Mensahe sa Visiting Teaching, Pebrero 2014

Ang Diosnon nga Misyon ni Jesucristo: Ang Maayo nga Manugpahalab

Mapinangamuyuon nga tun-i ini nga materyal kag hibaloa kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, mag-log on sa reliefsociety.lds.org.

Pagtuo, Pamilya, Bulig

Kabahin ini sang sunod-sunod nga mga Mensahe sa Visiting Teaching nga nagapakita sang mga aspeto sang misyon sang Manluluwas.

Si Jesucristo, ang Maayong Manugpahalab, nagtudlo:

“Sin-o bala sa inyo ang tawo, nga may isa ka gatus ka carnero, kon madula ang isa sa ila, nga indi magbiya sang kasiaman kag siam sa kamingawan, kag magpangita sang nadula, tubtob nga makita niya ini?

“Nagasiling ako sa inyo, nga … may kalipay sa langit bangud sa isa ka makasasala nga nagahinulsol” (Lucas 15:4, 7).

Kon aton mahangpan nga si Jesucristo amo ang Maayong Manugpahalab, magadugang ang aton kaluyag sa pagsunod sang Iya ehemplo kag sa pag-alagad sa ila nga nagakinahanglan. Si Jesus nagsiling: “Ako ang maayong manugpahalab, kilala ko ang akon, kag ang akon nakakilala sa akon. … Kag ako nagahatag sang akon kabuhi tungod sang mga carnero” (Juan 10:14–15). Tungod sang Pagpasag-uli ni Cristo, wala sing bisan isa sa aton nga madula nga indi naton makita ang dalan pabalik (tan-awa sa Lucas 15).

Si President Thomas S. Monson nagsiling, “Aton ang responsibilidad nga magtatap sa panong. … Kabay nga himuon naton ini.”¹

Gikan sa Balaan nga mga Kasulatan

Salmo 23; Isaias 40:11; Mosias 26:21

Gikan sa Aton Kasaysayan

Si Elizabeth Ann Whitney, nga nagtambong sa pinakauna nga miting sa Relief Society, nagsugid sang iya pagkahaylo sang tuig 1830: “Sang akon gid pagkabati sang Ebanghelyo subong sa gintudlo sang mga Elders, akon nahibaloan nga ini tingug sang Maayong Manugpahalab.”² Ginsunod ni Elizabeth ang tingug sang Maayong Manugpahalab kag sia ginbunyagan kag ginkompirmahan.

Kita man sarang magpamati sa tingug sang Maayong Manugpahalab kag magpaambit sa iban ang iya mga pinanudlo. Si Pangulong Monson nagsiling, “Kita ang mga kamot sang Ginuo diri sa duta, nga ginasugo sa pag-alagad kag sa pagtib-ong sang Iya mga kabataan.”³

Pareho sang manugpahalab nga nagpangita sang iya nadula nga carnero, ang mga ginikanan sarang man magpabalik sang ila anak nga wala nagasunod sang pinanudlo sang ebanghelyo. Si Pangulong James E. Faust (1920–2007), Ikaduhang Manuglaygay sa Unang Panguluhan, nagsiling: “Sa mga ginasubuan nga mga ginikanan nga nangin matarong, maukod, kag mapinangamuyuon sa pagtudlo sa ila indi-matinumanon nga mga anak, kami nagasiling sa inyo, ang Maayong Manugpahalab nagabantay sa ila. Ang Dios nakahibalo kag nakahangop sa inyo madalom nga kasulub-on. May yara sing paglaum.”⁴

© 2014 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang Visiting Teaching Message, February 2014. Hiligaynon. 10862 861

Mga Tanda

1. Thomas S. Monson, “Heavenly Homes, Forever Families,” Liahona, Hunyo 2006, 70.

2. Elizabeth Ann Whitney, sa Daughters in My Kingdom: The History and Work of Relief Society (2011), 128.

3. Thomas S. Monson, “Ano ang Akon Nahimo para sa Isa ka Tawo Sini nga Adlaw? Liahona, Nob. 2009, 86.

4. James E. Faust, “Dear Are the Sheep That Have Wandered,” Liahona, Mayo 2003, 68.

Ano ang Sarang Ko Mahimo?

1. Paano ang ihibalo nga ang Manluluwas amo ang Maayong Manugpahalab magadala sang kalinong sa aton mga kabuhi?

2. Sa ano nga mga pamaagi kita sarang mag-alagad sa ila nga “nadula” gikan sa pagkaaktibo sa Simbahan ukon sa indi mga miyembro?

3. Paano ko sarang masakdag ang mga ginikanan nga ang kabataan wala nagatuman sang mga pinanundlo sang ebanghelyo?