I ta’u mau mootua
Te vai nei te hoê faaueraa rahi roa e tauturu mai ia tatou ia pahono i te mau tamataraa ma te faatae roa’tu ia tatou i te aau o te hoê oraraa utuafare oaoa.
I teie matahiti e faaipoipohia ta maua na mootua matahiapo e piti. I roto e tau matahiti rii noa, e 10 faahou o to raua fetii e tae‘ahia i tera taime o to ratou oraraa e pee atoa mai ratou no te tomo i roto i teie ao no te hamaniraa i te utuafare.
Ua riro teie opuaraa oaoa ei tumu no to’u feruriraa hohonu a haere mai ai raua e ani i te mana‘o tauturu. Te mea ihoa râ ta raua i ani mai, oia hoʻi, « eaha te mau ma‘itiraa ta’u e nehenehe e rave o te arata‘i ia’u i te oaoa ? » E te tahi atoa, « eaha te mau ma‘itiraa e arata‘i ia’u i te oaoa ore ? »
Ua hamani te Metua i te Ao ra ia tatou ma te hiro‘a taa ê. Aita e piti o tatou e farii hoê â oraraa. Aita e piti utuafare, hoê â huru. No reira, e ere i te mea maere, e mea fifi rii ra ia horo‘a i te parau aʻo e nahea i te ma‘iti i te oaoa i roto i te oraraa utuafare. Atira noa’tu, ua tuu te Metua i te Ao ra i te hoê â eʻa no Ta’na mau tamarii atoa ia tae i te oaoa. Noa’tu to tatou hiro‘a taata e noa’tu te mau mea e ratere atu tatou, hoê ana‘e faanahoraa no te oaoa. Taua faanahoraa ra, o te peeraa ïa i te mau faaueraa atoa a te Atua.
No tatou paatoa, e no ta’u atoa mau mootua e mana‘o ra e faaipoipo, te vai nei te hoê faaueraa rahi roa e tauturu mai ia tatou ia pahono i te mau tamataraa ma te faatae roa’tu ia tatou i te aau o te hoê oraraa utuafare oaoa. E nehenehe te reira ia faaohipahia noa’tu te huru oraraa. Te parau-tamau-hia nei te reira i roto i te mau papa‘iraa mo‘a e i roto i te mau haapiiraa a te mau peropheta o teie anotau. Teie te faahitiraa parau a te Bibilia no te parau aʻo a te Fatu i te feia atoa e hinaaro ia ora amui e a muri noa’tu i roto i te here e te oaoa :
« Ua ui maira te hoê haapii ture no ratou ia’na, na ô maira i te râmâraa mai,
« E Rabi, teihea te parau rahi i roto i te ture ?
« Ua parau atura Iesu, Hinaaro oe i to Atua ia Iehova ma to aau atoa, e ma to varua atoa, e ma to mana‘o atoa.
« O te ture matamua teie e te hau i te rahi.
« E mai te reira atoa te piti ; E aroha’tu oe i to taata-tupu, mai to aroha ia oe iho na.
« Te ture atoa e te mau peropheta, tei teie nei ïa pue ture e piti nei ».1
Mai roto mai i teie faahitiraa ohie, e ere i te mea paari ia puohu mai i te mau mea atoa ta’u i haapii no ni‘a i te mau ma‘itiraa e arata‘i atu i te oaoa i roto i te mau utuafare. E haamata vau na roto i te uiraa, « eaha te mau ma‘itiraa tei arata‘i ia’u ia here i te Fatu ma to’u aau atoa, ma to’u varua atoa e ma to’u mana‘o atoa ? No’u nei, o te ma‘itiraa ïa ia tuu ia’u iho i te vahi ua putapu vau i te oaoa no te faaoreraa hara no roto mai i te Taraehara a te Fatu.
