Ewi wāween Jo̧o̧r ilo Jikin Rikōjdat
Jān kōnono eo ilo kadiwōjļo̧k eo an kememe eo an jemnere kar kwaļo̧k ilo Jānwōde 22, 2012.
Jej kememe 100 iiō dettan jemenere ilo Kabun̄ in. Ij ļōmņak kōn bwebwenato eo eaar ijjino etto ke menin katakin ko n̄an būrookraam̧ in eaar lukkuun jabwe.
Jān jekjek ko m̧okta raar ettā, ippād kiiō ewōr 375,008 rijikuuļ in jemenere ilo kūlaaj ko ilo 143 laļ ko kōn jon̄an in 38,000 baļentier im rūkaki ro rej jerbal aolep raan ilo aolepān peļaakin laļ in. Jej leļo̧k eļap jāān ilo jodikdik ro ad. Kōm̧ jeļā aorōk eo ami im tokjen eo ami.
Māletlet Enaaj Jipan̄ Kom̧ Tariņaeik Rikōjdat eo
Ij kōnono āinwōt juon eo em̧ōj an lo tōre ko im naaj kōpooj kom̧ n̄an ilju im jekļaj.
Kom̧ij rūtto ļo̧k ilo jikin rikōjdat. N̄e kom̧ij jino ekkeke ilo jetōb, kom̧ naaj meļeļe wāween an rikapo eo naaj kar kijoone laļ eo ipeļaakūm̧. Ej pād ilo m̧oko, ilo kein kareleel ko, jikin alooj ko, kajin—men otemjej ipaļaakūmi. Ilo aolep jekjek ko, an pād eno̧jak.
Ikōņaan jiron̄ kom̧ bwe enaaj lukkuun ļap tokjen im lukkuun ļap ikdeleel. Jeje ko rekwojarjar rej ba, “Mālōtlōt ej men eo e aorōktata; innām kwōn bōk mālōtlōt,” im Inaaj kakkobaba,” ilo aolep men kwoj jibadeke, kwōn etal!]” (Jabōn Kōnnaan ko 4:7). Ejjeļo̧k aō iien n̄an jerwane im barāinwōt kom̧. Innām Ron̄jake!
Iien eo Iaar kālet n̄an erom juon rūkaki elukkuun kar alikkar ilo aō ļōmņak. Ilo Pata eo an Laļ in kein II, Iaar pād ilo iiō kein 20 im juon pailat ilo Air Force. Iaar pād ilo juon āne edik Ie Shima. Āne in, juon jikin edik, emake iaan kōn jon̄an āinwōt juon postage jitaam̧, ej pād wōt tūion̄ in lōn̄in Okinawa.
Make iaō ilo juon jotenin jōmar, Iaar jijet tōrerein ioon juon dōkā n̄an lale an al tūlo̧k. Iaar kejōkļo̧kjeņ kōn ta Inaaj kōm̧m̧ane kōn mour eo aō ālkin tariņae in, Eļan̄n̄e ebwe aō jeram̧m̧an n̄an mour. Ta eo Ikōņaan erom? Eaar ilo bon̄ōn eo ke Iaar kālōt bwe in juon rūkaki. Iaar kalikkar bwe rūkaki ro rej aolep iien ekkatak. Ekkatak ej juon jibadbad an mour.
Iaar m̧okta katakin jemenere ilo 1949 ilo Brigham City. Iaar baj juon rijikuuļ in jemenere ilo raan in high jikuuļ ko aō.
Ewōr jilu ko̧o̧j ko ekkā katakin ilo jemenere: Kalim̧m̧ur M̧okta, Kalim̧m̧ur Ekāāl, im Bwebwenato eo an Kabun̄ in. Eaar aō iien em̧m̧an n̄an kobaik juon kūlaaj in jibbon̄ tata kōn Bok in Mormon eo. Iaar ro̧o̧ltok jān tariņae kōn juon naan in kam̧ool kōn Bok in Mormon im juon meļeļe eo kōn wāween an Jetōb Kwojarjar jerbal.
Menin Letok eo an Jetōb Kwojarjar Enaaj Kōjparok Eok ilo Jikin Rikōjdat
Kom̧ kar ekkatak ilo aolepān mour ko ami kōn menin letok eo an Jetōb Kwojarjar, ak katakin emaron̄ in baj etal wōt. Kom̧ maron̄ im, ilo m̧ool, kom̧ maron̄ etal make iaami ilo iaļ in n̄an ami maron̄ lo kom̧ make kōn wāween an Jetōb Kwojarjar maron̄ in tōl im kōjparok ilo im̧we.
