōt juon.

“Iaar en̄jake bwe m̧ōttan eddo eo aō eaar n̄an leļo̧k n̄an er jeļā ko n̄an en̄jake Jetōb, im eļan̄n̄e Ij kōņaan bwe en bōk jikin, Ij aikuj kōm̧m̧ane ijo kuņaaō n̄an pepe kake,” eaar ba. “Elder David A. Bednar eaar katakin kōn ejaaki jon̄ok ko ilo jetōb ilo mour ko ad, jon̄ok ko āinwōt ekkatak ko rekwojarjar im jar im nokon in jota eo an baam̧le.² Im ilo ad kar jako wiik eo ļo̧k, jej dāpij jon̄ok ko an jetōb ko ad. Kōm kar jar āinwōt juon kumi. Kōm kar kālōt likao ro n̄an kōjeikiik nokon in jota eo ium̧win 10 minit ilo jibbon̄, im ritōl ro aer im ro jemān raar kōpooj nokon ko n̄an joten eo.

“Kōttōpar eo eaar bwe jekdoon n̄e kōm kar ettoļo̧k jen m̧oko im m̧akūtkūt ko am raar oktak jen aer kijon̄ kōm̧m̧an, wāween jetōb ko am kar jab kakkuri. Likao ro remaron̄ ak remaron̄ jab keememej kajjojo katak ko, ak Ij kōtmāne bwe renaaj keememej wāween ko kōm kar dāpij an wōr nokon in jota ko im jar im katak jeje ko rekwojarjar.”

Myra Bocobo Garcia jen Philippines eaar barāinwōt jeļā aorōk in jokkin wōt juon, im eaar jeļā bwe katakin ej ijjino ilo m̧oko. Sister Garcia im leo pāleen, Edwin, ewōr jilu nejier ļaddik im jiljilino leddik jen 8 iiō n̄an 22, kajjojo iaer rej bōk koņaer ilo jabdewōt m̧akūtkūt ko rem̧m̧an. Ilo tōre eo me emaron̄ meļeļe elōn̄ armej rej bōk koņaer ilo m̧akūtkūt ko roktak, ilo jikin ko reoktak, baam̧le eo ej katakin n̄an an jokkin wōt juon aer kōjota ippān doon.

“Kōmat im m̧ōņōņō in kōpooj m̧ōn̄ā ko im m̧ōn̄ā ippān doon ej juon iaan wāween ko rem̧m̧antata kōm̧ij kakobaiktok ajri ro nejim,” Sister Garcia eaar ba. Eaar kile bwe iien m̧ōn̄ā ej juon iien n̄an kōkāāl, jem̧doon eo ippān ro jet, im kile kōjeram̧m̧an ko an Irooj.

Em̧m̧akūt n̄an Iien ko Rem̧m̧an Rej Waļo̧k n̄an Katakin im Ron̄jake.

Jocelyn Fielden jen Nova Scotia, Canada, ej ba bwe katak ko relukkuun aorōk eaar katak jen an kar karūttoļo̧k jiljiljino ajri ro, ro kiiō rej ikōtaan iiō kaņe 20 n̄an 30, kar kōm̧m̧an jab wōt kōn kōm̧m̧ani ekkatak ko ak barāinwōt kōn “ejaake juon mejatoto ijo ajri ro remaron̄ ekkatak kōn m̧ool ko kōn ermake.”

“Jab m̧ōkaj n̄an kōm̧m̧ane aolepān kālōt ko aer ak uwaake aolepān kajjitōk ko aer,” ej ba. Ijjelo̧kin, eaar rielo̧k ilo tōl ajri ro “n̄an jeje ko rekwojarjar ak ko̧o̧njeļe er jen rikanaan eo n̄an tōl im uwaak.” Ej kakkobaba, “Im n̄an pojak n̄an kōnono kōn elolo ko aer.” Ilo kakkobaba, ke eaar bōk kajjitōk ko jen ajri ro nejin, e jet iien ej uwaak kōn kajjitōk juon kajjitōk an make: “Ta eo kwoj ļōmņak kwoj aikuj kōm̧m̧ane?”

“Ewōr ke lōke bwe renaaj kōm̧m̧ane kālōt ko rejim̧we,” ej ba. “Eļan̄n̄e jej jipan̄ ajri ro nejid katak n̄an kile Jetōb ilo mour ko aer ilo tōre in ekkatak ko aer rellōn̄ jej kōm̧m̧ani aolep raan ippāer im eļan̄n̄e rejeļā ekōjkan an Jetōb en̄jake, enaaj erom juon kein bōbrae n̄an er n̄an pukōt elōn̄ļo̧k en̄jake ko an jetōb, kōkajoorļo̧k naan in kam̧ool ko aer kōn lukkuun m̧ool an Jemedwōj Ilan̄ im Nejin, Jisōs Kraist. Ej kwaļo̧k juon jelōt: eļan̄n̄e eļapļo̧k aer en̄jake meram eo im kaenōm̧m̧an eo Jetōb ej boktok, eļapļo̧k aer naaj ikdelel kake im niknik n̄an kōm̧m̧ane men ko renaaj kōm̧m̧an bwe Jetōb en ļapļo̧k an eddōk ilo mour ko aer.

