Mensahe sang Unang Panguluhan, Pebrero 2014
Mag-alagad sa Ginuo nga may Paghigugma
Ang Ginuong Jesucristo nagtudlo, “Bisan sin-o ang buot magluwas sang iya kabuhi madula niya ini: apang bisan sin-o ang madulaan sang iya kabuhi bangud sa akon, maluwas niya ini” (Lucas 9:24 ).
“Nagapati ako,” siling ni Pangulong Thomas S. Monson, “ang Manluluwas nagasiling sa aton nga tubtob indi naton madula ang aton mga kaugalingon sa pag-alagad sa iban, gamay gid lang ang katuyuan sang aton kaugalingon nga mga kabuhi. Sila nga nagakabuhi lamang para sa ila mga kaugalingon sa ulihi magakunol kag madulaan sing kabilinggan ang kabuhi, apang sila nga nagahinguyang sang ila kabuhi sa pag-alagad sa iban magatubo kag maga-uswag — kag bilang resulta makasalapo sang (kalipay) sa kabuhi.”1
Sa masunod nga mga pinalip-ot nga mga sinambit gikan sa pag-alagad ni Pangulong Monson,iya ginapahanumdum ang mga Santos sa Ulihing mga Adlaw nga sila ang mga kamot sang Ginuo kag ang mga bugay sang wala’y katapusan nagahulat sa ila nga matutom nga nag-alagad sa iban.
Pag-alagad sa Templo
“Ang dako nga pag-alagad ginahatag kon kita nagahikot sang ordinansa sa pagsalili para sa ila nga nagkalamatay na. Sa madamo nga mga tinion wala kita makahibalo kon para kay sin-o ang aton ginahikot nga buluhaton. Wala kita nagapaabot sang pagpasalamat, kag wala man kita sing kasiguradohan nga pagabatunon nila inang aton ginatanyag. Apang, nagaalagad kita, kag sa sina nga proseso aton maangkon inang isa ka butang nga wala na sing dugang pa nga pagpangabudlay: sa pagkamatuod nagahimo kita nga mga manluluwas sa Bukid nga Sion. Subong nga ang aton Manluluwas naghatag sang Iya kabuhi bilang salili nga sakripisyo para sa aton, kita man, sa magagmay nga mga paagi, nagahimo sing amo man kon kita nagahikot sang salili nga buluhaton sa templo para sa ila nga wala sing ikasarang agud makauswag sa ila pagpanglakaton sa wala’y katubtuban luwas lang kon kita nga yari pa sa duta magabulig sa ila”2
Kita ang mga Kamot sang Dios
“Mga utod ko, napalibutan kita sang mga tawo nga nagakinahanglan sang aton atensyon, aton pagpaisog, aton pagsakdag, aton paglugpay, aton kaayo— sila mahimo nga mga miyembro sang aton panimalay, mga kaabyanan, mga kakilala, ukon mga estranghero. Kita ang mga kamot sang Ginuo diri sa duta, nga may obligasyon sa pag-alagad kag sa pagtib-ong sa Iya mga kabataan. Nagasalig Sia sa tagsa sa aton. …
“Inang pag-alagad sa diin kita tanan gintawag amo ang pag-alagad sa Ginuong Jesucristo.”3
Pag-alagad sa Landong sang Manluluwas
Sa Bag-o nga Kalibutan, ang nabanhaw nga Ginuo nagpahayag, “Inyo nahibal-an ang mga butang nga kinahanglan gid ninyo nga pagahimuon sa akon simbahan; kay ang mga buluhaton nga inyo nakita nga ginahimo ko, ina amo man ang inyo himuon; kay inang inyo nakita nga akon ginahimo, bisan ina man ang inyo himuon.”[3 Nefi 27:21].
Ginabugayan naton ang iban samtang nagaalagad kita sa landong ni “Jesus nga Nazaretnon … nga naglibot nga nagahimo sang kaayuhan.” [Mga Binuhatan 10:38]. Bugayan kita sang Dios nga masalapuan ang kalipay sa pag-alagad sa aton Amay sa Langit sa aton pag-alagad sa Iya mga kabataan sa duta.”4
Ang Panginahanglan sa Pag-alagad
“Kinahanglan kita nga mahatagan sang kahigayunan sa pag-alagad. Para sa mga miyembro nga indi na aktibo ukon nagapangalag-ag kag nagapabilin nga indi makadesisyon sa pagbalik sa simbahan, sarang kita magpangamuyo nga makakita sang pamaagi agud malab-ot sila. Ang pagpangabay sa ila sa pag-alagad sa pila ka calling mahimo nga maghatag sing rason nga kinahanglan nila agud magbalik sa pagka-aktibo. Apang inang mga lideres nga makabulig sa sini nga bagay kon kis-a nagaalaala. Kinahanglan naton pamensaron nga ang tawo sarang magbag-o. Sarang nila bayaan ang ila indi maayo nga mga pamatasan. Sarang sila maghinulsol sa ila mga kalapasan. Sarang sila magkapot sang priesthood sing takos. Kag sarang sila mag-alagad sa Ginuo sing maukod.”5
Ginahimo Bala Naton ang Tanan nga Aton Dapat Himuon?
‘ “Ang kalibutan nagakinahanglan sang aton bulig. Ginahimo Bala Naton ang Tanan nga Aton Dapat Himuon? Nadumduman bala naton ang mga pulong ni Pangulong John Taylor : ‘Kon wala ninyo ginapabaskog ang inyo mga palangakuan, ang Dios magatudlo sa inyo nga responsable para sinang inyo kontani naluwas kon inyo lamang ginhimo ang inyo tulumanon’? [Teachings of Presidents of the Church: John Taylor (2001), 164]. May mga tiil nga dapat pabakuron, mga kamot nga dapat kaptan, mga hunahuna nga dapat paisugon, mga tagipusuon nga dapat palipayon, kag mga kalag nga dapat luwason. Ang mga bugay sang wala’y katapusan nagahulat sa inyo. Inyo ang prebelihiyo nga indi mangin mga tumalan-aw kundi mga pumalasakop sa entablado sang … pag-alagad.”6
© 2014 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang First Presidency Message, February 2014. Hiligaynon. 10862 861
Pagtudlo gikan sa Sining Mensahe
“Kon ikaw may yara sing Cristohanon nga paghigugma, mangin mas handa ikaw sa pagtudlo sang ebanghelyo. Mangin inspirado ka sa pagbulig sa iban nga kilalahon ang Manluluwas kag sundon Sia.”7 Binagbinaga ang pagpangamuyo para sa pagpasangkad sang gugma sa isigkatawo para sa ila nga inyo ginabisita. Kon inyo ginapatubo ang Cristohanon nga paghigugma para sa ila, mas mangin handa kamo sa pag-alagad sa makahulugan nga mga pamaagi alangay sa Ginuo kag sa ila nga inyo ginatudloan.