2013
Ti Nadiosan a Mision ni Jesucristo: Ti Bugbugtong nga Anak
December 2013

Mensahe iti Visiting Teaching, Disiembre 2013

Ti Nadiosan a Mision ni Jesucristo: Ti Bugbugtong nga Anak

Nainkararagan nga adalenyo daytoy a material ken kalikagumanyo nga ammuen no ania ti ibinglay. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken magparabur kadagiti ay-aywananyo babaen ti visiting teaching? Para iti mainayon nga impormasion mapan iti reliefsociety.lds.org.

Ladawan
Selio ti Relief Society

Pammati, Pamilia, Tulong

Ti Mangisalakantayo, ni Jesucristo, ket maawagan iti Bugbugtong nga Anak gapu ta Isu laeng ti tao iti daga a naipasngay iti mortal nga ina ken imortal nga Ama. Tinawidna dagiti nadiosan a bileg manipud iti Dios, ti Amana. Manipud iti inana, ni Maria, tinawidna ti mortalidad ket nagibtur iti panagbisin, pannakawaw, pannakabannog, panagsakit, ken ipapatay.1

Gapu ta ni Jesucristo ti Bugbugtong ti Ama, kinabaelanna ti nangisuko iti biagna (natay) ken nangisubli manen iti daytoy (babaen ti panagungar). Isuro dagiti nasantuaan a kasuratan a “babaen ti pannubbot ni Cristo,” “magun-od[tayo] ti panagungar” (Jacob 4:11). Masursurotayo pay nga amin ket “mabalin nga agungarto iti saan nga ipapatay iti agnanayon a biag” no datayo ket “mamati” (DkK 29:43).

No maawatantayo a naan-anay no ania ti kayat a sawen ken Jesus ti agbalin a Bugbugtong nga Anak ti Ama, dumakkelto ti pammatitayo ken Cristo. Kinuna ni Elder D. Todd Christofferson ti Korum dagiti Sangapulo-ket-dua nga Apostol, “Ti pammati ken ni Jesucristo ket natibker a panamati ken namnama ti (1) kasasaadna kas Bugbugtong nga Anak ti Dios, (2) ti agnanayon a Pannakasubbot, ken (3) ti literal a Panagungarna.”2 Impanekneken dagiti moderno a propeta: “Ni [Jesucristo] … ti Bugbugtong nga Anak iti lasag, ti Mannubbot ti lubong.”3

Manipud kadagiti Nasantuan a Kasuratan

Juan 3:16; Doktrina ken Katulagan 20:21–24; Moises 5:6–9

Manipud iti Pakasaritaantayo

Iti Baro a Tulag mabasatayo maipanggep kadagiti babbai, a nanaganan ken saan a nanaganan, a nangaramat iti pammatida ken ni Jesucristo, nangsursuro ken nagtungpal kadagiti pannursurona, ken nangipaneknek maipanggep iti panagministro, dagiti milagro ken kinatan-okna. Nagbalin dagitoy a babbai a nalaing a pagwadan ti kinadisipulo ken napapateg a saksi iti aramid ti pannakaisalakan.

Kas pagarigan, nangiburay ni Marta iti napigsa a pammaneknek maipanggep iti kinadiosan ti Mangisalakan idi kinunana Kenkuana, “Siak pinatik a sika ni Cristo, ti Anak ti Dios, nga umay ditoy lubong” (Juan 11:27).

Sumagmamano kadagiti nagkauna a saksi ti kinadiosan ti Mangisalakan ket ti inana, ni Maria, ken ti kasinsinna a ni Elisabet. Kalpasan la unay ti isasarungkar ni anghel Gabriel ken ni Maria, sinarungkaranna ni Elisabet. Idi nangngeg ni Elisabet ti kablaaw ni Maria, isu ket “napno iti Espiritu Santo” (Lucas 1:41) ket nangiburay iti pammaneknek a ni Maria ti agbalin nga ina ti Anak ti Dios.

© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti Visiting Teaching Message, December 2013. Ilokano. 10672 864

Dagiti Nagadawan

  1. Kitaen iti Gospel Principles (2009), 52–53.

  2. D. Todd Christofferson, “Building Faith in Christ,” Liahona, Sept. 2012, 13.

  3. “Ti Sibibiag a Cristo: Ti Pammaneknek dagiti Apostol, “Liahona, Abr. 2000, 2–3.

Ania ti Maaramidko?

  1. Apay a napateg para kaniak a maawatak dagiti akem ni Jesucristo?

  2. Kasano a mapapigsa ti pammatitayo no agtungpaltayo kadagiti katulagantayo?

Iprenta