Përse na Nevojitet Libri i Mormonit

Ilustrim nga Bryan Beach; regjistruar në video © 2001 IRI

Disa njerëz mund t’ju pyesin përse na nevojitet Libri i Mormonit, kur ne tashmë e kemi Biblën. Në fakt, Jezu Krishti dëshmoi se kjo do të ndodhte (shih 2 Nefi 29:3). Ka shumë arsye përse Libri i Mormonit është i rëndësishëm në jetën tonë (për shembull, shih 2 Nefi 29:7–11). Këto janë vetëm pak arsye përse ai është thelbësor.

Një Dëshmi Tjetër e Jezu Krishtit

Shkrimet e shenjta na tregojnë një model të përdorimit të dëshmitarëve të shumtë për të themeluar të vërtetën në Kishën e Krishtit. Libri i Mormonit i shton një dëshmitar të dytë Biblës si një dëshmi për Krishtin. Plaku Mark E. Petersen (1900–1984), i Kuorumit të Dymbëdhjetë Apostujve, dikur tha: “Arsyeja kryesore që e kemi Librin e Mormonit, është që në gojën e dy ose tre dëshmitarëve do të qëndrojnë të gjitha gjërat. (Shih 2 Korintasve 13:1.) Ne kemi Biblën; ne gjithashtu kemi Librin e Mormonit. Ata përbëjnë dy zëra – dy vëllime shkrimesh të shenjta – nga dy popuj të lashtë gjerësisht të veçuar, që të dy duke dhënë dëshmi për hyjninë e Zotit Jezu Krisht.”¹ Presidenti Ezra Taft Benson (1899–1994) ka shtuar: “Nuk duhet të harrojmë se Zoti Vetë e dha Librin e Mormonit si dëshmitarin e Tij kryesor”².

Plotësia e Ungjillit

Ne e dimë se “gjërat e qarta dhe të çmueshme … janë hequr prej” Biblës gjatë historisë (1 Nefi 13:40). Libri i Mormonit e qartëson doktrinën e Krishtit dhe sjell plotësinë e ungjillit në tokë përsëri (shih 1 Nefi 13:38–41). Për shembull, Libri i Mormonit na ndihmon të dimë se pagëzimi duhet të kryhet me anë të zhytjes (shih 3 Nefi 11:26) dhe se fëmijët e vegjël nuk kanë nevojë të pagëzohen (shih Moroni 8:4–26).

Qendror për Kishën e Rivendosur

Jozef Smithi dëshmoi se Libri i Mormonit është “gurthemeli i besimit ton딳. Ngaqë e dimë këtë, nuk duket rastësi që Kisha e Jezu Krishtit e Shenjtorëve të Ditëve të Mëvonshme u krijua më 6 prill 1830, vetëm 11 ditë pasi Libri i Mormonit u vu në dispozicion për herë të parë për shitje në publik më 26 mars 1830. Kisha nuk u organizua derisa shkrimi gurthemel i shenjtë ishte në dispozicion të anëtarëve të saj.

Një Bekim në Jetën Tonë

Lidhur me Librin e Mormonit, Jozef Smithi tha se “një njeri do t’i afrohet më shumë Perëndisë duke iu bindur porosive të tij, se nga ndonjë libër tjetër”⁴. Ka fuqinë për të ndryshuar jetë – përfshirë tuajën dhe jetën e atyre me të cilët e ndani Librin e Mormonit. Presidenti Henri B. Ajring, Këshilltar i Parë i Presidencës së Parë, ka dëshmuar: “Efekti i Librit të Mormonit në karakterin, fuqinë dhe guximin tuaj për të qenë dëshmitar i Perëndisë është i sigurt. Doktrina dhe shembujt e guximshëm në atë libër do t’ju lartësojnë, udhëzojnë dhe do t’ju japin guxim. …Studimi me lutje i Librit të Mormonit do të ndërtojë besim në Perëndinë, Atin, në Birin e Tij të Dashur dhe në ungjillin e Tij. Ai do të ndërtojë besimin tuaj te profetët e Perëndisë, të lashtët dhe të kohës sonë. … Ai mund t’ju afrojë më shumë me Perëndinë se çdo libër tjetër. Ai mund ta ndryshojë jetën për më mirë.”⁵

Shënime

1. Mark E. Petersen, “Evidence of Things Not Seen”, Ensign, maj 1978, f. 63.

2. The Teachings of Ezra Taft Benson (1988), f. 204.

3. Jozef Smith, në parathënien e Librit të Mormonit.

4. Jozef Smith, në parathënien e Librit të Mormonit.

5. Henri B. Ajring, “Një Dëshmi”, Liahona, nëntor 2011, f. 69–71.

Dy Dëshmitarë

“Bibla është njëri dëshmitar i Jezu Krishtit; Libri i Mormonit është tjetri. Përse ky dëshmitar i dytë është kaq vendimtar? Shembulli i mëposhtëm pamor mund të ndihmojë: Sa vija të drejta mund të vizatoni duke u nisur nga një pikë e vetme në një letër? Përgjigjja është një numër të pafund. Mendoni për një çast se pika e vetme përfaqëson Biblën dhe ato qindra vija të drejta të vizatuara nga ajo pikë përfaqësojnë interpretimet e ndryshme të Biblës dhe se secili nga ato interpretime përfaqëson një kishë të ndryshme.

Mirëpo çfarë ndodh, nëse në atë letër, ka një pikë të dytë që përfaqëson Librin e Mormonit? Sa vija të drejta mund të vizatoni midis këtyre pikave të referimit: Biblës dhe Librit të Mormonit? Vetëm një. Vetëm një interpretim i doktrinave të Krishtit mund të ekzistojë me dëshminë e këtyre dy dëshmitarëve.

Libri i Mormonit vepron vazhdimisht si një dëshmitar vërtetues, qartësues e bashkues i doktrinave që mësohen në Bibël.”

Plaku Ted R. Kelister, i Presidencës së Të Shtatëdhjetëve, “Libri i Mormonit – një Libër nga Perëndia”, Liahona, nëntor 2011, f. 75.

Lidhja në Bashkëbisedim

Gjatë prillit ju do të studioni rreth Braktisjes dhe Rivendosjes në klasat tuaja në kuorumet e priftërisë, në Të Rejat dhe në Shkollën e së Dielës (nëse lagjja ose dega juaj i ka mësimet e reja në gjuhën tuaj). Dalja në dritë e Librit të Mormonit ishte një pjesë e rëndësishme e Rivendosjes. Pasi ta lexoni këtë artikull, mendoni se si ka ndryshuar jeta juaj ngaqë ju e keni Librin e Mormonit. Ju mund t’i shkruani ndjenjat tuaja në ditar dhe mbani parasysh që t’i ndani ato me të tjerët duke dëshmuar në shtëpi, në kishë ose në mediat shoqërore.

Mësime të së Dielës

Tema e Këtij Muaji: Braktisja dhe Rivendosja