Jerbal ilo Kabun̄ eo
Uwaak ko ilo Jabōt Jikuuļ
Ewōr juon aō ikdelel n̄an pukōt uwaak ko reļļap n̄an apan̄ ko aō—n̄an kajjitōk ippān Irooj n̄an jipan̄ eō pukōt juon men eo me enaaj kajim̧we men otemjej. Iaar ekkatak bwe kain kepaak in emaron̄ pukwōjļo̧k men otemjej jen jon̄an eo raar jab aikuj in kar.
Ke Iaar katakin kūlaaj in Gospel Doctrine eo ilo ward eo aō, Iaar kile bwe kajjitōk ko reļļap me renaaj aikuj kōļmenļo̧kjeņ im uwaak ko reļļap, relo̧ļe. Ilo naan ko jet, Iaar kōņaan in kowaan juon bwebwenato emo̧r an ejja “uwaak ko ilo Jabōt Jikuuļ eo” eo me membōr ro an ward eo rej letok kajjojo wiik.
Ke Ij ālekļo̧k n̄an Kalim̧m̧ur M̧okta ilo kōppopo, Iaar lukkuun im̧we jen wāween kōjerbal naan eo pād, eo ej waļo̧k im bar waļo̧k. N̄an waanjon̄ak, Jon 15:10 ej ba, “Eļan̄n̄e kom̧ij kōjparok kien ko Aō, kom̧ naaj pād ilo Aō yokwe; im āinwōt Iar kōjparok kien ko an Jema, im Ij pād ilo An yokwe” (kakkobaba eo kar kobaik).
Ilo Jar in Kajjitōk eo An eļap, Rilo̧mo̧o̧r eo ej jar bwe Rikaļoor ro An “bwe er otemjej ren juon; āinwōt kwe, Jema, ilo N̄a, im N̄a ilo Kwe, bwe er barāinwōt ren ilo Kōj” im “ren ilo Kōj, kwe ilo n̄a, bwe ren weeppānļo̧k ilo juon” (Jon 17:21, 23).
Ļaptata in ta eo Iaar pukōt e bwe eaar kōjkan Aō maron̄ juon ippān Irooj, ekōjkan Aō maron̄ pād ilo iakwe eo An, im ekōjkan, āinwōt juon uwaak, Imaron̄ ejaak eļapļo̧k kijenmej—kijenmej eo Ilukkuun aikuji n̄an ukōt en̄jake ko aō jān jet ko me rej kam̧ōk eō n̄an jet ko me rej kajoor ko rekāāl im rej ko̧kwojarjar eō.
Ilo juon wāween āinjuon, ilo Aō pukōt jim̧or juon meļeļe an naan eo pād im uwaak ko n̄an apan̄ ko reppen Ij jelm̧ae aolep iien, kar tōl likļo̧k n̄a n̄an uwaak ko rejim̧we ilo Jabōt Jikuuļ Iaar kajjieon̄ in kōwaani. Iaar lo uwaak ko n̄an apan̄ ko aō jen riiti eoon ko, jar aolep iien, jerbal n̄an baam̧le eo im ro jet, im etal n̄an tampeļ eo im kweilo̧k ko an Jabōt. Iaar ekkatak bwe men kein relam̧ waan rej kōm̧m̧an oktak ikōttaan niknik im m̧ōņōņō ilo niknik im kōn kijenmej.
Uwaak ko ilo Jabōt Jikuuļ rej lukkuun uwaak ko rem̧m̧an.