Pag-andam og mga Gasa alang sa Inyong Umaabut nga Pamilya
Gikan sa usa ka debosyonal nga pakigpulong, “Gifts of Love,” nga gipamulong sa Brigham Young University niadtong Disyembre 16, 1980. Alang sa kompleto nga teksto sa Iningles, adto sa speeches.byu.edu.
Karong tuiga, pagsugod sa pagpalambo og pipila ka mga gasa—talagsaong mga gasa—alang sa inyong umaabut nga pamilya.
Mga paghulagway sa litrato pinaagi ni Cody Bell
Kanunay kong nag-daydream nga mahimong dakong tighatag og gasa. Naghunahuna ko nga ang mga tawo nag-abli sa akong mga gasa ug nagpakita uban sa luha sa kalipay ug pahiyom nga ang paghatag, dili lang ang gasa, nakatandog sa ilang kasingkasing. Mahimong nag-daydream pud mo niana. Daghan kaninyo tingali eksperto na sa paghatag og gasa.
Adunay usa ka butang nga inyong mabuhat karong tuiga aron masugdan nga kamo mismo mahimong mas maayo nga tighatag. Gani, isip mga estudyante, kamo adunay espesyal nga mga kahigayunan. Makasugod mo sa pagtipig og mga gasa—talagsaong mga gasa—sa hinay-hinay alang sa inyong umaabut nga pamilya. Tuguti ko sa pagsulti kaninyo mahitungod niini.
Pagsulat og Papel para sa Eskwelahan
Mahimo ninyong sugdan sa inyong kwarto karon. Aduna bay school paper nga nahimutang sa tipiganan? (Naghunahuna ko nga adunay tipiganan didto, tingali kahibalo ko sa inyong kwarto.) Tingali kini naka-type na ug andam na nga isumiter. Nganong paninduton pa gyud kini? Akong nakat-unan kon ngano atol sa klase sa relihiyon nga akong gitudlo kausa sa Ricks College (karon Brigham Young University–Idaho). Gitudlo nako ang seksyon 25 sa Doktrina ug mga Pakigsaad. Niana nga seksyon gisugo si Emma Smith nga kinahanglan niyang mogahin og panahon sa “pagsulat, ug sa daghan nga pagtuon” (bersikulo 8). Sa mga ikatulo nga hanay sa likod naglingkod ang babaye nga bulagaw og buhok kansang kilay nangunut sa dihang akong giawhag ang klase nga magmakugihon sa pagpalambo og kahanas sa pagsulat. Iyang giisa ang iyang kamot ug miingon, “Dili kana angay para nako. Ang ako ra gyung masulat mao ang mga sulat ngadto sa akong mga anak.” Kana nakapatawa sa tibuok klase. Nagtan-aw kaniya akong nahunahuna ang mga kiat nga mga bata palibut kaniya, ug gani akong makita ang mga sulat nga iyang masulat. Tingali ang epektibong pagsulat dili na mahinungdanon para kaniya.
Dayon usa ka batan-ong lalaki mibarug sa may luyo. Gamay ra siya og gisulti atol sa term; dili ko sigurado nga siya nakasulti na ba sukad diha sa klase. Mas maguwang siya kaysa ubang mga estudyante, ug maulawon. Siya mihangyo kon siya makasulti. Misulti siya sa hinay nga tingog nga siya nahimong sundalo sa Vietnam. Usa ka adlaw, abi niya nga wala ray mahitabo, iyang gibilin ang iyang rifle ug milakaw tabok sa gipalig-on nga compound aron mokuha og sulat. Sa dihang nakuha na niya iyang sulat, nakadungog siya sa tingog sa bugle ug mga syagit ug pagpabuto sa mortar ug rifle sa nagsulong nga kaaway. Nakigbisug siya sa iyang mga kaaway aron makuha niya iyang rifle. Uban sa mga tawo nga naluwas, ilang napilde ilang kaaway. Dayon milingkod siya uban sa mga buhi, ug pipila sa mga namatay, ug iyang giablihan ang iyang sulat. Gikan kini sa iyang inahan. Ang iyang inahan misulat nga siya adunay espiritwal nga kasinatian nga nagsiguro niya nga siya makauli nga buhi kon siya magmatarung. Sa akong klase, ang lalaki hinay nga miingon, “Kadto nga sulat nahimong kasulatan para nako.” Ug milingkod siya.
