Holoki ‘o e Ta‘u Motu‘a ‘oku Fie ma‘u ki he Ngāue Fakafaifekaú
Na‘e fakahā ‘e Palesiteni Tōmasi S. Monisoni ‘i he fakaava ‘o e Konifelenisi Lahi Fakavaeuata‘u Hono 182, ‘e kamata leva, ‘a e lava ke ngāue fakafaifekau ‘a e kau talavoú ‘i honau ta‘u 18, pea ta‘u 19 ‘a e kau finemuí.
Na‘e fakamamafa‘i ki mui ‘e ‘Eletā Lāsolo M. Nalesoni ‘o e Kōlomu ‘o e Kau ‘Aposetolo ‘e Toko Hongofulu Mā Uá ‘i ha fakataha mo e kau faiongoongó, ‘o ne pehē ko e liliu ko ‘ení ko ha me‘a pē ke fili ki ai: “‘Oku ‘ikai totonu ke kamata ‘e he kau talavoú mo e kau finemuí ‘a ‘enau ngāue fakafaifekaú kapau ‘oku ‘ikai te nau mateuteu fakalaumālie mo fakatu‘asino.” ‘E kei hoko pē e mahuʻinga ke fakakaukauʻi lelei e ngaahi meʻa hangē ko e akó, tūkunga fāmilí, mo e mo‘ui leleí ‘i hono fakapapau‘i ‘o e taimi ki he ngāue fakafaifekaú.
Na‘e fakamatala‘i ‘e ‘Eletā Sefilī R. Hōlani ‘o e Kōlomu ‘o e Kau ‘Aposetolo ‘e Toko Hongofulu Mā Uá, ‘e lava ke ke fakaongoongolelei‘i mai ‘e he pīsopé mo e palesiteni fakasiteiki ‘a e kau teuteu ngāue fakafaifekau taimi kakato ‘i ha ‘aho ‘e 120 ki muʻa pea toki hoko honau ta‘u 18 pe ko e ‘aho te nau ‘atā ke kamata ngāué. ʻOku ‘atā ke hū ‘a e kau talavoú ki he senitā akoʻanga fakafaifekaú (MTC) hili ‘enau ‘osi mei he akoʻanga mā‘olungá pe ha tu‘unga tatau mo ia, pea ‘osi hoko honau ta‘u 18. ‘Oku ‘atā ke hū ‘a e kau finemuí hili ‘a e hoko honau ta‘u 19.
‘Oku kole atu ki he kau teuteu ngāue fakafaifekaú ke toe fakalahi ange ‘enau teuteu ki he ngāue fakafaifekaú ki mu‘a pea nau toki hū ki he MTC.
Na‘e pehē ‘e ‘Eletā Hōlani, “‘Oku fakavave‘i ‘e he ‘Otuá ‘a Ene ngāué. Pea ‘okú Ne fie ma‘u ha kau faifekau tokolahi ange ‘oku nau fie ngāue mo fe‘unga ke fakamafola ‘a e māmá mo e mo‘oní mo e amanaki leleí pea mo e fakamo‘ui ‘o e ongoongolelei ‘o Sīsū Kalaisí ki ha māmani ‘oku faʻa fakapo‘uli mo fakamanavahē.”
Na‘e pehē ‘e ‘Eletā Hōlani, ‘oku ʻi ai ha ‘amanaki ‘e fokotu‘u mo ha ngaahi misiona fo‘ou.
‘Oku ai ha ‘amanaki ‘e fakanounou‘i ‘a e taimi ‘o e kau faifekau kotoa pē ‘i he MTC ‘aki ha vahe tolu ‘e taha ke feau ‘a e ‘amanaki ki he tokolahi ange ‘o e kau faifekau mo e ngaahi misiona ‘i he māmaní. Na‘e toki kamata fakahoko ha kalasi ako uike ‘e 12 i he malaʻe ngāue fakafaifekaú ke tokoni ki hono teuteu‘i lahi ange ‘o e kau faifekaú.
‘Oku ‘atā ke kamata ngāue fakafaifekau he taimí ni ‘a e kau talavoú mo e kau finemuí ‘i honau ta‘u 18 mo e 19, ‘o makatu‘unga ‘i honau ngaahi tūkunga fakafoʻituituí mo hano fakapapau‘i ‘e he kau taki lakanga fakataula‘eiki fakalotofonuá.
© 2004 IRI.