Moroni 10:32

Ang tema sa Mutual karong tuiga mao ang imbitasyon gikan ni Moroni sa pagsunod sa Manluluwas.

32 Oo, duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo; ug kon pinaagi sa grasya sa Dios kamo mahingpit diha ni Kristo, kamo dili makahimo sa paglimud sa gahum sa Dios.

Duol ngadto kang Kristo

Ang mga kasulatan naglangkob og daghang imbitasyon sa pagduol ngadto kang Kristo. Tan-awa ang pipila ka mga ehemplo nga gilista sa ubos. Unsa ang gitudlo niini nga mga kasulatan kaninyo mahitungod sa mga panalangin sa pagduol ngadto sa Manluluwas? Makakita pa ba mo og dugang mga kasulatan kabahin niining imbitasyon?

Paghingpit diha Kaniya

“Dili kita magguol kon ang atong kinasingkasing nga mga paningkamot ngadto sa pagkahingpit karon ingon og malisud kaayo ug walay katapusan. Ang kahingpitan dili pa mahitabo dinhi. Hingpit kini nga mahitabo inigkahuman lang sa Pagkabanhaw ug pinaagi lang sa Ginoo. Madawat kini sa tanang naghigugma kaniya ug nagsunod sa iyang mga sugo.”

Elder Russell M. Nelson sa Korum sa Napulog Duha ka mga Apostoles, “Perfection Pending,” Ensign, Nob. 1995, 88.

Mohigugma sa Dios

Unsaon ninyo pagpakita sa Langitnong Amahan nga gihigugma ninyo Siya? Ikonsiderar kini nga mga ideya ug dugangi kini sa inyong mahunahunaan. Sa inyong journal, isulat kon unsay inyong buhaton.

Pagsunod sa kasugoan.
Paghigugma ug pagserbisyo sa uban.
Pagtuman sa mga responsibilidad sa Simbahan.
Pag-ampo sa kinasingkasing.

Ang Iyang Grasya Igo alang Kaninyo

“Giakusahan sa pipila ka mga Kristiyano ang mga Santos sa Ulahing mga Adlaw … nga gibaliwala ang grasya sa Dios pinaagi sa pag-angkon nga sila maluwas pinaagi sa pagpaningkamot. Atong tubagon kining pasangil … , ‘Kay kami nagkugi … sa pagdasig sa among mga anak … sa pagtuo kang Kristo, ug aron makig-uli sa Dios; kay kami nasayud nga pinaagi sa grasya kami maluwas, human sa tanan nga atong mabuhat’ (2 Ne. 25:23). Ug unsa ang ‘human sa tanan nga atong mabuhat’? Siguradong naglakip kini sa paghinulsol (tan-awa sa Alma 24:11) ug bunyag, pagsunod sa kasugoan, ug paglahutay sa katapusan.”

Elder Dallin H. Oaks sa Korum sa Napulog Duha ka mga Apostoles, “Have You Been Saved?” Liahona, Hulyo 1998, 68.

Grasya

“Ang pulong grasya, ingon nga gigamit diha sa mga kasulatan, nagpasabut og una ngadto sa balaanong panabang ug kalig-on nga atong madawat pinaagi sa Pag-ula ni Ginoong Jesukristo.”

Matinud-anon sa Tinuhoan: Usa ka Pakisayran sa Ebanghelyo (2004), 43.

Mahingpit diha ni Kristo

Ang Hingpit, sumala sa paggamit diha sa kasulatan, nagpasabut nga “sangkap, tibuok, ug bug-os nga paglambo; lubos nga matarung. Ang hingpit mahimo usab nga sabton nga walay sala o dautan. Si Kristo mao ang puno sa kahingpitan. Ang tinuod nga mga sumusunod ni Kristo mahimo nga hingpit pinaagi sa grasya ug pag-ula” (Giya ngadto sa mga Kasulatan, “Hingpit,” scriptures.lds.org).

Dili makahimo

Dili makahimo—Walay paagi o wala gayud.

Graphic pinaagi sa The Design Farm