Em̧ōkaj an kwaļo̧k bwe pedped ko me em̧ōj aer kar wājepdik ilo mour an baam̧le n̄an e rej ko me ritōl ro an Kabun̄ in em̧ōj aer kar āliji aer katakin kake. N̄an waanjon̄ak, ej ba ta eo ilo an jet katak maron̄ waļo̧k ilo iien ekōnono ko jeļā ekkā aer kōm̧m̧an āinwōt ko me rej waļo̧k ilo nokon in jota eo an baam̧le, ekkatak jeje ko rekwojarjar, im jar an baam̧le, ro jinen im jemān remaron̄ tōl jān Jetōb n̄an lali iien katakin ko.³

“Ilo̧k in etetal, jipadekļo̧k m̧akūtkūt ko, juut bo̧o̧ļ [ikkure pāājkōtbo̧o̧ļ], kōm̧m̧an iien m̧ōn̄ā ko an baam̧le, jerbal ippān doon, al, im jerbal n̄an ro jet rej jet iaan m̧akūtkūt ko ijo ko̧jpeļ eo ej katakin ej bōk jikin ilo baam̧le eo am,” ej ba. “Kōnono kōn unin ekōnono ko an ko̧jpeļ eo ekkā an waļo̧k n̄e jej kobaikļo̧k ilo m̧akūtkūt ko an ro jet.”

Jerbal Ippān Doon N̄an Kōtōbrak Juon Kōttōpar Eļap

Ālkin kadiwōjļo̧k eo jān Brigham Young University–Hawaii, KaYan Danise Mok eaar jepļaak n̄an Hong Kong im bōk juon kūr āinwōt būreejtōn n̄an Doulul eo an Jiron̄ ro. Ilo tōre eo ej jino bar jineet e kapejuknen eo an, jino juon jerbal im wōnm̧aanļo̧k kōn katak ko eaar kadiwōjļo̧k jāni, eaar kōņaan jar kōn im̧we n̄an jipan̄ jiron̄ ro ej jerbal ippāer n̄an ejaake naan in kam̧ool ko n̄an kōpooj er n̄an ilju im jekļaj.

Juon Jabōt ilo tōre eo ej katakin kōn paoktok indeeo, Sister Mok eaar kile juon im̧we n̄an riiti Bok in Mormon eo ippān juon jiron̄, eo eaar e wōt ilo m̧ōn jar eo ilo tōre eo.

“Rikakpilōklōk eo aō im N̄a kar m̧ōkaj in uwaak kōn kōm̧m̧ane kōttōpar ko n̄an kadedeļo̧k Bok in Mormon āinwōt juon kumi ippān jiron̄ eo,” Sister Mok eaar ba. “Eaar bōke idajon̄jon̄ eo ilo an jab āliklik ke kom naaj kadedeikļo̧k kōttōpar eo ippān doon.”

Jen iien eo, Sister Mok, rikakpilōklōk eo an, im jiron̄ in raar ejaake juon “buddy system” ilo Facebook im via text message n̄an kakeememej doon kōn riit im kwaļo̧k n̄an doon ta eo rej ekkatak.

Sister Mok eaar bwe eaar lo juon kein kam̧ool an oktak in ekabwilōn̄lōn̄ ilo mour eo an jiron̄ im ejaaktok jen ekkatak jen jeje ko rekwojarjar. Im ilo an Sister Mok riiti jeje ko rekwojarjar aolep an tūreep ilo tūreen eo, Ej barāinwōt lo kōjeram̧m̧an n̄an e make. “Iaar barāinwōt en̄jake Jetōb im bōk uwaak in jar ko aō ilo Aō em̧m̧akūt n̄an bun̄m̧aanļo̧k ilo mour in,” eaar ba.

“Ilo en̄jake eo aō, jet jodikdik rej inepata im rejjab jeļā eļan̄n̄e remaron̄ bōk juon naan in kam̧ool im wōr aer imminene ko an jetōb āinwōt ro jet,” ej wōnm̧aanļo̧k wōt. “Jen jerbal ippān doon, kōm̧ij kam̧ool n̄an er ippān m̧akūtkūt eo am bwe menin em̧ool im bwe kōmij pād n̄an rie er ilo aolep jekjek.”