E tupuraa i roto i te rahiraa melo e te rahiraa misionare tei faaarahia i te amuiraa rahi
Ua raʻehia te 15 mirioni rahiraa melo i roto i te Ekalesia, ua faaara mai te peresideni Thomas S. Monson i te tuhaa pureraa matamua no te 183raa o te amuiraa rahi i te 5 no atopa 2013. Ua faaara atoa oia e, mai te faatoparaahia te matahiti no te taviniraa misionare i atopa 2012 ra, ua maraa rahi roa te rahiraa misionare rave tamau na te ao atoa nei—mai te 58 500 i te 80 333.
« Te tamau noa nei te Ekalesia i te tupu papû i te rahi e i te taui i te oraraa o te mau taata e rave rahi i te mau matahiti atoa », ua parau te peresideni Monson. « Te parare nei te reira na te mau fenua atoa na roto i te imiraa a to tatou nuu misionare i te feia e imi nei i te parau mau ».
Ua faaitoito oia i te mau melo e te mau misionare ia amui te tahi i te tahi no te faaite i te evanelia i te mau taata atoa. « Teie te taime no te mau melo e te mau misionare ia haere amui, ia ohipa amui, ia haa amui i roto i te ô vine a te Fatu no te hopoi i te mau varua Ia’na ra », ua parau te peresideni Monson, tei tavini ei aposetolo a 50 matahiti i teie nei.
I roto i te tuhaa pureraa no te avatea mahana maa, ua haamauruuru-maitai-hia e toru melo no te pŭpŭ matamua no te Hitu Ahuru—o Elder John B. Dickson, Elder Paul E. Koelliker e Elder F. Michael Watson—e ua faahanahanahia ratou ei hui mana faatere rahi hope, e ua haamauruuru-maitai-atoa-hia o Elder Kent D. Watson no te pupu piti no te Hitu Ahuru. I muri iho, ua paturuhia te mau taea‘e Julio A. Angulo, 45 matahiti, no Bogotá, Colombia ; Peter F. Evans, 54, no Roto Miti, Utah, te mau Hau Amui no Marite ; e Gennady N. Podvodov, 47, no Donetsk, Ukraine, ei Hitu Ahuru Area. Ua faaara-atoa-hia e, ua haamauruuruhia na taea‘e César H. Hooker e Craig T. Wright ei Hitu Ahuru Area.
Milioni e milioni taata na te ao atoa nei tei mata‘ita‘i e tei faaroo i te amuiraa na ni‘a i te afata teata, te Itenati, te ratio e te mau haapurororaa peeʻutari. No te taime matamua, ua haapuroro-ti‘a-hia te tuhaa pureraa no te ahiahi mahana maa, te tuhaa pureraa no te autahuaraa, na roto i afata teata e te Itenati. Ua hau i te 100 000 taata tei tae mai i na tuhaa pureraa e pae i te pû amuiraa i Roto Miti, Utah, i te 5 e te 6 no atopa. Ua ite-atoa-hia teie amuiraa na ni‘a i te mau rave‘a rau e na roto e 95 reo ma te haapurorohia te reira i roto e 197 fenua e tuhaa fenua.
Ua faaoti te peresideni Monson i te amuiraa ma te hoê tiaororaa i te mau melo o te Ekalesia ia faa‘ite i te maitai rahi a‘e i te tahi e te tahi e ia « itehia tatou i te mau taime atoa te rave ra i te ohipa a te Fatu ».
Thomas S. Monson i roto i te fare menemene no Temple Square i te matahiti 1963, te tahi noa taime na mua oia i paturuhia ai ei tino i roto i te hui mana faatere rahi.
Hoho‘a na te piha toroʻa o te peresideni