Kamo makabaton og anak sa umaabut, tingali usa ka anak nga lalaki. Makita ba ninyo ang iyang dagway? Inyo bang makita siya sa usa ka dapit, usa ka higayon, nga maanaa sa mortal nga kakuyaw? Inyo bang mabati ang kahadlok sa iyang kasingkasing? Kini ba makatandog kaninyo? Gusto ba ninyong motabang kutob sa mahimo? Unsay angay nga isakripisyo aron masulat ang gustong ipaabut sa inyong kasingkasing? Sugdi ang praktis karong hapon. Balik sa inyong kwarto ug isulat ug basaha ug usaba og sulat ang papel sa makadaghan. Daw dili kini sakripisyo kon inyong hunahunaon kana nga lalaki, mabati ang iyang kasingkasing, ug maghunahuna sa mga sulat nga iyang gikinahanglan sa umaabut.
Pagsulbad sa mga Problema sa Math
Karon, pipila kaninyo tingali wala pay papel nga nagpaabut kaninyo. Tingali kini usa ka libro sa eskwelahan nga may problema sa math. Tuguti ko sa pagsulti kaninyo mahitungod sa usa ka adlaw sa inyong umaabut. Kamo makabaton og tin-edyer nga anak nga moingon, “Dili ko ganahang moeskwela.” Human sa mabinationg pagpaminaw, inyong masayran nga dili eskwela o gani math ang dili niya ganahan—kini mao ang pagbati sa kapakyasan.
Husto ninyong maila kadtong mga pagbati, ug kamo matandog; gusto ninyong motabang kutob sa mahimo. Mao nga inyong ablihan ang libro ug moingon, “Dungan natong sulbaron ang problema.” Hunahunaa ang kakurat nga inyong mabati kon inyong masayran nga ang mga problema sa math nga lisud sulbaron kaniadto mao gihapon ang ilang sulbaron karon. Tingali maghunahuna mo, “Nan, mas mamaayo ang bation sa akong mga anak kon akong ipakita kanila nga dili usab ko kahibalo sa math.” Tuguti ko sa paghatag kaninyo og tambag: ilang makita nga kini bati nga gasa.
Adunay mas maayo nga gasa, apan kini nagkinahanglan og paningkamot karon. Ang akong amahan, sa dihang bata pa siya nakaagi sa sama nga problema ug daghan pang uban. Kadto kabahin sa ekipo nga iyang gikinahanglan aron mahimong scientist nga nakahimo og dakong kaayohan sa chemistry. Nakahimo usab siya og dakong epekto kanako. Ang among kwarto sa pamilya dili elegante sama sa uban. Kini adunay usa ka matang sa kasangkapan—mga lingkuranan—ug usa ka dekorasyon sa bong-bong—usa ka berde nga pisara. Miabut ko sa edad sama sa edad sa inyong anak. Wala ko maghunahuna kon makasulbad ba ko og mga problema sa math; napamatud-an na nako nga dili. Ug pipila sa akong mga magtutudlo kontento na usab nga kana tinuod.
Apan si Papa wala makontento. Siya naghunahuna nga makahimo ko niini. Busa nagpuli-puli mi sa pisara. Dili nako kahinumdom sa mga gasa nga giputos ug gihatag ni papa nako. Apan nakahinumdom ko sa pisara ug sa iyang hinay nga tingog. Ang iyang pagtulun-an sobra pa sa kahibalo nga akong gikinahanglan ug sa pag-amuma nako. Sobra pa sa kaandam sa paggahin sa iyang panahon, bisan bililhon kini kaayo. Iyang gipahimuslan ang iyang panahon sa una nga anaa usab ninyo karon. Tungod kay migahin siya og panahon sa una, siya ug ako adunay panahon diha sa pisara ug iya kong gitabangan.
Ug tungod kay gihatagan ko niya niana, ang akong anak nga lalaki natudloan usab nako sulod sa usa ka tuig. Dungan namong gisulbad ang sama nga problema sa math. Ug misulat ang iyang magtutudlo sa iyang kard “dakong kalamboan”. Apan sultian ko kamo kon unsa ang milambo pag-ayo: ang mga pagbati nianang buotang bata kabahin sa iyang kaugalingon. Walay koy mabutang ubos sa Christmas tree para kang Stuart gawas sa kahigayunan para sa kabilin sa pamilya nga mao ang pagpasigarbo sa iyang nabuhat.