Tau matahiti i ma’iri a‘enei, ua bapetizo vau i te hoê taata i Albuquerque, i New Mexico, na maua to’u hoa misionare i haapii. Ua utuhi au i te taure‘are‘a tamaroa i raro i te pape e ua faati‘a mai ia’na i ni‘a. Hoê â paha to maua roa no te mea ua paraparau afaro mai oia i roto i to’u tariʻa. Ma te rari pape e te roimata i ni‘a i to’na mata e ma te oaoa i roto i te reo, ua parau mai oia, « Ua mâ vau, ua mâ vau ».
Tera atoa te roimata oaoa ta’u i ite i roto i te mata o te hoê taata tei faahiti i te mau parau a te hoê Aposetolo na te Atua. Ua na ô oia i taua tuahine ra, i muri mai i te hoê uiuiraa hi‘opo‘a e te mărû, « te faaore nei au i ta oe mau hapa na roto i te i‘oa o te Fatu. E horo‘a mai Oia ia outou i te haapapûraa no Ta’na faaore hara ia au i To’na iho taime e Ta’na iho rave‘a ». E ua na reira Oia.
Ua ite au no te aha i ti‘a ai i te Fatu ia parau e, ia faaorehia te mau hara, aita faahou Oia e haamana‘o i te reira. Na roto i te mana o te Taraehara, ua apîhia te mau taata ta’u i mâtau e ta’u i here, e ua tumâhia te mau ohipa a te hara i ni‘a ia ratou. Ua î to’u aau i te here no te Faaora e no te Metua here tei tono mai Ia’na.
Ua tae mai taua haamaitairaa rahi ra na roto i te faaitoitoraa i te feia ta’u i aupuru, ia haere ratou i te Faaora ra no te tamarûraa o te mauiui, e tamarûraa Oia ana‘e te nehenehe e horo‘a. Tera te tumu vau e faaitoito u‘ana ai i te feia ta’u i here ia farii e ia faarahi i te mau piiraa atoa tei pûpûhia ia ratou i roto i te Ekalesia. Ua riro teie ma‘itiraa hoê o te mau taviri rahi no te oaoa utuafare.
E riro te mau ‘umeraa o te mau taime atoa o te oraraa i te faahema ia tatou ia pato‘i e aore râ ia tauʻa ore i te mau piiraa taviniraa a te Faaora. E nehenehe i te reira e tuu ia tatou i roto i te ati pae varua, tatou iho nei, ta tatou vahine e to tatou utuafare. Te vai nei te tahi mau piiraa e mana‘ohia ra e mea faufaa ore, no’u nei râ, to’u oraraa e to’u utuafare tei taui-roa-hia ei mea maitai i to’u fariiraa i te hoê piiraa ia haapii i te hoê pŭpŭ diakono. Ua ite au i te here o teie mau diakono no te Faaora e To’na atoa here no ratou.
Ua ite au i te tupuraa te reira i roto i te oraraa o te hoê peresideni tĭtĭ tahito, e peresideni misioni tahito atoa hoʻi, i roto i ta’na piiraa ia’na ia haapa‘o i te hoê pŭpŭ haapii. Ua ite atoa vau i te tahi episekopo tahito e ei Hitu Ahuru Area tahito ta te Fatu i faaohipa no te faaora mai i te hoê tamaroa o te hoê pŭpŭ haapii tei pêpê i roto i te hoê ati. Ua haaputapu te mau semeio no taua taviniraa ra e rave rahi oraraa, e to’u iho nei, e ua faarahi i to ratou here no te Faaora.
Mai te mea e tavini noa tatou ia vetahi ê, ua ti‘a ia tatou ia taparu i te hoaraa o te Varua Maitai. E faahotu noa mai te manuïaraa i roto i te taviniraa i te Fatu i te mau semeio i ni‘a’tu i to tatou iho mana. Ua ite te metua e faaruru nei i te orure hau a te hoê tamarii i te reira parau mau, mai teie tuahine hahaere tei piihia e te hoê vahine e imi ra i te tamahanahanaraa no te faaruʻeraa ta’na tane ia’na. No na tavini, ua mauruuru i te pureraa raua i taua poʻipoʻi ra ia tono mai te Fatu i te Varua Maitai ei hoa.
