Sa Unsang Paagi Nga ang Pagkaila sa Dios nga Kapangulohan Makausab Kanako?
Lima ka mga baruganan kabahin sa Dios nga Kapangulohan makahimo og kaayohan sa inyong pagpakabuhi.
Si Joseph Smith mitudlo: “Kini ang una nga baruganan sa Ebanghelyo nga makahibalo sa tinuod nga kinaiya sa Dios”1 Unsay atong nahibaloan mahitungod sa Dios nga Kapangulohan makausab sa pamaagi sa atong pagpakabuhi, dili lamang sa dagko nga mga butang apan sa gagmay, inadlaw nga mga butang. Hunahunaa kon sa unsang paagi ang inyong kahibalo sa Dios nga Kapangulohan makaapekto sa inyong kinabuhi samtang magbasa kamo niining lima ka mga baruganan.
Ang Dios nga Kapangulohan nahigugma nato ug gusto sa labing maayo alang nato.
Ang mga miyembro sa Dios nga Kapangulohan mahangturon ug labing gamhanan, apan gusto gihapon Sila nga kita malipayon ug maayo ra. Si President Gordon B. Hinckley (1910–2008) mipamatuod: “Sila interesado kanato, ug kita ang tumong sa Ilang dako nga pagpakabana. Andam sila sa matag usa kanato. Makaduol kita sa Amahan pinaagi sa Anak. Siya ang atong manlalaban didto sa trono sa Dios. Pagkanindot gayud nga kita makasulti ngadto sa Amahan pinaagi sa pangalan sa Anak.”2
Tungod kay ang mga miyembro sa Dios nga Kapangulohan nahigugma nato ug gusto sa labing maayo alang nato, ang atong mga pagpili importante, ilabi na sa gagmayng mga butang nga atong buhaton matag adlaw nga makapaduol nato ngadto Kanila. Walay kinutuban ang atong potensyal, ug ang Dios naglaum sa atong kalampusan, bisan sa gagmay nga mga butang.
Ang Langitnong Amahan mihatag nato sa tanan.
Nasayud kita nga ang Langitnong Amahan mihatag nato sa tanan, mao nga kinahanglan nga magtamud kita sa Iyang nabuhat ug magmapasalamaton. Kon kita mapasalamaton, lahi ang atong paglihok. Si President Thomas S. Monson misaad nga “kita makabayaw sa atong mga kaugalingon ingon man usab sa uban kon kita modumili sa pagpabilin diha sa kalibutan sa negatibo nga hunahuna ug mougmad sulod sa atong mga kasingkasing og usa ka kinaiya nga mapasalamaton.”3
Tungod kay ang tanan nga atong naangkon nagagikan sa Dios (tan-awa sa Mosiah 2:20–21; D&P 59:21), ang atong pagkamapasalamaton makapaandam nato sa pagpakigbahin sa uban. Naglakip kini sa atong panahon ug mga talento ingon man usab atong materyal nga mga panalangin.
Ang Langitnong Amahan maloloy-on.
Ang buhat ug himaya sa Dios mao “ang pagpahinabo sa pagka-imortal ug kinabuhi nga dayon sa tawo” (Moises 1:39). Gusto Siya nga kita magmalapuson, mao nga Siya mitanyag nato og kapasayloan alang sa mga sayop nga atong nahimo. Ang Iyang kalooy naghatag gani og kapasayloan kon masayop kita sa samang sayop pag-usab. Ang Langitnong Amahan, si Jesukristo, ug ang Espiritu Santo makatabang nato nga mausab.
Ang kalooy sa Dios nagtudlo nato nga magmapasayloon. Si President Dieter F. Uchtdorf, Ikaduhang Magtatambag sa Unang Kapangulohan, miingon, “Tungod kay gihigugma kita pag-ayo sa Dios, kinahanglan usab kitang mohigugma ug mopasaylo sa usag usa.”4 Naglakip kini sa pagpasaylo sa atong kaugalingon.
Si Jesukristo nag-antus alang nato.
Pinaagi sa Pag-ula, ang Manluluwas nakasinati sa tanan natong mga kasakit ug kasub-anan (tan-awa sa Alma 7:11–13). Kon kita adunay usa ka lisud nga adlaw ug mibati nga mora og walay usa nga nakasabut, kita masayud nga ang Manluluwas ang makasabut. Ug kon kita adunay nindot nga adlaw ug gustong dunay kasultihan niini, ang Manluluwas anaa para nato. Gusto Siya nga moambit sa atong kalipay sama nga Siya moambit sa atong mga kasakit.
Ang Espiritu Santo naggiya nato.
Si Jesukristo misaad sa Iyang mga Apostoles nga ang Maghuhupay, o ang Espiritu Santo, makig-uban nila kanunay sa pagtudlo ug paghupay nila (tan-awa sa Juan 14:16–17, 26–27). Kita usab makabaton sa gasa sa Espiritu Santo sa paggiya nato. Ug kita makasalig nga ang mga tubag nga ihatag sa Espiritu Santo makatabang nato. Uban sa Iyang direksyon, makakontak kita kanunay sa Dios nga Kapangulohan. Ug samtang magsunod kita sa mga pag-aghat nga atong madawat, mas makaila pa kita Kanila pag-ayo.
Mga Leksyon sa Dominggo
Hilisgutan Niining Bulana: Ang Dios nga Kapangulohan
Mga paghulagway sa litrato pinaagi ni Welden C. Andersen ug Matthew Reier; Ang Unang Panan-awon, ni Del Parson; Si Kristo sa Getsemani, ni Harry Anderson