Alang sa Kalig-on sa Kabatan-onan
Ako sa Kanunay Mohinumdom Kaniya
Ang paagi sa atong pagbalaan sa adlaw nga Igpapahulay mao ang pagpakita sa atong pakigsaad sa paghinumdom kanunay ni Jesukristo.
Paghulagway pinaagi ni Ben Sowards
Nakahinumdom ko, isip usa ka 11 anyos, nga may balaang pagtahud giubanan sa akong bishop ngadto sa chapel sa among bag-ong building sa ward, diin siya milingkod tupad nako sa atubangan sa lamesa sa sakrament. Miingon Siya, “Kabalo ka, Larry, sa dili madugay i-orden ka ngadto sa katungdanan sa deacon sa Aaronic Priesthood. Nakaamgo ka ba unsa ka espesyal nga panalangin ug katungdanan kana?” Miingon siya nako nga ako adunay sagradong responsibilidad sa pagbuhat sama sa gibuhat sa Manluluwas sa paghatag og balaan nga mga simbolo sa sakrament alang sa among kongregasyon. Natandog ko sa kadako sa calling sa priesthood nga akong dawaton.
Gihangyo ko sa akong bishop sa pagmemorya sa duha ka mga pag-ampo sa sakrament ug sa paghunahuna kon sa unsang paagi kini mohaum sa akong kinabuhi. Miingon Siya nga kinahanglan kong maningkamot sa pagbuhat sa mga butang nga gisugo diha sa pag-ampo sa sakrament sa matag usa nato kon ako maglihok alang sa Manluluwas sa paghatag og sakrament ngadto sa uban. Sa akong pagpauli, ang akong amahan mitabang nako sa pagpangita sa mga pag-ampo sa sakrament sa Doktrina ug mga Pakigsaad (20:76–79) ug sa Basahon ni Mormon (Moroni 4; 5). Gibasa nako kini pag-ayo sa unang higayon sa akong kinabuhi. Naminaw ko og maayo samtang kini gibasa diha sa simbahan. Namalandong ko sa mga pulong samtang gipaambit ang pan, apan ang hingpit nga epekto sa pakigsaad sa sakrament naklaro sa dihang nadungog nako kini nga mga pulong sa panalangin sa tubig: “nga sila kanunay mohinumdom kaniya.” Ako nangutana sa akong kaugalingon, “ako sa kanunay nahinumdom ba Kaniya? Unsa ang gipasabut sa kanunay? Unsaon nako sa paghinumdom Kaniya kanunay? Matag higayon nga ako nakadungog niadtong sagrado nga pag-ampo sa sakrament mamalandong ako niining sama nga mga pangutana.
Ang paagi sa atong pagbalaan sa adlaw nga Igpapahulay mao ang pagpakita sa atong mga pakigsaad sa Langitnong Amahan nga kanunay mohinumdom ni Jesukristo. Ang adlaw nga Igpapahulay kinahanglan mahimong pundasyon sa atong paghinumdom Kaniya sa ubang unom ka adlaw sa semana.
Ang Dominggo mao ang adlaw sa paghinay-hinay, pagpalandong ug paghinumdom. Kita motambong sa atong mga miting sa Simbahan; mamalandong sa atong mga kalig-on, mga panalangin, ug mga kasaypanan; mangayo og pasaylo; moambit sa sakrament; ug mamalandong sa pag-antus sa Manluluwas alang nato. Maningkamot kita nga dili mabalda sa bisan unsa nga makapugong nato sa pagsimba Kaniya, kay “niini nga adlaw,” sama sa giingon sa Ginoo, “kamo dili mobuhat og bisan unsa nga butang” (D&P 59:13). Bisan unsang kalihokan nga atong apilan sa panahon sa Igpapahulay kinahanglan nga nahisubay sa espiritu sa paghinumdom ni Kristo. Kon ang bisan unsang butang nga atong buhaton sa bisan unsa nga bahin sa adlaw nga Igpapahulay mopalayo nato sa paghinumdom sa Manluluwas ug sa pagpangalagad sa Igpapahulay sama sa Iyang pagpangalagad, nan tingali kinahanglang atong ikonsiderar ang atong gibuhat. Hinumdumi, nga ang Igpapahulay mao ang adlaw nga gitudlo dili lamang “sa pagpahulay gikan sa inyong mga kahago” apan usab “mohatag og mga paghalad sa inyong pag-ampo ngadto sa Labing Halangdon” (D&P 59:10).
Kinahanglan gayud nga atong planohon ang atong mga kinabuhi sa paagi aron walay ikapamalibad nga dili makabalaan sa adlaw sa Ginoo. Kini ang adlaw sa Iyang buluhaton, usa ka adlaw nga ang atong tibuok kinabuhi mapanalanginan ug mabag-o pinaagi sa sagrado nga mga kasinatian sa indibidwal ug uban sa atong pamilya. Kini mao ang adlaw alang sa pagpalambo sa atong espiritu.
Paggahin og panahon karon sa paghimo og maayong plano sa mga butang nga inyong buhaton aron gayud mahimong sagrado ug balaan ang adlaw nga Igpapahulay sa inyong kinabuhi. Dayon buhata ang inyong plano.
Hinumdumi ang talagsaong saad sa Ginoo ngadto niadtong nagtahud sa Igpapahulay: “Ug tungod kay kamo nagbuhat niini nga mga butang uban sa pagpasalamat, uban sa malipayon nga mga kasingkasing ug mga panagway, … ang kahingpitan sa yuta mainyo” (D&P 59:15–16). Makatugot ba kita nga dili madawat kini nga mga panalangin sa atong kinabuhi ug sa kinabuhi sa mga sakop sa atong pamilya?
Ako nagtuo sa pagtahud sa adlaw nga Igpapahulay. Ako maisugon apan mapainubsanong mosaksi nga ang pagsunod sa adlaw nga Igpapahulay usa ka sugo sa atong Dios, nga buhi ug nahigugma sa matag usa nato. Ako mopamatuod nga kon kita mosunod ug mopuyo sa balaan nga sugo sa pagbalaan sa adlaw nga Igpapahulay, ang Ginoo, mopanalangin nato, mogiya nato, ug modasig nato sa pagsulbad sa mga problema nga moabut nato.