N̄an likao ro im jiron̄ ro, jerbal in ejjab oktak. Lo wāween an Jetōb Kwojarjar jerbal ilo mour eo am̧ ej juon jibadbad an mour. Eļan̄n̄e emōj am̧ lo jibadbad in n̄an kwe make, komaron̄ in mour ilo jikin rikōjdat im jab m̧oņ ak kakkure. Ejjeļo̧k membōr an Kabun̄ in—im meļeļein bwe ej kom̧ kajjojo—naaj jamin kōm̧m̧an juon bōd eļap ilo an ejjeļo̧k kakkōļ ej itok m̧okta jen im̧we ko an Jetōb Kwojarjar.
Jet iien n̄e kwoj kōm̧m̧an juon bōd, komaron̄ in kar ba tokālik, “Ijeļā In kar jab kōm̧m̧ane men eņ. Ejjab jim̧we,” ak bōlen, “Iaar jeļā In kar aikuj kōm̧m̧ane men eņ. Eaar jab wōr aō peran n̄an jerbale!” En̄jake kein rej jān Jetōb Kwojarjar ej kajjeon̄ in tōl eok m̧aanļo̧k n̄an men eo em̧m̧an ak kakkōļ eok jān jorrāān.
Elōn̄ jet men ko me kwoj jab aikuj in kōm̧m̧ani eļan̄n̄e iaļen kōnono ko rej jan̄in dedeļo̧k. Kwoj jab maron̄ in riab ak ankwōņak ak ko̧o̧t ak jerbal nana im jenōļ kein rekanōm̧kwoj eok jān jorrāān. Jab ilo̧k n̄an ijo me mejatoto eo ej jum̧ae ekōnono eo an jetōb.
Kwoj aikuj in ekkatak n̄an pukōt kajoor im tōl eo eppeļļo̧k n̄an eok, innām ļoor kooj eo jekdoon ta.
M̧okta ilo am̧ “n̄an kōm̧m̧an” laajrak eo, likūt naan eo jar. Aolep iien, jar ko ami renaaj ikōn̄. Komaron̄ ļōmņak kōn juon jar.
Komaron̄ iien otemjej bōk juon ļain in kōnono ippān Jemād ilo Lan̄. Jab kōtļo̧k an rikapo eo kapoik eok ļōmņak ejjeļo̧k en ej ron̄jake ilo jem̧ļo̧k eo bar juon. Jar ko am̧ rej ron̄jaki aolep iien. Kom̧ij Jab Make Ļo̧k Iaami!
Kōjparok Ānbwinnimi. Kom̧in erreo. “Kom̧ jab jeļā ke bwe kom̧ tempel an Anij, im Jetōb an Anij ej jokwe ilo kom̧?” (1 Korint 3:16).
Kanooj riiti kalim̧m̧ur ko loi ilo jekjōn 89 ilo Doctrine and Covenants. Naan in Mālōtlōt ejjab kalim̧m̧ur kōn juon ājmour ewāppen ak eke in jetōb ilo kwe maron̄ kōkajoor ļo̧k.
Kōttoļļo̧k jān eo̧ ko im men ko reinļo̧k wōt rej kakkure ānbwinnum̧. Ānbwinnūm̧ eaar kōm̧anm̧an ilo nememein wōt Anij.
Ko̧o̧njeļ eo an Rikanaan ej Katakin Ta eo Ej M̧ool
Ikōņaan kōnono kiiō ilo jon̄ok in kōnono eo ekajju kōn bar juon men.
Jejeļā bwe m̧aan im kōrā kar do̧o̧r ilo mour eo m̧okta.1 Jetōb im ānbwin eo rej an juon armej (lale D&C 88:15). Jekjek in an m̧aan im kōrā ej juon nūrbōktak eļap n̄an M̧aan ro jeid im jatid, barāinwōt aolep jekjek ko rerreo.
Jet iaami remaron̄ kar en̄jake ak kar ron̄ bwe kom̧ kar ļotak tok kōn en̄jake ko rejorrāān im bwe kom̧ij jab ellotaan eļan̄n̄e kom̧ij ioon kapo kein. Ilo katak jejeļā bwe eļan̄n̄e menin em̧ool anemkwoj in kālet eo ami enaaj kar jako, im menin eban kar waļo̧k. Aolep iien ewōr am̧ kālōt n̄an ļoor im̧we ko an Jetōb Kwojarjar im mour juon mour erreo im jim̧we, juon eo eobrak kōn wānōk.
