Mour ko Rem̧m̧an Kar Keememeji

Newel K. Whitney (1795–1850)

Newel Kimball Whitney eaar ļotak ilo Vermont, USA, ilo Pāpode 5, 1795. Eaar juon em̧m̧aan in pejneej eo ekapeel im eaar ejaake juon jemjera in pejneej ippān Sidney Gilbert. Ilo raan in pejneej ko aer; eaar emakijkij aer ito-itak. Ilo juon iaan tūreep in pejneej ko aer, Newel eaar ioon Elizabeth Ann Smith ilo Kirtland, Ohio. Newel im Ann raar m̧ōttaik doon ium̧win jilu iiō ko im tokālik raar m̧are ilo 1823.

Newel im Ann raar pukot m̧ool eo im, ilo juon tōre, raar bōk kuņaer ilo em̧m̧akūt eo an Campbellite, eo kar kalikar n̄an an kōjepļaaktok mour in Kūrijin eo etto. Juon bon̄ Newel im Ann raar jar “n̄an jeļā jān Irooj ekōjkan [aer] maron̄ bōk menin letok eo an Jetōb Kwojarjar.” Ann eaar kōmeļeļeik m̧adenļo̧k eo raar bōke ilo uwaak in jar eo aer: “Jetōb eaar jo̧k ioom̧ im juon kōdo̧ eaar kalōr m̧weo. … Innām kōm̧ eaar ron̄ juon aenikien jān kōdo̧ eo, eaar ba: ‘Pojak n̄an bōk naan eo an Irooj, bwe ej itok wōt.’”¹

Ālkin jidik iien n̄an uwaak in jar in, ilo Oktoba 1830, Mijenede ro rej Armej ro Rekwojarjar ilo Raan-ko Āliktata raar itok n̄an Kirtland. Ilo Nobōm̧ba, Newel im Ann raar peptaij. Jet wōt allōn̄ tokālik, Joseph im Emma Smith raar kōļļaļļaļ ilo kōjem eo an Whitney. Ke Joseph eaar iakiakweik Newel ilo an ba etan, Newel eaar jab jeļā etan Rikanaan eo, kōn menin Joseph eaar ba, “N̄a Joseph Rikanaan eo; kwaar jar bwe in pād ijin, kiiō ta eo kokōņaan jen eō”² Innam Whitney ro raar leļo̧k m̧weo n̄an Smith ro kōn jet wiik im kar leļo̧k juon em̧ n̄an er ilo Jeptōm̧ba 1832.

Ilo kakkobaba n̄an leļo̧k juon jikin n̄an an Smith ro pād, Newel eaar barāinwōt leļo̧k n̄an Kabun̄ eo n̄an kōjerbal ijo tulōn̄ ilo im̧ōn wia eo an. Ilo im̧ōn wia eo an Whitney, ritōl ro an Kabun̄ in raar kōm̧m̧ani kweiļo̧k ko im Jikuul eo an Rikanaan ro.

Ilo Tijemba 1831, Newel eaar kūr āinwōt bisop eo kein karuo an Kabun̄ in im tokālik eaar jerbal āinwōt juon menija in lale jāān ko an Kabun̄ in, jipan̄ Kabun̄ in kōjparok jāān ko im jab kōm̧m̧an m̧uri. Ilo fall eo ilo 1838, Whitney eaar em̧m̧akūt n̄an Far West, Missouri, Ijo Newel eaar bar kūr āinwōt bisop, im 10 iiō tokālik, e im baam̧le eo an raar em̧m̧akūt n̄an Salt Lake City, ijo eaar jerbal āinwōt Bisop eo Eutiej an Kabun̄ in.

Newel eaar mej ilo Jeptōm̧ba 24, 1850, ilo Salt Lake City kōn nan̄inmej in menono.

Kakememej ko

1. Elizabeth Ann Whitney, kar kouti ilo Edward Tullidge, The Women of Mormondom (1877), 41–42.

2. Joseph Smith, kar kouti ilo Elizabeth Ann Whitney, “A Leaf from an Autobiography,” Woman’s Exponent, Aug. 15, 1878, 51.

Itulaļ, pija eo tuanmiin̄: Juon pija in Newel K. Whitney. Itulaļ, pija eo tuanbwijmaron̄: Itulōn̄ in m̧ōn wia eo an Newel K. Whitney, Ohio, ijo Jikuul eo an Rikanaan ro im kweilo̧k ko an Kabun̄ in raar kōm̧m̧an ie. Itulaļ: M̧ōn wia eo an Whitney.