សារលិខិតគណៈប្រធានទីមួយ ខែ កុម្ភៈ ឆ្នាំ 2014

បម្រើព្រះអម្ចាស់ដោយសេចក្តីស្រឡាញ់

ដោយ ប្រធាន ថូម៉ាស អេស ម៉នសុន

ព្រះអម្ចាស់យេស៊ូវបានបង្រៀនថា « ត្បិតអ្នកណាដែលចង់ឲ្យរួចជីវិត នោះនឹងបាត់ជីវិតទៅ តែអ្នកណាដែលបាត់ជីវិតដោយព្រោះខ្ញុំ នោះនឹងបានជីវិតវិញ »(លូកា 9:24) ។

ប្រធាន ថូម៉ាស អេស ម៉នសុន បានមានប្រសាសន៍ថា ៖ « ខ្ញុំជឿថា ព្រះអង្គសង្គ្រោះ កំពុងតែប្រាប់យើងថា លើកលែងតែយើងលះបង់ខ្លួនយើង ដើម្បីបម្រើដល់អ្នកដទៃ នោះទើបជីវិតរបស់យើងផ្ទាល់នឹងមាននូវគោលបំណងបន្តិចបន្តួចវិញ ។ អ្នកទាំងឡាយណាដែលរស់នៅសម្រាប់តែខ្លួនឯង យូរៗទៅនឹងហួតហែង ហើយមាននិមិត្តរូបជា ការបាត់ជីវិតរបស់ខ្លួន ស្របពេលដែលមនុស្សដែលបំភ្លេចខ្លួនពួកគេ ដើម្បីបម្រើអ្នកដទៃ នឹងរីកចម្រើន ហើយលូតលាស់—និងជាប្រយោជន៏សម្រាប់សង្គ្រោះ ជីវិតរបស់ពួកគេវិញ ។¹

នៅក្នុងការដកស្រង់ខាងក្រោមនេះពីការបម្រើរបស់ប្រធាន ម៉នសុន នោះលោកបានរំឭកពួកបរិសុទ្ធថ្ងៃចុងក្រោយថា ពួកគេគឺជាព្រះហស្តរបស់ព្រះអម្ចាស់ ហើយថាពរជ័យទាំងឡាយនៃភាពអស់កល្បជានិច្ច កំពុងរង់ចាំអស់អ្នកទាំងឡាយណាដែលស្មោះត្រង់បម្រើមនុស្សដទៃ ។

ការបម្រើនៅក្នុងព្រះវិហារបរិសុទ្ធ

« ការបម្រើដ៏អស្ចារ្យត្រូវបានផ្តល់ឲ្យ នៅពេលយើងធ្វើពិធីបរិសុទ្ធជំនួសអ្នកទាំងឡាយណា ដែលលាចាកចោលលោកទៅ ។ នៅក្នុងករណីជាច្រើនយើងមិនបានស្គាល់អ្នកដែលយើងបានធ្វើកិច្ចការឲ្យនោះទេ ។ យើងមិនរំពឹងចង់បានការអរគុណនោះទេ ទាំងពុំបានធានាថាពួកគេនឹងទទួលយកអ្វីដែលបានផ្តល់ឲ្យពួកគេនោះទេ ។ យ៉ាងណាក៏ដោយ យើងបម្រើ ហើយនៅក្នុងដំណើរការនោះ យើងទទួលបានអ្វីដែលយើងមិនអាចទទួលបានតាមវិធីណាផ្សេងបានទៀតទេ ៖ យើងប្រែក្លាយជាអ្នកសង្គ្រោះលើភ្នំស៊ីយ៉ូនពិតប្រាកដ ។ នៅពេលព្រះអង្គសង្គ្រោះរបស់យើងថ្វាយជីវិតរបស់ទ្រង់ ជាការពលិកម្មជំនួសយើង ដូច្នេះយើងត្រូវធ្វើដូចគ្នា ជាកិច្ចការតូចមួយ នៅពេលដែលយើងធ្វើកិច្ចការជំនួសអ្នកស្លាប់នៅក្នុងព្រះវិហារបរិសុទ្ធ សម្រាប់អ្នកទាំងឡាយគ្មានមធ្យោបាយឆ្ពោះទៅមុខ លើកលែងតែមានអ្វីដែលត្រូវបានធ្វើជំនួសពួកគេ តាមរយៈយើងនៅលើផែនដីនេះតែប៉ុណ្ណោះ » ។²