Būreejtōn Gordon B. Hinckley eaar kōjjeļāik laajrak in ilo kweilo̧k eo eļap: “Armej rej kajjitōk kōn ijo jepād ie kōn ro rej kile er make… m̧aan n̄an m̧aan im kōrā n̄an kōrā. Uwaak eo aō ej bwe jej iakwe er āinwōt ļaddik ro im leddik ro nejin Anij. Emaron̄ wōr aer kōņaan ko jet me rekajoor im ko me remaron̄ in pen dāpiji. Enan̄in aolep armej ewōr aer [kapo ko] juon wōt kain ak oktak ilo elōn̄ iien. Eļan̄n̄e rej jamin m̧akūtkūt ioon kareel kein reoktakļōmāer, innām remaron̄ wōnm̧aanļo̧k wōt āinwōt bar membōr ro jet an Kabun̄ in. Eļan̄n̄e rej kakkure kien erreo im jon̄ok ko kōn erreo ko an Kabun̄ in, innām rej pād ilo iaļen kauwe an Kabun̄, ejjeļo̧k oktak jen ro jet.
“Jekōņaan jipan̄ … kōkajoorļo̧k er, n̄an jipan̄ er kōn inepata ko aer im n̄an jipan̄ er kōn men ko reppen ippāer. Bōtaab jejjab maron̄ jutak waan eļan̄n̄e rej kōtļo̧k er make ilo wāween ko rettoon an kanniōk, eļan̄n̄e rej kajjeon̄ dāpij im kōjparok im mour ilo jekjek in ņaetan em̧m̧aan n̄an em̧m̧aan ak kōrā n̄an kōrā ro rej pālele. N̄an kōtļo̧k menin enaaj āinwōt n̄an kadikļo̧k pedped eo elukkuun aorōk im kwojarjar an Anij kōn mālim an m̧are im lukkuun kōttōpar eo an, [ilo] kōjparok baam̧le [ko].”2
Būreejtōn Hinckley eaar kōnono n̄an Kabun̄ in.
Kōjerbal Anemkwoj in Kālet eo Am̧ n̄an Kōjparok ak Bar Bōk Jikin eo Ekōjparok
Menin Letok eo m̧okta me Adam im Eve raar bōke ekar anemkwoj in kālet: Kwon kālōt n̄an eok make, bwe em̧ōj lewaj n̄an eok (lale Moses 3:17).
Epād ippam̧ ejja anemkwoj in kālōt in wōt. Kōjerbal e ilo jim̧we n̄an kaarmejete kōņaan ko ejjeļo̧k tokjāer ak kapo ko rej jab kwojarjar ko remaron̄ itok ilo kōļmenļo̧kjeņ eo am̧. Jab etal n̄an ijo, im eļan̄n̄e kwopād kadede ijeņ, ro̧o̧l tok im diwōj jene. “Karmejete kom̧ make jān aolep men ko rejjab em̧m̧an” (Moronai 10:32).
Jab jerwani kajoor ko liwaji kōn mour ilo ānbwinnūm̧ make ak ippān membōr ro an jabdewōt jekjek. Menin ej jon̄ok eo an Kabun̄ in, im ej jamin naaj oktak. Ilo am̧ ekkekeļo̧k, ewōr juon kapo n̄an idajon̄jon̄ e ak wateļo̧k m̧akūtkūt ko rejjab erreo. Jab kōm̧m̧ane menin!
Kii naan eo ej kauwe—kauweik kōj make. Naan eo kauwe ej itok jen naan eo rikaļoorak rianōk. Erom̧ juon rikarejeran Rilo̧mo̧o̧r eo, im kwonaaj pād ilo kōjparok.
Juon ak ruo iaami maron̄ ļōmņak, “Emōj aō bōd ņae menin ak bōd in eļap. Erumij n̄an eō.” Menin ejjan̄in rum̧ij.
Emōj katakin eok ilo m̧weo im ilo jemenere kōn Pinmuur eo an Jisōs Kraist. Pinmuur eo ej āinwōt kein ejjeor. Emaron̄ in jeorļo̧k bōd im jabdewōt jekjek eo me ej kōm̧m̧an bwe kwon en̄jake am̧ bōd.
Bōd ej metak ilo jetōb. Jab en̄taan jān metak eban jem̧ļo̧k. Joļo̧ki. Jem̧ļo̧k jen e. Ukweļo̧k, im, eļan̄n̄e emenin aikuj, ukweļo̧k bar juon im bar juon im bar juon m̧āe kwoj—jab rikōjdat eo—rej peek eok.
Aenōm̧m̧an eo Ejjeļo̧k Jem̧ļo̧kin ej Itok jen Emmakijkij in Ukweļo̧k
Mour ej oktak ļo̧k n̄an an erom juon ikōtōltōl in apan̄ ko im bōd ko. Kobaikwaj “Ukweļo̧k” n̄an laajrak in men ko n̄an kōm̧m̧ani. Menin enaaj bōktok n̄an eok aenōm̧m̧an eo ejjeļo̧k jem̧ļo̧kin eo kwoj jab maron̄ wiak ilo jabdewōt wōņāān ko ilaļ. Meļeļe kōn Pinmuur eo emaron̄ in erom juon iaan m̧ool ko raorōk me kwomaron̄ ekkatak ilo am jodikdik.