Pagkat-on sa Art ug Musika
Tingali adunay pipila ka mga estudyante sa art (o sa musika?) ang nagpahiyom. Naghunahuna sila, “Siguradong dili siya makakombinser nako nga adunay tinaguang gasa sa akong wala mahuman nga mga buluhaton. Tuguti kong mosulay. Sa miaging semana mitambong ko og okasyon sa pagpasidungog sa usa ka batan-ong lalaki. Dihay slide show. Gipahinayan ang siga sa mga suga, ug nakaila ko sa duha ka tingog. Usa ka sikat nga mag-aawit sa background, ug ang usa, mao ang narrator, ang amahan sa batan-ong lalaki.
Siguro migahin ang iyang papa og daghang oras sa pag-andam sa mga slide, nagsulat sa makapatandog nga mga pulong, ug dayon gihan-ay ang musika ug mga pulong ngadto sa hustong volume ug timing. Kamo makabaton og anak nga lalaki sa umaabut nga pasidunggan sa samang okasyon, uban sa iyang mga ig-agaw ug mga iyaan ug mga uyuan nga nagtan-aw. Ug uban sa inyong tibuok kasingkasing, gusto ninyo siyang sultian kon unsa siya ug unsa siya nga mamahimo. Kon inyo ba nga mahatag kana nga gasa nag-agad kon inyong mabati ang iyang kasingkasing karon ug natandog ug magsugod sa paglambo og mga kahanas sa pagkamamugnaon nga inyong gikinahanglan. Ug kini mas mahinungdanon karon kaysa inyong gituohan, ako mosaad kaninyo.
Paghinulsol Karon
Adunay usa pa ka gasa nga mahimo ninyong sugdan og hatag samtang bata pa. Ako kining nakita sa dihang bishop ko. Usa ka batan-ong lalaki milingkod atubangan sa akong lamesa. Siya naghisgot sa mga sayop nga iyang nahimo. Ug naghisgot siya kon unsa niya kaganahan nga makabaton og mga anak sa umaabut nga adunay amahan kinsa mogamit sa iyang priesthood ug ma-sealed sila sa kahangturan. Siya miingon nga siya nasayud sa dakong bayad ug kasakit sa paghinulsol. Ug dayon misulti siya og usa ka butang nga dili nako makalimtan: “Bishop, mobalik ko. Buhaton nako ang tanan. Mobalik ko.” Mibati siya og kasubo. Ug siy adunay hugot nga pagtuo kang Kristo. Ug gihapon milungtad kini og pipila ka bulan sa masakit nga paningkamot.
Ug sa usa ka dapit adunay pamilya nga may matarung nga naghupot sa priesthood nga nagdumala niini. Sila adunay mahangturong paglaum ug kalinaw sa kalibutan. Tingali malipayon niyang hatagan ang iyang pamilya og lain-laing mga gasa nga maputos, apan walay butang nga mas importante kaysa kadtong iyang gisugdan sa dugay nang panahon diha sa akong opisina ug wala siya mohunong sa paghatag niini. Iyang nabati ang panginahanglan sa mga bata nga iyang gipangandoy, ug sayo ug libre niya kining gihatag. Iyang gisakripisyo ang iyang garbo ug katapulan ug pagkadili sensitibo sa mga pagbati. Sigurado kong dili na kini sakripisyo karon.
Iyang mahatag kana nga gasa tungod sa laing gasa nga gihatag sa dugay nang panahon. Ang Dios nga Amahan mihatag sa Iyang Anak, ug si Jesukristo mihatag kanato sa Pag-ula, ang labing mahinungdanon sa tanang mga gasa ug alang sa tanan. Ang Manluluwas mibati sa tanang kasakit ug kasubo sa sala nga masinati natong tanan ug sa tanan nga mabuhi (tan-awa sa Mga Hebreohanon 4:14–16).
Ako mopamatuod kaninyo nga libre, andam, nga gihatag ni Jesus kini nga gasa ngari kanatong tanan. Ug ako mopamatuod kaninyo nga samtang inyong dawaton kana nga gasa, nga gihatag pinaagi sa iyang mahangturong sakripisyo, kini makahatag og hingpit nga kalipay sa tighatag (tan-awa sa Lucas 15:7).
“Nakadawat kamo nga walay bayad, busa panghatag kamo nga walay bayad” (Mateo 10:8). Ako nag-ampo nga kita libreng mohatag. Ako nag-ampo nga kita matandog sa mga pagbati sa uban, nga mohatag kita nga wala’y pagbati sa pagpamugos o magpaabut og balus, ug kita masayud nga ang sakripisyo matam-is kon atong ibahandi ang hingpit nga kalipay nga mahatag niini sa laing kasingkasing.
MGA LITRATO PINAAGI SA iStockphoto/Thinkstock UG Welden C. Andersen