សារលិខិតបង្រៀនសួរសុខទុក្ខ ខែ កុម្ភៈ ឆ្នាំ 2014

បេសកកម្មដ៏ទេវភាពរបស់ព្រះយេស៊ូវគ្រីស្ទ ៖ អ្នកគង្វាលល្អ

សូមសិក្សាឯកសារនេះ ហើយស្វែងរកដើម្បីបានដឹងនូវអ្វីដែលត្រូវចែកចាយប្រកបដោយការអធិស្ឋាន ។ តើការយល់ដឹងពីឆាកជីវិត និង បេសកកម្មរបស់ព្រះអង្គសង្គ្រោះ នឹងពង្រឹងដល់សេចក្ដីជំនឿរបស់អ្នកលើទ្រង់ ហើយប្រទានពរដល់ជន ដែលអ្នកមើលថែតាមរយៈការបង្រៀនសួរសុខទុក្ខដោយរបៀបណា ? ចំពោះព័ត៌មានបន្ថែម សូមចូលទៅ reliefsociety.lds.org ។

សេចក្ដីជំនឿ ក្រុមគ្រួសារ ការសង្គ្រោះ

ព្រះយេស៊ូវគ្រីស្ទ ជាអ្នកគង្វាលល្អ បានបង្រៀនថា ៖

« ក្នុងចំណោមពួកអ្នករាល់គ្នា បើអ្នកណាមានចៀមមួយរយ តែបាត់មួយ តើមិនទុកចៀមកៅសិបប្រាំបួន ឲ្យនៅទីរហោស្ថាន ដើម្បីទៅតាមរកចៀមមួយដែលបាត់ ទាល់តែឃើញទេឬអី ? …

« ខ្ញុំប្រាប់អ្នករាល់គ្នាថា…នៅឋានសួគ៌នឹងមានសេចក្តីអំណរយ៉ាងនោះដែរ ដោយសារមនុស្សបាបតែម្នាក់បានប្រែចិត្តវិញ »(លូកា 15:4, 7) ។

នៅពេលយើងបានយល់ថា ព្រះយេស៊ូវគ្រីស្ទគឺជាអ្នកគង្វាលល្អ នោះឆន្ទៈ របស់យើងនឹងកើនឡើង ដើម្បីធ្វើតាមគំរូរបស់ទ្រង់ ហើយបម្រើដល់អ្នកដែលត្រូវការ ។ ព្រះយេស៊ូវមានបន្ទូលថា ៖ ខ្ញុំជាអ្នកគង្វាលល្អ ខ្ញុំស្គាល់ចៀមរបស់ខ្ញុំ ហើយចៀមក៏ស្គាល់ ។ …ខ្ញុំស៊ូប្តូរជីវិតខ្ញុំនឹងចៀម » (យ៉ូហាន 10:14–15) ។ ដោយសារដង្វាយធួនរបស់ព្រះគ្រីស្ទ នោះគ្មានពួកយើងណាម្នាក់នឹងវង្វេង ថាយើងមិនអាចស្វែងរកផ្លូវទៅផ្ទះរបស់យើងវិញឡើយ ( សូមមើលលូកា 15) ។

ប្រធាន ថូម៉ាស អេស ម៉នសុន បានមានប្រសាសន៍ថា « ទំនួលខុសត្រូវរបស់យើងគឺមើលថែទាំហ្វូងចៀមនោះ ។ …សូមឲ្យយើងឈានទៅមុខដើម្បីបម្រើ » ។¹

ចេញពីព្រះគម្ពីរ

ទំនុកតម្កើង 23; អេសាយ 40:11; ម៉ូសាយ 26:21

ចេញពីប្រវត្តិសាស្ត្ររបស់យើង

អេលីស្សបែត អាន វីតនី ដែលបានចូលរួមការប្រជុំថ្នាក់សមាគមសង្គ្រោះមុនគេ បានមានប្រសាសន៍ពីការផ្លាស់ប្រែចិត្តរបស់គាត់នៅឆ្នាំ 1830 ថា ៖ « ចាប់តាំងពីខ្ញុំស្គាល់ដំណឹងល្អនេះ ដែលអែលឌើរបានបង្រៀន នោះខ្ញុំបានដឹងថាវាគឺជាសំឡេងនៃអ្នកគង្វាលល្អ » ។²អេលីស្សបែត បានធ្វើតាមសំឡេងនៃអ្នកគង្វាលល្អ ហើយបានជ្រមុជទឹក និងទទួលពិធី បញ្ជាក់ ។

យើងអាចស្តាប់តាមសំឡេងនៃអ្នកគង្វាលល្អ ហើយចែកចាយការបង្រៀនរបស់ទ្រង់ជាមួយមនុស្សដទៃបានផងដែរ ។ ប្រធាន ម៉នសុន មានប្រសាសន៍ថា « យើងគឺជាព្រះហស្ដរបស់ព្រះអម្ចាស់នៅលើផែនដីនេះ ដោយមានបញ្ជាឲ្យបម្រើ និង ជួយកូនចៅទ្រង់ » ។³

ដូចដែលអ្នកគង្វាលរុករកចៀមដែលបាត់ នោះឪពុកម្តាយអាចស្វែងរកកូនដែលបានវង្វេងផងដែរ ។ ប្រធាន ជេមស៍ អ៊ី ហ្វោស្ត ( 1920–2007 ) ទីប្រឹក្សាទីពីរនៃគណៈប្រធានទីមួយ បានមានប្រសាសន៍ថា ៖ « ចំពោះឪពុកម្តាយដែលខូចចិត្ត ដែលមានភាពសុចរិត ភាពឧស្សាហ៍ និង ពេញដោយការអធិស្ឋាន ដើម្បីបង្រៀនកូនដែលមិនស្តាប់បង្គាប់ យើងសូមនិយាយទៅកាន់អ្នកថា អ្នកគង្វាលល្អកំពុងមើលថែទាំពួកគាត់ ។ ព្រះទ្រង់ជ្រាប ហើយយល់ពីទុក្ខសោកដ៏ធំធេងរបស់អ្នក ។ នៅមានសេចក្ដីសង្ឃឹម » ។⁴

© 2014 ដោយIntellectual Reserve, Inc. រក្សាសិទ្ធិគ្រប់យ៉ាង ។ បោះពុម្ពនៅស.រ.អា. ។ អនុមតិជាភាសាអង់គ្លេស ៖ 6/13 ។ អនុមតិការបកប្រែ ៖ 6/13 ។ ការបកប្រែនៃ Visiting Teaching Message, February 2014. Cambodian. 10862 258

តើខ្ញុំអាចធ្វើអ្វីបាន ?

តើការដឹងថាព្រះអង្គសង្គ្រោះគឺជាអ្នកគង្វាលល្អ នាំឲ្យមានសន្តិភាពមកក្នុងជីវិតរបស់យើងយ៉ាងដូចម្តេច ?
តើយើងអាចបម្រើដល់អ្នកដែល « វង្វេង » ចេញពីសកម្មភាពសាសនាចក្រ ឬ អ្នកដែលមិនរួមជំនឿជាមួយយើងតាមរបៀបណាខ្លះ ?
តើខ្ញុំអាចគាំទ្រឪពុកម្តាយដែលមានកូនវង្វេងចេញពីការរស់នៅតាមដំណឹងល្អដោយរបៀបណា ?