Eļan̄n̄e kwoj iaio ippān armej ro rej leļaļ tak eok ijjelo̧kin kalōk eo, bōjrak im oktak jen kompani eo. Komaron̄ im make iaam im ajimakeke ilo jet iien. Kajjitōk eo eaorōk in emaron̄ bōlen kajjitōk kake, “N̄e kwoj make iaam, kwoj ke pād ilo kompani eo em̧m̧an.
Allo̧ke juon m̧wil enana kwoj kōtļo̧k an aujiidi eok im emaron̄ in lukkuun in pen. Bōtaab kajoor eo ej pād ilo kwe n̄an kōm̧m̧ane. Jab ebbweer. Rikanaan Joseph Smith eaar katakin “aolep armej ewōr ānbwinnier ewōr aer kajoor ioon ro ejjeļo̧k ānbwinnier.”3 Komaron̄ jum̧ae kapo!
Ejjab āinwōt n̄e enaaj wōr am̧ juon make en̄jake kōn rikōjdat eo; ejjab kwaļo̧k e make ilo wāween in. Bōtaab eļan̄n̄e eaar itok n̄an eok n̄an mālijjon̄ im kapoik eok, ewōr juon am̧ jipan̄. Komaron̄ kōjerbal anemkwoj in kālōt eo am̧, im enaaj ilo̧k jen eok.
Kōjerbal Aolep Iien ko Rem̧m̧an an Kōjeram̧m̧an eo an Jemenere
Kwoj jab āinjuon. Kwolukkuun aorōk. Kwom̧m̧an. Ekōjkan aō jeļā menin? Ijeļā bwe kōnke kwaar ļotak tok ilo juon iien im ilo juon jikin ijo ko̧jpeļ eo an Jisōs Kraist emaron̄ itok ilo mour eo am̧ jen katak ko im m̧akūtkūt ko m̧weo im̧ōm̧ im jen Kabun̄ eo an Jisōs Kraist im Armej ro Rekwojarjar ilo Raan-ko Āliktata. Āinwōt n̄e Irooj make eaar ba, kabun̄ eo dein m̧ool tata ilo aolepān laļ in (lale D&C 1:30).
Ewōr jet men ko jemaron̄ in kobaik ilo laajrak in, ak kojeļā ta eo eaikuj im jab aikuj in kōm̧m̧an ilo mour eo am̧. Kwojeļā jim̧we im bōd im jab aikuj kakien eok ilo men otemjeļo̧k.
Jab jerwaane iiō kein an jemenere. Bōk am̧ iien em̧m̧an kōn kōjeram̧m̧an eo kwaar iten ekkatak kōn katak ko an Kabun̄ in im katak ko an Rikanaan ro. Ekkatak men eo eļap tokjen. Enaaj kōjeram̧m̧an eok im ineem ilo elōn̄ epepen ko rej itok.
Ejjab lōn̄ iiō ko renaaj ellā m̧ae kwoj m̧are im wōr nejūm̧ ajri ro, juon m̧are eo enaaj liāp ilo tampeļ. Jar eo am̧ ej bwe kwonaaj lo eok make, ilo iien eo ekkar, pād ilo juon baam̧le ward ak branch.
Wōnm̧aanļo̧k kōn Kōjatdikdik im Tōmak
Kom̧in jab mijak ilju im jekļaj. Wōnm̧aanļo̧k kōn Kōjatdikdik im Tōmak Kememej menin letok in ekajoor an Jetōb Kwojarjar. Ekkatak bwe kwon maron̄ katak jen e. Ekkatak n̄an pukōt e. Ekkatak n̄an mour kake. Katak n̄an jar iien otemjej ilo etan Jisōs Kraist (lale 3 Nipai 18:19–20). Jetōb eo an Irooj enaaj pād ippam̧, im kwonaaj jeram̧m̧an.
Ewōr juon am tōmak em̧wiļal im ļap ilo kom̧.
Ij kwaļo̧k aō naan in kam̧ool n̄an kom̧—juon kam̧ool me eaar itok n̄an n̄a ilo aō kar jodikdik. Im kom̧ij jab oktak jān jabdewōt barāinwōt n̄a. Eļap jim̧we ko ami barāinwōt n̄an naan in kam̧ool in im kam̧ool āinwōt jabdewōt. Enaaj itok n̄an kom̧ eļan̄n̄e kwoj bōke. Ij lewaj kōjeram̧m̧an ko an Irooj ioomi—kōjeram̧m̧an ko an kam̧ool eo n̄an pād ilo mour ko ami, n̄an tōl kom̧ ilo ami kom̧m̧ane juon ilju im jekļaj elem̧ōņōņō.
Pija ko je Gary Henrie
Icon kōmeļeļe jen Scott Greer