Pagdugang sa Kalampusan
Ang tagsulat nagpuyo sa São Paulo, Brazil.
Paghulagway pinaagi ni J. Beth Jepson
Sa 14 anyos pa ko, ang akong magtutudlo sa physics nakakita sa akong talento sa math ug mipaapil nako sa Brazilian Mathematics Olympiad. Dihay tulo ka mga hugna. Ang una ug ikaduha ipahigayon sa Sabado. Naapil ko sa ikatulo nga hugna ug himoon kini sa duha ka adlaw, Sabado ug Dominggo.
Akong gisultihan ang akong magtutudlo ug direktor sa Olympiad nga ako dili mokuha sa test sa Dominggo tungod kay adlaw kini sa Ginoo. Ang direktor mihangyo nako sa pagpakigsulti sa akong mga lider sa Simbahan aron makakuha ko sa test sa Dominggo, kay kon ako dili mokuha niini, madiskwalipay ko. Miingon ko mahimong mawala ang tanang butang apan dili lang ang Dios.
Wala ako maguol, tungod kay ako dunay paglaum nga ang Dios mopasidungog niadtong mopasidungog Kaniya. Nahinumdom ko sa Mateo 6:33: “Apan maoy unaha ninyo pagpangita ang gingharian ug ang pagkamatarung gikan sa Dios, ug unya kining tanang mga butanga igadugang ra kaninyo.”
Pipila ka semana ang milabay gikontak namo ang secretary sa Olympiad, kinsa miingon nga dili ko makakuha sa test sa laing adlaw ug nga ako madiskwalipay. Human sa daghang panag-istoryahanay, siya misugyot nga ako mopadala niya og email nga magpasabut sa akong sitwasyon. Human makapadala og email, nag-ampo ko sa Langitnong Amahan ug miingon nga ako mobuhat sa Iyang kabubut-on.
Pagkasunod gabii, nakadawat ko og email gikan sa coordinator nag-ingon nga ako mahimong mokuha sa Dominggo nga test inig ka Lunes sa labing sayon nga panahon alang nako, ug siya gani mitanyag nga ihatag ang test sa akong kaugalingong siyudad aron ako dili makapalta sa klase sa buntag sa eskwelahan.
Human makadawat niining maayong balita, nag-ampo ko aron sa pagpasalamat sa Ginoo tungod kay Siya mitabang nako. Ang akong mga ginikanan miadto sa templo aron sa pagpasalamat.
Sa dihang miabut ang resulta sa test, nakadawat ko og gold medal. Ang Ginoo mopasidungog niadtong mopasidungog Kaniya.