Karreoik Kōļanta eo Ad n̄an Kweilo̧k eo Eļap
Kōnke ad iien en jab idabtōk ippān bar jet m̧akūtkūt ko, jemaron̄ en̄jake Jetōb eo eļapļo̧k ilo ad ron̄jake kweilo̧k eo eļap.
Iiō ko ļo̧k, ke ajri ro nejūm̧ jiljino raar iddik, kōm̧ ar pepe bwe kōm̧ kōņaan kōm̧m̧an bwe kweilo̧k eo eļap en lapļo̧k an wōrtokjen n̄an kōm̧. Kōm̧ kar kōnono kōn ewi jon̄an aorōk in n̄an alooje kweilo̧k eo eļap kōn ļōmņak ko remļak im ānbwin ko raam̧ņak. Kweilo̧k eo eļap ej juon iien eaorōk n̄an bōk katakin jān rikanaan ro ad remour. Kōn menin kōm̧ ar kōm̧m̧ane juon kōttōbar n̄an jab peek bar jabdewōt men ium̧win jejjo raan m̧okta jen kweilo̧k eo eļap ak ilo jem̧ļo̧kin wiik eo ilo kweilo̧k eo eļap. Kōm̧ ar kiil kajjojo raan ilo kōļanta eo am̧, im kajjojo iaam̧ eaar kalim̧m̧ur n̄an jab jikejuuļi bar jet m̧akūtkūt ilo raan ko.
Eļan̄n̄e kwoj kālet n̄an bōk ejja jibadbad in wōt, enaaj aorōk n̄an baam̧le eo am̧ im jekjek eo an baam̧le eo am̧, ak baam̧le eo am̧ raar kōmeļeļeik “bar m̧akūtkūt ko jet” āinwōt etal n̄an m̧akūtkūt ko an jikuuļ, kōm̧m̧an bwe ajri ro ren itok, kōm̧m̧ani men ko ippān ro m̧ōttad etoļo̧k jen m̧weo, kōm̧m̧an bade ko ak kōjota ko ippān ro m̧ōttad ak ro nukid, kōm̧m̧an būrojāāk ko ak jerbal eo tōrerein m̧weo ikōtaan ak ilo session ko an kweilo̧k eo eļap, kakoņ būrojāāk ko an jikuuļ m̧ae minit eo āliktata, bōk bar ijjitōn̄ ko jet ilo jerbal.
N̄e wiik eo m̧okta jen kweilo̧k eo eļap ej itok, jet iien eaar pen n̄an ba jaab n̄an m̧akūtkūt kein, ak enan̄in aolep iien membōr ro an baam̧le eo am̧ raar m̧ōņōņō im kar kālet jokālet ko rejim̧we n̄an tōpar kōttōbar eo am̧. Kōm̧ ar lo bwe ajri ro nejūm̧ reddik raar kōņaan erom m̧ōttan kweilo̧k eo eļap. Iaar ļōmņak men eo eaar ekkar kōnke kōm̧ ar bar kōnono im bar kōnono kōn aorōk eo an kweilo̧k eo eļap wiik eo m̧okta.
Ij m̧ōņōņō in ripoot e bwe kōjparok jikejuuļ eo ad epidodo ilo raan ko m̧okta im ilo kweilo̧k eo eļap eaar lukkuun ukōt en̄jake eo an baam̧le eo am̧. Būruwōm̧ im ļōmņak ko am̧ raar pojak n̄an kweilo̧k eo eļap. Am̧ iien eaar jab idabtōk ippān bar m̧akūtkūt ko jet, kōn menin kōm̧ ar maron̄ en̄jake Jetōb eo ilo am̧ jijōt im ron̄jake naan in kapilōk ko jān ritōl ro ad.
Kōm̧ ar aikuj in dāpij kōttōbar in kweilo̧k eo am̧ ālkin kweilo̧k eo eļap kōnke ej kobrak m̧weo im̧ōm̧ kōn aenōm̧m̧an. Men̄e jet iaan ajri ro nejūm̧ ejako aer jokwe ilo m̧weo im̧ōm̧, kōm̧ij rōjan̄ er n̄an pād wōt karreoik kōļanta eo aer jejjo raan ko m̧okta im ilo iien kweilo̧k eo eļap, āinwōt kōm̧ ar kōm̧m̧ane ilo m̧weo im̧ōm̧. Kōm̧ij barāinwōt kajjieon̄ in jikejuuļi juon iien n̄an alooje juon m̧wen̄an an kweilo̧k eo eļap ippān doon āinwōt juon baam̧le elikio. Ij kōjatdikdik bwe ilo an ajri ro nejūm̧ m̧are im wōr nejier make ajri ro, renaaj wōnm̧aanļo̧k im kōm̧m̧ane juon men eaorōk ilo kōjparok en̄jake in kweilo̧k eo eļap aer ilo aer karreoik kōļanta ko aer.
Pija jen Sarah Jenson