Fryma e Shenjtë Ngushëllon, Frymëzon dhe Dëshmon

Dhurata e Frymës së Shenjtë është një nga bekimet më të mëdha që mund të marrim në këtë jetë, sepse Fryma e Shenjtë na ngushëllon, frymëzon, paralajmëron, pastron dhe udhëzon. Ai mund të na mbushë “me shpresë dhe dashuri të pastër” (Moroni 8:26). Ai na mëson “të vërtetën e të gjitha gjërave” (Moroni 10:5). Ne marrim zbulesë dhe dhurata shpirtërore nga Perëndia nëpërmjet Frymës së Shenjtë. Më e rëndësishmja, ne marrim dëshmitë tona për Atin Qiellor dhe Jezu Krishtin nëpërmjet Frymës së Shenjtë.

Përpara se të pagëzoheshit, ju mund ta ndienit Frymën e Shenjtë herë pas here. Por vetëm nëpërmjet marrjes së dhuratës së Frymës së Shenjtë pas pagëzimit tuaj, ju mund të gëzoni shoqërimin e vazhdueshëm të Frymës së Shenjtë, me kusht që të jeni të denjë. Kjo dhuratë u dha nga një mbajtës i Priftërisë Melkizedeke me anë të vendosjes së duarve (shih Veprat e Apostujve 19:6; DeB 33:15). Çdo ditë Shabati që nga ajo kohë, ju mund t’i ripërtërini besëlidhjet tuaja të pagëzimit ndërsa merrni sakramentin dhe në këtë mënyrë merrni bekimin e Zotit që ju të mund të “ken[i] gjithmonë Shpirtin e Tij” të jetë me ju (DeB 20:77).

Fryma e Shenjtë, të cilin shpesh e quajmë Shpirti, është anëtari i tretë i Kreut-Perëndi. Profeti Jozef Smith dha mësim: “Ati ka një trup prej mishi e kockash, po aq të prekshëm sa edhe të një njeriu; Biri gjithashtu; por Fryma e Shenjtë nuk ka një trup prej mishi e kockash, por është një personazh i Shpirtit. Po të mos ishte kështu, Fryma e Shenjtë nuk mund të banonte në ne” (DeB 130:22).

“Pasi Shpirti i Zotit nuk banon në tempuj jo të shenjtë” (Helamani 4:24), ne duhet të jemi të denjë për shoqërimin e Tij. Ne e bëjmë këtë, ndërmjet të tjerash, duke pasur mendime të virtytshme, duke jetuar me integritet dhe duke u përpjekur të mbajmë urdhërimet.

Pas marrjes së dhuratës së Frymës së Shenjtë, ne mund të bëjmë shumë gjëra për ta ftuar ndikimin e Tij në jetën tonë:

Lutemi.
Studiojmë shkrimet e shenjta.
Marrim me denjësi sakramentin.
Adhurojmë në tempull.
Shikojmë media të shëndetshme, përdorim gjuhë të pastër dhe kemi mendime të virtytshme.

Ne Nuk Duhet ta Quajmë Këtë Dhuratë si të Mirëqenë

“Si me të gjitha dhuratat, kjo dhuratë duhet të merret dhe të pranohet që të shijohet. Kur duart e priftërisë u vendosën mbi kokën tënde për të të konfirmuar si anëtar të Kishës, dëgjove fjalët: ‘Merr Frymën e Shenjtë’. Kjo nuk do të thoshte se Fryma e Shenjtë u bë pa kushte shoqëruesi yt i vazhdueshëm. Shkrimet e shenjta na paralajmërojnë se Shpirti i Zotit ‘nuk do të hahet gjithnjë me njeriun’ (Zanafilla 6:3). Kur konfirmohemi, na jepet e drejta për shoqërimin e Frymës së Shenjtë, por ajo është një e drejtë që duhet të vazhdojmë ta fitojmë nëpërmjet bindjes dhe denjësisë.”

Plaku Jozef B. Uirthlin (1917–2008), i Kuorumit të Dymbëdhjetë Apostujve: “The Unspeakable Gift”, Liahona, maj 2003, f. 28.

Fotoilustrime nga Christina Smith, Eve Tuft, Cody Bell dhe Matthew Reier