Fanongonongo ‘e he Siasí ‘a e Ngaahi Nāunau Fakalēsoni Fo‘ou Ma‘á e To‘u Tupú ki he 2013
Naʻe fanongonongo ʻe he Siasí ha nāunau fakalēsoni fo‘ou—Ha‘u ʻo Muimui ‘Iate Au: Ma‘u‘anga Tokoni Fakaako ʻa e To‘u Tupú—maʻá e ngaahi kōlomu ‘o e Lakanga Taula‘eiki Faka-‘Ēloné, Kau Finemuí, mo e ngaahi kalasi Lautohi Faka-Sāpate ‘a e to‘u tupú ki he 2013.
Ko e taha ‘o e ngaahi tefito‘i taumu‘a ‘o e Ha‘u ʻo Muimui ‘Iate Aú ke tokoni‘i ‘a e kau faiako—‘i he Siasí pea ‘i ‘api—ke nau faiako ‘o hangē ko e faiako ‘a e Fakamo‘uí, ‘o ngaohi ‘a e ngaahi lēsoní ke hangē ha ngaahi fetalano‘aki ‘oku makatu‘unga ‘i he ongoongoleleí. ‘E fakaafe‘i ‘a e to‘u tupú ke nau kau lahi ange ki hono ako‘í mo e akó.
‘Oku pehē ‘i ha tohi mei he Kau Palesitenisī ‘Uluakí ‘i he ‘aho 12 ‘o Sepitema 2012: “‘Oku fakatefito ia ʻi hono fakamālohia mo langaki e tuí, fakauluí mo e fakamoʻoní ʻo fakaʻaongaʻi ai e ngaahi akonaki fakamuimuitaha ʻa e Kau Taki Māʻolungá pea mo e kau palesitenisī lahi ʻo e ngaahi houalotú.”
‘Oku fokotuʻutuʻu ‘a e Ha‘u ʻo Muimui ‘Iate Aú ki ha ngaahi ‘iuniti ‘oku fakamamafa‘i ai ha kaveinga fakatokāteline ‘e taha ʻi he māhina taki taha pea ‘oku ako fakataha ki ai ‘a e ngaahi kalasi ‘i he Lautohi Faka-Sāpaté, Kau Finemuí, mo e Lakanga Taula‘eiki Faka-‘Ēloné.
‘Oku lahi ‘a e ngaahi lēsoni ‘i he ‘iuniti taki tahá ‘i he ngaahi lēsoni ‘e lava ke ako‘i ‘i he māhina ‘e tahá, ko ia ‘oku kole ai ki he kau faiakó mo e kau takí ke nau feinga ke ma‘u ha fakahinohino fakalaumālie pea nau ngāue fakataha ke fakapapau‘i ‘a e lēsoni palani ke nau ngāue ‘akí.
‘E tokoni ‘a e tokoni fakaako fo‘ou ko e, Ako‘i ‘o e Ongoongoleleí ‘i he Founga ‘a e Fakamo‘uí, ki he kau takí mo e kau faiakó ke mahino lelei ange kiate kinautolu ‘a e founga ki hono fakafeʻungaʻi ha ngaahi lēsoni ke fe‘unga mo e ngaahi fie ma‘u ‘a honau to‘u tupú mo e founga ki hono tokoni‘i ‘o e to‘u tupú ke nau ako ‘a e ongoongoleleí.
‘Oku lava ke paaki ‘a e ngaahi lēsoní kotoa mei he ‘Initanetí. ‘E ma‘u atu ʻi he kaha‘ú hano tatau kuo pulusi ‘o e Ha‘u ʻo Muimui ‘Iate Au. ‘E ma‘u foki ‘i he ‘Initanetí ‘i he fakaʻosinga ‘o e 2012 ‘a e ngaahi lēsoní kotoa ‘i ha lea fakafonua ʻe 23.
‘Oku lava ke vakai ‘a e kāingalotú, kau takí, mo e kau faiakó ki he tohi lēsoni fo‘oú ‘i he ‘Initanetí ‘i he lds.org/youth/learn.
‘E fai ‘e he kau taki faka‘ēliá mo fakalotofonuá ha ngaahi ako ma‘á e kau takí mo e kau faiakó ki mu‘a pea ‘osi ‘a e 2012.
Ko e Ha‘u ʻo Muimui ‘Iate Aú ko ha nāunau fakaēsoni fo‘ou te ne tokoni‘i ‘a e kau faiakó ke nau faiako ‘i he founga ‘a e Fakamo‘uí pea tokoni‘i ‘a e to‘u tupú ke nau ului kakato ange ki he ongoongoleleí.
Tā fakatātaaʻi ʻo e ʻatá ʻe Christina Smith © IRI