Mensahe ti Umuna a Panguluen, Disiembre 2013
Pamilia ken Gagayyem nga Agpaut iti Agnanayon
Sadino man ti pagnaedanyo, addaankayo kadagiti gagayyem nga agsapsapul iti dakdakkel a ragsak a nasarakanyo gapu iti panagtungpalyo iti naisubli nga ebanghelio ni Jesucristo. Mabalin a saanda a kabaelan nga iladawan dayta a ragsak babaen iti balikas, ngem mailasinda daytoy no makitada daytoy iti panagbiagyo. Aggagardanto a mangammo iti pagtaudan dayta a ragsak, nangnangruna no makitada a maipaspasangokayo kadagiti pannubok kas met la kadakuada.
Nariknayon ti ragsak bayat ti panagtungpalyo kadagiti bilin ti Dios. Dayta ti bunga wenno parabur a naikari kadakayo gapu iti panagbiagyo a mayannurot iti ebanghelio (kitaen iti Mosiah 2:41). Saankayo a sipupudno nga agtungpal kadagiti bilin ti Dios tapno makitakayo dagiti dadduma a tao, ngem dagiti makaimatang iti ragsakyo ket isagsaganan ti Apo ida a dumngeg kadagiti naimbag a damag ti Pannakaisubli ti ebanghelio.
Dagiti parabur a naiteden kadakayo ket nangparnuay kadagiti pagrebbengan ken napipintas a gundaway para kadakayo. Kas natulagan a disipulo ni Jesucristo, pagrebbenganyo ti mangted kadagiti dadduma iti gundaway a mangsarak iti nayon a ragsak, nagnangruna kadagiti gagayyemyo ken miembro ti pamiliayo.
Nakita ti Apo ti gundawayyo ket inladawanna ti pagrebbenganyo iti daytoy a bilin: “Umno a ballaagan ti tunggal tao a naballaaganen ti padana a tao” (DkK 88:81).
Aramiden ti Apo a nalaklaka a tungpalen dayta a bilin babaen ti panagbalbaliw a makita iti pusoyo no awaten ken agbiagkayo a mayannurot iti ebanghelio ni Jesucristo. Kas bungana, dumur-as ti ayatyo para kadagiti dadduma, kas met iti tarigagayyo para kadakuada a maaddaan iti isu met la a ragsak a napadasanyon.
Maysa a pagarigan dayta a panagbalbaliw ket ti no kasano ti panangawatyo iti gundaway a tumulong iti aramid ti misionario ti Apo. Maammuan iti saan a mabayag dagiti full-time a misionario a manamnamada nga awaten ti alisto ken naregget a sungbat ti maysa a pudno a convert no agkiddawda iti maysa a tao a suruanda. Tarigagayan unay ti convert a kabinglayna iti ragsakda dagiti gagayyem ken miembro ti pamiliada.
No agkiddaw ti ward mission leaderyo wenno dagiti misionario iti nagan ti maysa a tao tapno masuruan, maysa daytoy a dakkel a pammadayaw kadakayo. Ammoda a nakita dagiti gagayyem a naragsakkayo ket, ngarud, naisaganan dagita a gagayyem a dumngeg iti ebanghelio ken pumili nga umawat iti daytoy. Ken agtalekda a dakayto ti gayyem a kasapulandanto no agbalindanto a miembro ti Simbaan.
Diyo nasken ti agbuteng a mapukawyonto dagiti gagayyemyo babaen iti panangawisyo kadagiti misionario tapno yam-ammoyo ida. Addaanak kadagiti gagayyem a di nangawat idi kadagiti misionario ngem nagyamanda kaniak kalpasan ti adu a tawen gapu iti panangidiayak kadakuada iti maysa a banag nga ammoda idi a napateg unay kaniak. Mabalinyo ti makigayyem nga agpaut iti agnanayon babaen iti panangidiayayo iti ebanghelio, a makitada a nangisangbay kadakayo iti ragsak. Diyo kaano man palabsen ti maysa a gundaway a mangawis iti maysa a gayyem ken nangnangruna iti maysa a miembro ti pamilia a mangpili a sumurot iti plano ti kinaragsak.
Awan ti dakdakkel pay a gundaway para iti dayta a yaawis no saan a ti awis a makastrek kadagiti templo ti Dios. Idiay a mabalin nga idiaya ti Apo dagiti ordinansa ti pannakaisalakan kadagiti kapuonantayo a dida nabalin nga inawat dagitoy idi sibibiagda pay. Kitaendakayo nga addaan iti ayat ken namnana. Inkari ti Apo nga addaandanto iti gundaway a sumrek iti pagarianna (kitaen iti DkK 137:7–8), ket immulana ti maysa nga ayat para kadakuada iti pusoyo.
Adu kadakayo ti nakariknan iti rag-o iti panangidiayayo kadagiti ordinansa ti templo kadagiti dadduma, kas iti panangaramidyo no itedyo dagiti nagan dagiti tao kadagiti misionario a maam-ammoyo. Nariknayon ti dakdakkel pay a rag-o iti panangannongyo kadagiti ordinansa para kadagiti kapuonanyo. Naipaltiing ken ni Propeta Joseph Smith a posible laeng ti agnanayon a ragsaktayo no idiayatayo kadagiti kapuonantayo ti wagas a pakaawatantayo iti dayta a bendision(kitaen iti DkK 128:18).
Ti panawen ti Paskua ti mangigapu iti panangutobtayo iti kaunggan ti panunot ken riknatayo nga insangbay ti Mangisalakan ken iti rag-o nga insangbay ti ebangheliona kadatayo. Ipakitatayo ti panagyamantayo Kenkuana no idiayatayo dayta a ragsak kadagiti dadduma. Ti panagyaman ket agbalin a rag-o no itedtayo dagiti nagan kadagiti misionario ken no ipantayo dagiti nagan dagiti kapuonantayo iti templo. Dayta a pakakitaan iti panagyamantayo ket makaaramid iti gagayyem ken pamilia nga agpautto iti agnanayon.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti First Presidency Message, December 2013. Ilokano. 10672 864
Panangisuro manipud iti daytoy a Mensahe
Ilawlawag ni Presidente Eyring a maipakitatayo ti panagyamantayo iti Mangisalakan babaen ti panangibinglay iti ebanghelio kadagiti dadduma. Mabalinyo nga ilawlawag kadagiti sursuruanyo no kasano a pinaraburan ti sagut ti ebanghelio ti panagbiagda. Ibilangyo ti panangawis kadakuada a nainkararagan nga ibagada dagiti tartarigagayanda nga ibinglayan iti sagut ti ebanghelio ken no kasano a maaramidda ti kasta.