Na roto ana‘e i te hoaraa o te Varua Maitai tatou e nehenehe ai e ti‘aturi e, e amo-au-hia te zugo i roto i te hoê faaipoiporaa maniania ore. Ua ite roa vau i te faufaa rahi o teie hoaraa no te popou o te hoê faaipoiporaa. E titau te semeio no te riroraa ei hoê i te tauturu no te raʻi mai, e te tahi area taime. Ta tatou fa, o te ora-amui-raa ïa e a muri noa’tu i mua i te aro o te Metua i te Ao ra e to tatou Faaora.
E mea taa ê roa to’u metua tane i to’u metua vahine. E vahine himene e e vahine anoʻihi to’u metua vahine. E mea au na to’u metua tane te hîmio (chimie). I te hoê mahana i te hoê aruʻi faaotoraa upaupa (tera huru faaotoraa a Mozart), ua maere roa to’u metua vahine i te ti‘araa to’u metua tane na mua a‘e a haamata ai te poporaa. Ani atura to’u metua vahine ia’na e, te haere ra oia i hea. Pahono ohie noa’tura oia e : « ua oti, e ere anei ? » Na te faaûruraa mărû a te Varua Maitai i arata‘i mai i to’u metua tane na muri i to’u metua vahine i tera parahiraa i mua roa, e na te reira atoa i faahoʻi-faahou-mai ia’na e rave rahi taime i teie mau aruʻi.
16 matahi to to’u metua vahine oraraa i New jersey ia nehenehe to’u metua tane e faatamaa i te utuafare na roto i te imiraa e te haapiiraa i te ihi hîmio. E tusia te reira na’na no te mea tei te atea roa oia i to’na metua vahine ivi, e tei atea atoa i to’na tuahine tei ore i faaipoipo, tei aupuru ia’na i roto i tera fare faaapu a te utuafare. Raua toopiti ua pohe i te taime a ora ai to’u metua vahine i New Jersey. Tera noa te taime ua ite au i to’u metua vahine i te taʻiraa.
Tau matahiti i muri mai, ua faaauhia mai te hoê ohipa na to’u metua tane i Utah. Faahou â, ua ani ohie oia i to’u metua vahine, « Mildred, eaha to oe mana‘o, eaha te ti‘a ia’u ia rave ? »
Ua parau oia, « Henry, na oe e feruri i te mea maitai a‘e ».
Aita oia i rave i tera ohipa. Ia poʻipoʻi a‘e, ua papa‘i to’u metua vahine i te hoê rata ia’na, ahani pai tei ia’u nei te reira rata. Te haamana‘o ra vau ua parau oia ia’na, « Eiaha e iriti i te fare. A haere i ta oe ohipa e iriti atu ai ». Ua haamata te reira na roto i te hoê faahaparaa. Ua parau fafau oia ia’na tau matahiti na mua’tu e, ia roaa noa mai te rave‘a, e haafatata oia ia’na i to’na utuafare. Ua maere roa to’u metua tane i to’na inoino ia’na. Aita oia i haamana‘o i te hiaai o to’na aau. Oioi roa oia i te haponoraa i te hoê poroʻi no te faaite e, e farii ona i te reira ohipa.
Ua parau oia, « E hoa e Midred, no te aha aita oe i parau mai ? »
Parau mai nei oia, « Na oe ihoa pai e haamana‘o ».
Ua parau noa to’u metua tane e, na’na iho i ma‘iti ia haere i Utah, e ere râ mai te hoê faatusiaraa i to’na toroʻa ohipa. Ua apo mai raua i te semeio ia riro ei hoê. E mea hau roa’tu ïa ahani ua faahaamanaʻo te Varua Maitai ia papa i te parau fafau ta’na i faahiti tau matahiti na mua’tu. Auaʻe râ, ua tamărû te Varua Maitai i to’na aau ia riro mai te ma‘itiraa a to’u metua vahine ei ma‘itiraa atoa na’na.