យើងគឺជាព្រះហស្តរបស់ព្រះអម្ចាស់

« បងប្អូនប្រុសស្រីរបស់ខ្ញុំ យើងរស់នៅជុំវិញមនុស្សដែលត្រូវការការយកចិត្តទុកដាក់ ការលើកទឹកចិត្ត ការគាំទ្រ ការលួងលោម និងសេចក្តីសប្បុរសពីយើង—ពួកគេអាចជា សមាជិកនៃគ្រួសារ មិត្តភក្តិ អ្នកស្គាល់មុខ ឬជនប្លែកមុខផ្សេងៗទៀត ។ យើងគឺជាព្រះហស្ដរបស់ព្រះអម្ចាស់នៅលើផែនដីនេះ ដោយមានបញ្ជាឲ្យបម្រើ និង ជួយកូនចៅរបស់ទ្រង់ ។ ទ្រង់ពឹងលើយើងម្នាក់ៗ » ។ …

« ការបម្រើនោះដែលយើងទាំងអស់គ្នាត្រូវបានហៅគឺជា ការបម្រើនៃព្រះអម្ចាស់យេស៊ូវគ្រីស្ទ » ។³

ការបម្រើតាមគំរូរបស់ព្រះអង្គសង្គ្រោះ

នៅក្នុងពិភពលោកថ្មី ព្រះអម្ចាស់ដែលមានព្រះជន្មរស់ឡើងវិញ បានប្រកាសថា « អ្នករាល់គ្នាស្គាល់ការណ៍ទំាងឡាយដែលអ្នករាល់គ្នាត្រូវធ្វើនៅក្នុងសាសនាចក្ររបស់យើង ត្បិតកិច្ចការទំាងឡាយ ដែលអ្នករាល់គ្នាបានឃើញយើងធ្វើយ៉ាងណានោះ អ្នករាល់គ្នាត្រូវធ្វើយ៉ាងនោះដែរ ត្បិតអ្វីៗដែលអ្នករាល់គ្នាបានឃើញយើងធ្វើយ៉ាងណានោះ អ្នកត្រូវធ្វើតាមយ៉ាងនោះដែរ » [នីហ្វៃទី 3 27:21] ។

« យើងប្រទានពរ ដល់អ្នកដទៃនៅពេលដែលយើងបម្រើតាមគំរូរបស់ « ព្រះយេស៊ូវពីស្រុកណាសារ៉ែត…ដែលបានយាងចុះឡើងធ្វើការល្អ » [ កិច្ចការ 10:38] ។ ព្រះប្រទានពរដល់ពួកយើង ឲ្យស្វែងរកសេចក្តីអំណរក្នុងការបម្រើព្រះវរបិតា ដែលគង់នៅស្ថានសួគ៌ នៅពេលយើងបម្រើកូនចៅរបស់ទ្រង់នៅលើផែនដី » ។⁴

តម្រូវការដើម្បីបម្រើ

« យើងត្រូវទទួលបានឱកាសមួយដើម្បីបម្រើ ។ សម្រាប់សមាជិកទាំងឡាយ ដែលមិនសកម្ម ឬ ដែលស្ទាក់ស្ទើរនឹងសកម្ម យើងអាចស្វែងរកដោយការអធិស្ឋាននូវវិធីសាស្រ្តដើម្បីជួយពួកគេនោះ ។ ការសុំពួកគេឲ្យបម្រើ តាមសមត្ថភាពខ្លះអាចជាការលើកទឹកចិត្តដ៏ត្រឹមត្រូវ ដែលពួកគេត្រូវការដើម្បីត្រឡប់មកសកម្មភាពពេញលេញវិញ ។ ប៉ុន្ដែអ្នកដឹកនាំទាំងឡាយ ដែលអាចជួយដោយហៅពួកគេឲ្យបម្រើ ពេលខ្លះគាត់មានការស្ទាក់ស្ទើរដើម្បីធ្វើការនោះទៅវិញ ។ យើងត្រូវចាំថា មនុស្សអាចផ្លាស់ប្ដូរ ។ ពួកគេអាចទុកចោលនូវទម្លាប់អាក្រក់នោះបាន ។ ពួកគេអាចប្រែចិត្តពីការរំលងនោះបាន ។ ពួកគេអាចកាន់បព្វជិតភាពដោយសក្ដិសមបាន ។ ហើយពួកគេអាចបម្រើព្រះអម្ចាស់ដោយឧស្សាហ៍បាន » ។⁵

