Randall L. Ridd

Tauturu piti apî i roto i te peresideniraa rahi no te Feia Apî Tamaroa

Ei tamarii na te hoê tamuta fare, ua haapii oioi Randall L. Ridd i te faufaa no te rave-maitai-raa i te ohipa. E rave rahi roa taime, e haa te tamaroa ra Randall no te faaoti i te hoê ohipa, ei reira noa to’na metua, o Leon Ridd, i te parau e, « Aita â oe i faaoti ».

Ua vaiiho mai teie huru etaeta i te hoê mana‘o vai maoro i ni‘a i teie taata e tavini ra i teie nei ei tauturu piti i roto i te peresideniraa rahi no te Feia Apî Tamaroa. Tae roa mai i teie mahana, te faaroo faahou nei oia, i te tahi mau taime, i te mau parau afaro, e mau parau here atoa râ, a to’na metua tane a rave ai oia i ta’na mau hopoi‘a, i roto i ta’na toroʻa ohipa, i roto i te utuafare e i roto i te Ekalesia : « Aita â oe i faaoti ; e rave maitai i te ohipa ».

Ua parau te taea‘e Ridd e, ua riro te huru afaro o to’na utuafare ei hoê haamaitairaa i roto i to’na oraraa. Ua na reira atoa te tahi mau taata arata‘i e te tahi atoa feia faatere i roto i te autahu‘araa tei faaitoito ia’na i ni‘a i te eʻa no te evanelia. Te farii ra to’na mau hoa haapiiraa no te haapiiraa tuarua i te piiraa missioni i te 19raa o to ratou matahiti, tera ïa o Randall te haere ra i te haapiiraa tuatoru e i roto i te nuu faʻehau. I muri iho ua rave oia i te hoê ohipa ei taata aravihi i roto i te toroʻa faatere i te hihi « rayon X », e ua tamau noa oia i ta’na haapiiraa i te haapiiraa University of Utah. E mau taata paari tei haere roa mai ia’na no te parau ia’na e, tei te aua misioni to’na vairaa mau. Ua pee oia i ta ratou aʻo e ua hapono atura i ta’na puʻe parau no te haere e tavini. Aita i maoro roa, teie oia e faaite ra i te evanelia i roto i te misioni no Mehiko Apatoʻerau. « Eaha ra ïa to’u oraraa ahani aita vau i haere e tavini i te hoê misioni », te parau nei oia.

Ua hoʻi mai oia i te fare, ua hoʻi i te haapiiraa e ua faaipoipo ia Tamina Roark i roto i te hiero no Roto Miti i te matahiti 1975. E maha tamarii tei paari i roto i te utuafare Ridd a faanuu noa ai te taea‘e Ridd i ta’na toroʻa ohipa i roto i te ohipa tapihooraa fenua e fare e te tahi atoa mau taiete.

Ua vai noa to’na here no te ohipa misionare. Ua peresideni oia i te misioni no Ecuador Guayaquil North mai te matahiti 2005 i te matahiti 2008 e ua ite faahou oia i te tauiraa rahi e nehenehe e tupu i roto i te oraraa o te hoê tamaroa e tamahine te tavini ra ei misionare rave tamau.

Te tavini ra te taea‘e Ridd i roto i te tomite rahi no te Feia Apî Tamaroa a piihia ai oia i roto i te peresideniraa rahi no te Feia Apî Tamaroa i te avaʻe me ra 2013.