Iaar Jar kōn Peran
Fy Tianarivelo, Madagascar
Jinō im jema rej membōr in Kabun̄ in, bōtaab rejjab lukkuun niknik. Menin jet iien ej tōl n̄an ļōkapokpok kōnke rej tōmak bwe iien ko an baamļe raikuj itok m̧okta jen men otemjej—m̧okta jen ilo̧k n̄an im̧ōn jar, kōm̧m̧ane kūr ko an Kabun̄ in, ak kōm̧m̧ane m̧akūtkūt ko jet.
Kōnke N̄aij juon ritōl ilo Būraimere im membōr an ward choir, kweilo̧k ko aō ilo Kabun̄ in jet iien rej idaptōk ippān jerbal ko an baam̧le. Juon raan ke Iaar pojak n̄an pād ilo juon kweilo̧k eļap kadiwōjtok ilo mejatoto ilo im̧ōn kweilo̧k eo am ilo Antananarivo, jinō im jema raar kememej eō bwe ewōr am rilotok.
“Kwonaaj aikuj kālōt ikōtaan baam̧le eo am̧ im Kabun̄ in,” jinō eaar jiron̄ tok eō. “Kwoj pād ijin ippām im jab pād ilo kweilo̧k eo eļap, ak kwoj ilo̧k n̄an kweilo̧k eo eļap im jelm̧ae kaje.”
Iaar ļōmņak ijjab aikuj akweel ippān jinō. Ijjelo̧kin, Iaar pukōt juon iien n̄an kajjitōk ippān Jemedwōj Ilan̄ n̄an letok n̄an eō peran im kajoor. Iaar barāinwōt kajjitōk Ippān n̄an jipan̄ eō jeļā ta in kōm̧m̧ane. Ij pād wōt m̧weo ippān baam̧le eo ak ilo̧k n̄an im̧ōn jar eo im ron̄jake ainikien rikanaan eo?
Ke ej dedeļo̧k Aō jar, Iaar maron̄ en̄jake Jetōb Kwojarjar. Imaron̄ en̄jake an Jetōb kōperan eō n̄an jiron̄ jinō jon̄an an aorōk n̄an eō n̄an ilo̧k im ron̄jake rikanaan eo. Ikar en̄jake bwe Ij aikuj jiron̄e bwe Inaaj bōk kapilōk ko remālōtlōt ejjab wōt n̄an mour eo aō rainin ak barāinwōt n̄an ilju im jekļaj eo aō.
Anij emaron̄ kōm̧m̧ane men ko rekabwilōn̄lōn̄, im Eaar kōkm̧anm̧an ļo̧k būruwōn jinō im jema bwe ren maron̄ kōtļo̧k eō n̄an etal n̄an kweilo̧k eo eļap ilo ejjeļo̧k kaje. Ekar juon en̄jake ekabwilōn̄lōn̄ ilo mour eo aō. Eaar kapen n̄an eō m̧ool eo jeje ko rekwojarjar rej ba, “Im jen kajoor eo an Jetōb Kwojarjar kom̧ maron̄ jeļā m̧ool eo an men ko otemjeļo̧k” (Moronai 10:5).
Ijeļā bwe n̄e jej pedped kōn jerbal ko ad ioon katak ko an ko̧jpeļ im ron̄jake Jetōb, jemaron̄ iien otemjej m̧ōņōņō kōn jokālōt ko ad. En̄jake in eaar kōkajoorļo̧k naan in kam̧ool eo aō bwe Anij epād ijo n̄an kōj im bwe Jetōb Kwojarjar ej jipan̄ kōj ilo mour ko ad.