Iaikuj ke Kālōt Jerbal ak Kabun̄?
Kenya Ishii, Japan
Kōrā eo pāleeō im N̄a kar m̧are ilo 1981 ilo Tokyo Japan Tam̧peļ eo. Mour eo am ālkin m̧are ekar jab pidodo jinoin. Iaar m̧ōņōņō n̄an wōr juon jerbal, akō ewōr wōt am apan̄ n̄an jeļā kōjparok jāān. Kōm kar kajjitōk ippān Jemedwōj Ilan̄ kōn jipan̄ eo An im kōm̧m̧ane ijo kōm maron̄ e n̄an kabwe aikuj ko im kōļļā juon m̧ōttan jon̄oul. Kōm jeļā bwe eļan̄n̄e jej lōke Irooj, Enaaj kakke n̄an kōj.
Juon wiik kōrā eo pāleeō im eo m̧ōtta jim̧or kar wiaiktok n̄an eō ejja nuuj peba eo edik. Ekar juon kareelel n̄an juon rūkaki in Kajin Pālle.
Iaar jilkinļo̧k resume (peba in kam̧ool) eo aō n̄an kom̧pani eo im kar kajjitōk n̄an bar roolļo̧k n̄an juon intōrpiu. Ilo jem̧ļo̧kin intōrpiu eo, ri intōrpiu eo eaar ba, “Kwaar jeik ilo resume eo am̧ bwe kwaar bōk kuņaam ilo jerbal āinwōt juon mijenede n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata Meļeļein bwe kwoj ilo̧k n̄an im̧ōn jar ilo raan in Jabōt ko, kwoj ke? Eļan̄n̄e kaikuj kejokļo̧kjeņ kwoj ilo̧k n̄an im̧ōn jar eo ke ak n̄an jikin jerbal ilo Raan in Jabōt ko, ta eo kwonaaj kar kālōte?”
Ekar juon kajjitōk eo epen kōnke Iaar lukkuun kōņaan juon jerbal em̧m̧an. Bōtaab ālkin kōlmenļo̧kjeņ, Iaar uwaak, “Inaaj ilo̧k n̄an im̧ōn jar.”
Kōn juon ettōn̄dikdik, riintōrpiu eo eaar ba, “O, Ij lo.” Innām eaar jilkinļo̧k eō kōn juon kalim̧m̧ur bwe kom̧pani eo enaaj kōm̧m̧ane juon karōk joteen eo im bwe Iaikuj kooļ im lale ta tōprak eo. Ke Ij ilo̧k jen ruum̧ eo, Iaar ļōmņak bwe Ikar likjab.
Tokālik joteen eo ke kūr eo eaar itok, Iaar kūrļo̧k nōm̧ba eo an jikin jerbal eo kōn juon mijak eļap.
“Ta tōprak in intōrpiu eo?” Iaar kajjitōk ippān rijeje eo. “Iaar likjab, ijab ke?”
Eaar ļo̧kjenaō bōtaab m̧ōņōņō ippān kōn uwaak eo.
“Kōm kōņaan kajjitōk ippam n̄an jerbal n̄an kōm,” eaar ba.
Enan̄in juon allōn̄ tokālik Iaar jeļā etke Iaar bōk jerbal eo. Rijeje eo eaar kōmeļeļeik bwe riintōrpiu eo eaar jokwe iturin mijenede ro rej jerbal aolepān raan an rej Armej ro Rekwojarjar ilo Raan-ko Āliktata. Emmakijkij an kijon̄ lale an mijenede ro baajkōļ n̄an kōm̧m̧ane jerbal ko aer ilo jibbon̄.
“Eaar tōmak bwe kwe, m̧ōttan ejja kabun̄ eo wōt, maron̄ jerbal n̄an kom̧ āinwōt mijenede ro rej jerbal n̄an kabun̄ eo aer,”eaar ba. “Kwoj jeram̧m̧an!”
Jen iien eo baam̧le eo am iien otemjej ewōr ippām ta eo kōmij aikuji.
Jabdewōt iien n̄e Ij ļōmņak kōn kālōt in, Ij ketak im inem̧m̧aan. Ijeļā bwe Anij jet iien ej kōjerbal jet armej n̄an kōjeram̧m̧an ajri ro Nejin. Ijjab maron̄ kwaļo̧k jon̄an kam̧m̧olol eo Iaar en̄jake n̄an kōrā eo pāleeō im eo m̧ōtta kōn im̧we eo aer n̄an boktok nuuj peba eo n̄an eō, n̄an mijenede ro rej kate er jerbal im waanjon̄ak ko rem̧m̧an, im n̄an Jemedwōj Ilan̄ eo ej tiriamo, iakwe im kea, eo ewōr an kajoor ekabwilōn̄lōn̄ n̄an kwaļo̧k en̄jake ko ad kōn ad em̧m̧an.