E hi‘oraa atea ta te Metua i te Ao ra e e hi‘oraa maitai roa, ua ite Oia ia tatou e ua ite atoa i to tatou ananahi. Ua ite Oia eaha te mau fifi e farereihia e tatou. Ua tono mai Oia i Ta’na Tamaiti ia mamae, ia riro Oia i te ite e nahea i te faaora ia tatou i roto i to tatou mau tamataraa atoa.
Ua ite tatou e, e tamarii varua ta te Metua i te Ao ra i roto i teie nei ao te ma‘iti nei i te tahi mau taime i te hara e te oaoa ore rahi. Tera mau te tumu ua tono mai Oia i Ta’na Matahiapo ia riro ei Taraehara no tatou, te ohipa here rahi roa a‘e i roto i te mau mea atoa i hamanihia ra. Tera ïa te tumu e ti‘aturi ai tatou e, e titauhia te tauturu a te Atua e te tau atoa hoʻi no te faaanaana ia tatou no te ora mure ore, no te ora i piha‘i iho i to tatou Metua.
E tamata mai te oraraa utuafare ia tatou. Tera te hoê fâ na te Atua no te horo‘araa mai i te horo‘a no te tahuti ia tatou—no te haapuai ia tatou na roto i te mau tamataraa. E riro mai te reira ei parau mau i roto i te oraraa utuafare i reira tatou e ite ai i te oaoa rahi e te oto rahi e te mau tamataraa o te riro mai i te tahi mau taime, i te hiʻohia ei mea hau atu i to tatou mana faaoromai.
Teie te parau a te peresideni George Q. Cannon no ni‘a i te huru o to te Atua faaineineraa ia outou, ia’u e i ta tatou mau tamarii no te mau tamataraa ta tatou e faaruru atu: « Aore hoê o tatou tei ore i farii i te here o te Atua. Aore hoê o tatou Ta’na i ore i aupuru e i poihere. Aore hoê o tatou Ta’na i ore i hinaaro ia faaora, e Ta’na i ore i faataa te faanahoraa no te faaora. Aore hoê o tatou Ta’na i ore i tono i Ta’na mau melahi ia haapa‘o. E hi‘o paha to tatou mata ia tatou iho ei mea naʻinaʻi roa e te mea faufaa ore, na reira atoa te mata o te tahi mau puʻeraa, teie râ te parau mau, e tamarii tatou na te Atua e ua horo‘a mai Oia i Ta’na mau melahi—e mau tino ite-ore-hia ma te mana e te puai—no te haapa‘o ia tatou, e te ara nei ratou i ni‘a ia tatou e te paruru nei ia tatou ».2
Te mea ta te peresideni Cannon i haapii, e parau mau ïa. E titauhia teie haapapûraa na outou, mai tei titau-atoa-hia na’u nei, e o ta’u hoʻi i turuʻi noa i ni‘a iho.
Ua pure au ma te faaroo ia imi e ia putapû te hoê taata ta’u i here i te mana no te Taraehara. Ua pure au ma te faaroo ia tae mai te mau taata melahi no te tauturu ia ratou, e ua haere mai ratou.
Ua faanaho te Atua i te mau rave‘a no te faaora i Ta’na mau tamarii tata‘itahi. No te taata e rave rahi, e riro ïa o te tuu-raa-hia ratou i piha‘i iho i te hoê taea‘e e aore râ te hoê tuahine e aore râ te hoê metua tupuna o te here nei ia ratou noa’tu te ohipa ta ratou e rave.
