Agtutubo
Mabalinko Kadi ti Mangibinglay iti Libro ni Mormon?
Agindeg ti nagsurat iti Washington, USA.
Idi umuna a tawenko iti haiskul, inawisnak ti seminary teacherko iti klasek tapno mangtedak kadagiti kopia ti Libro ni Mormon kadagiti gagayyemko a saan a miembro ti Simbaan. Nupay managbabainak unay, inawatko ti awis.
Adu nga aldaw ti binubosko tapno maaddaanak iti tured, ngem idi agangay inikkak ti gayyemko a ni Britny iti libro kabayatan ti oras ti pangngaldaw ket nangtedak iti ababa a pammaneknek. Nagyaman kaniak ni Britny iti libro nga intedko.
Iti gibus dayta a tawen ti panageskuela, immakar ni Britny, ngem nagtultuloy ti panagpinnadamagmi. Imbagana ti maipapan iti baro nga eskuelana ken no kasano a nagmiembro iti Simbaan ti dumani amin a gagayyemna ngem di na iti kaano man imbaga maipapan iti ania man a naespirituan kaniak.
Nagbalbaliw dayta sakbay a pimmanawak a mapan agmision. Nakaawatak iti mensahe manipud ken ni Britny a kunkunana nga adda napateg nga ipadamagna kaniak: agpabuniagen isuna, ken kayatna ti agyaman kaniak gapu ta nagbalinak a gayyemna ken iti panangipakitak iti nasayaat a pagwadan.
Inaramat ti Dios ti maysa a managbabain nga ubing a lalaki nga agtawen iti 15 nga awan pay padasna iti panagmisionario ken inturongna isuna a mangibinglay iti ebanghelio iti maysa a tao nga ammona nga awatennanto daytoy. Ammok a babaen ti idedengngeg iti Espiritu, masarakantayonto amin dagiti tao iti lawlawtayo nga agur-uray a mangsursuro iti naisubli nga ebanghelio. Ammok a no tumulongtayo a mangisangbay uray iti maysa laeng a tao iti Apo, “anian a naindaklan a rag-o[tayo] kenkuana iti pagarian ti Ama[tayo]!” (DkK 18:15).