តើយើងកំពុងធ្វើនូវអ្វីដែលយើងគួរធ្វើឬទេ ?

« ពិភពលោកគឺត្រូវការជំនួយរបស់យើង ។ តើយើងកំពុងធ្វើអ្វីដែលយើងគួរធ្វើឬទេ ? តើយើងចងចាំប្រសាសន៍របស់ប្រធាន យ៉ូហាន ថេលើរ ថា ៖ « បើអ្នកពុំតម្កើងការហៅរបស់អ្នកទេ នោះព្រះនឹងឲ្យអ្នកទទួលខុសត្រូវចំពោះអ្នកទាំងឡាយណាដែលអ្នកអាចនឹងបានសង្គ្រោះពួកគេ បើអ្នកបានធ្វើកាតព្វកិច្ចរបស់អ្នកនោះ ? » [ Teachings of Presidents of the Church: John Taylor ( ឆ្នាំ 2001 ) ទំព័រ 164 ] ។ មានជើងដែលត្រូវទប់ឲ្យឈរនឹង ដៃដែលត្រូវឈោងជួយ ដួងចិត្តដែលត្រូវលើកទឹកចិត្ត គំនិតដែលត្រូវបំផុស និង ព្រលឹងដែលត្រូវសង្គ្រោះ ។ ពរជ័យទាំងឡាយនៃភាពអស់កល្បជានិច្ចកំពុងរង់ចាំអ្នក ។ ឯកសិទ្ធិរបស់អ្នកគឺ ពុំត្រូវធ្វើជាអ្នកស្ដាប់ទេ ប៉ុន្តែធ្វើជាអ្នកចូលរួមនៅលើវេទិការនៃ…ការបម្រើ » ។⁶

© 2014 ដោយIntellectual Reserve, Inc.រក្សាសិទ្ធិគ្រប់យ៉ាង ។ បោះពុម្ពនៅស.រ.អា. ។ អនុមតិជាភាសាអង់គ្លេស ៖ 6/13 ។ អនុមតិការបកប្រែ ៖ 6/13 ។ ការបកប្រែនៃ First Presidency Message, February 2014. Cambodian. 10862 258

ការបង្រៀនចេញពីសារលិខិតនេះ

« បើសិនអ្នកមានក្តីស្រឡាញ់ដូចព្រះគ្រីស្ទ នោះអ្នកនឹងត្រូវបានរៀបចំខ្លួនបានយ៉ាងល្អ ដើម្បីបង្រៀនដំណឹងល្អ ។ អ្នកនឹងត្រូវបានបំផុសគំនិតឲ្យជួយមនុស្សដទៃទៀតដើម្បីស្គាល់ព្រះអង្គសង្គ្រោះ ហើយធ្វើតាមទ្រង់ » ។⁷សូមពិចារណាដោយអធិស្ឋាន ដើម្បីបង្កើនសេចក្តីសប្បុរសដល់អ្នកដែលអ្នកទៅសួរសុខទុក្ខ ។ នៅពេលអ្នកអភិវឌ្ឍសេចក្តីស្រឡាញ់សម្រាប់ពួកគេឲ្យដូចព្រះគ្រីស្ទ នោះការបម្រើរបស់អ្នកកាន់តែមានន័យដល់ ព្រះអម្ចាស់ និង អ្នកដែលអ្នកបង្រៀន ។