Lamharon
Ang Tig-ilinit sang Pag-alagad
Ang tagsulat nagaistar sa Virginia,, Estados Unidos sang Amerika.
Isa ka tig-ilinit nagpaligad ako sang panahon sa iban nga pungsod nga nagatrabaho para sa mga kabataan nga may espesyal nga mga panginahanglan. Sang primero ko nga makilala ang mga kabataan, gin-nerbyos gid ako kaayo. Indi ako makahambal sang ila lenggwahe, apang nagsalig ako nga ang Espiritu maggiya sa akon sa akon mga pagpakig-angot. Sang nakilala ko ang tagsa ka bata, akon narealisar nga ang lenggwahe indi isa ka sablag agud maghigugma. Naghampang ako, nagkadlaw, kag naghimo sang mga handicraft upod ang mga kabataan kag indi mapunggan nga mabatyagan ang tuman nga paghigugma para sa ila. Nakita ko ang paghigugma sang Amay nga Langitnon para sa Iya mga kabataan, kag ang kalipay nga nagpuno sang akon tagipusuon indi sarang malaragway.
Kon nagaalagad ako sa iban, mabatyagan ko ang paghigugma indi lamang para sa ila nga akon ginaalagaran kundi subong man para sa Amay nga Langitnon. Matuodtuod gid nga akon nahibaloan nga “kon yara kamo sa pag-alagad sang inyo mga isig katinuga yara lamang kamo sa pag-alagad sang inyo Dios” (Mosias 2:17). Ang katuyuan sang akon pag-alagad, sa dalagko man nga mga proyekto sang pag-alagad ukon paagi sa magagmay nga mga buhat sang kaayo, amo ang pakahimayaon ang Dios (tan-awa sa Mateo 5:16 ). Nagalaum ako nga sa akon pag-alagad sa iban, makilala sang mga tawo ang akon paghigugma sa Amay nga Langitnon kag ang Kapawa ni Kristo nga nagadabdab sa sulod nakon.