Tau matahiti i maʻiri a‘enei, ua faati‘a mai te hoê hoa no ni‘a i to’na mama ruau. Ua ora oia i te hoê oraraa parau ti‘a, ua haapa‘o maitai noa oia i mua i te Fatu e i roto i Ta’na Ekalesia. Ua ma’iti râ te hoê o ta’na mau mootua tamaroa i te eʻa no te hara. Ua haavâhia ona e ua tapeʻahia i te fare tapeʻaraa. Ua parau mai to’u hoa e, i te hoê mahana te faahoro ra to’na mama ruau i te pereoo no te haere e hi‘o i ta’na mootua i te fare tapeʻaraa, ua tahe to’na roimata a pure noa ai oia ma te oto, « Ua tamata noa vau i te ora i te oraraa maitai. No te aha, no te aha pai teie ati rahi i ni‘a i ta’u mootua, mai te huru ra, ua faaino roa te reira i to’na oraraa ? »
Ua tae mai te pahonoraa i roto i to’na feruriraa na roto i teie mau parau : « Ua horo‘a vau ia’na ia oe na no te mea ua ite au o oe te nehenehe e here ia’na noa’tu te ohipa ta’na i rave ».
E haapiiraa faahiahia roa teie no tatou paatoa. Eita te eʻa no te mau metua here e no te mau metua tupuna here, e no te mau tavini here atoa a te Atua, e riro ei e‘a ohie i roto i te hoê ao te rahi noa’tura te ino. Eita e nehenehe ta tatou e faahepo i te mau tamarii a te Atua ia ma’iti i te eʻa no te oaoa. Eita ta te Atua e nehenehe e na reira no te ti‘amâraa Ta’na i horo‘a ia tatou.
Ua here te Metua i te Ao ra e Ta’na Tamaiti Here i te mau tamarii atoa a te Atua noa’tu te mea ta ratou e ma’iti ia rave e aore râ te mea e riro mai ratou. Ua aufau te Faaora i te hoo no te mau hara atoa, noa’tu te faufau o te reira. Noa’tu e, e ti‘a ia vai te parau-ti‘a, ua matara te rave‘a no te aroha e eita te reira e haru i ta te parau-ti‘a.
Teie te mau parau a Alama i ta’na tamaiti o Korianotona no ni‘a i taua ti‘aturiraa ra: « E teie nei, aita’tu â ravea o te au i te parau-tia ra e tupu ai te ravea faaora, maori râ na roto i ta te taata tatarahapa i teie nei vai-tamata-raa ; oia ïa, teie nei vai-faaineine-raa ; e ahiri aita taua ravea nei, aore o te aroha vahi e noaa, maori râ na roto i te faaoreraa i ta te parau-tia ra. Aita râ e tia ia faaore i te parau-tia ; ia na reirahia hoi, e ere te Atua i te Atua mau ».3
Teie ïa ta’u poroʻi i ta’u mau mootua, e ia tatou paatoa e tamata ra i te patu i te utuafare mure ore, oia hoʻi, e oaoa tei haapapûhia i ni‘a i tei haapa‘o maitai. Hou teie nei ao, ua here e ua ohipa te hoê Metua here i te Raʻi e Ta’na Tamaiti Here e o ratou ta Raua i ite e, e ratere ê atu ratou. E here te Atua ia ratou e a muri noa’tu.
Ua fana‘o outou i te iteraa e, ua haapii ratou i te faanahoraa no te faaoraraa i roto i te haapiiraa ta ratou i farii i roto i te ao varua. Ua navaʻi to ratou haapa‘o maitai e to outou atoa e ua faati‘ahia outou ia haere mai i teie nei ao, area te tahi pae e rave rahi, aita ïa.
Na roto i te tautururaa a te Varua Maitai, e faahaamanaʻohia ia tatou te mau parau mau atoa. Eita ta tatou e nehenehe e faahepo i te reira i ni‘a ia vetahi ê, ua nehenehe râ ta tatou e vaiiho ia ratou ia hi‘o mai i te reira i roto i to tatou nei oraraa. E nehenehe noa ta tatou e farii i te faaitoitoraa i roto i te haapapûraa e, i oaoa a‘ena tatou i te amuiraa ei melo no te utuafare a to tatou Metua i te Ao ra. Na roto i te tautururaa a te Atua, ua nehenehe ta tatou paatoa e putapu faahou i teie tia’iraa e teie oaoa. Te pure nei au ia tupu te reira no tatou paatoa na roto i te i‘oa o te Fatu Iesu Mesia, amene.