Aperaamo

“A o tatou mulimuli i le faataitaiga a Aperaamo, … o le a tatou maua le fiafia sili atu ma le filemu ma le malologa, [ma] o le a tatou maua ai le fiafia o le Atua ma tagata ia i tatou”¹—Peresitene Spencer W. Kimball (1895–1985)

O lou aiga muamua sa i le laueleele vaivaia o Uro i Kaletaia. Sa tapuai tagata o Kaletaia, e aofia ai lo’u tama, i tupua ma ofoina atu taulaga i tagata. Ae na ou talitonu i le Atua moni ma soifua e tasi ma saunia mo le aso e mafai ai ona ou maua le perisitua, e pei ona i ai i ou tuaa.²

I se tasi aso na saisai aʼu e tagata Kaletaia e osi ai le taulaga i luga o le fatafaitaulaga o le atua o Elekana. A o latou sauni e fasioti au, sa ou tatalo i le Atua mo le laveaiga ma sa vave ona tatalaina o’u noataga. Ona fetalai mai lea o le Alii ia te au: “Ma ua Ou faalogoina oe, ma ua Ou sau i lalo e laveai oe, ma aveese oe … i se laueleele ese.”³

Na amata e le Alii ona matuai faamanuiaina au: na ou mauaina le perisitua mai ia Mekisateko,⁴ ma na ma osifeagaiga ma le Alii faapea o le a avea au ma le tama o atunuu e tele, ma o le talalelei o le a faamanuiaina tagata uma e ala mai i a’u fanau. Sa Ia suia lo’u igoa mai ia Aperamo ia Aperaamo, o lona uiga “tama o le vao nuu.”⁵

Na ou aumai lo’u aiga i Kanana, o le laueleele na saunia e le Alii mo i matou.⁶ Na folafola mai e le Alii ia te au o Lana feagaiga e faatatau i la’u fanau o le a faataunuuina e ala i se atalii e fanau mai i lo’u toalua o Sara. Sa le mafai ona maua se ma fanau ma Sara. Ma te le iloa pe faapefea ona mafai ona maua se fanau aua ua ma matuai matutua uma lava—sa 100 ou tausaga ao Sara ua 90.⁷ Ae e pei ona folafola mai e le Alii, sa maua se ma atalii, o Isaako.⁸

I ni nai tausaga mulimuli ane, sa oo mai se tasi tofotofoga sili ona faigata o lo’u olaga. E ui lava ina sa ou molimauina le tiga o le taulaga e fai i tagata, na finagalo le Alii ia ou ofoina atu lou atalii o Isaako o se taulaga. Sa faanoanoa lou loto, ae sa ou faatuatua i le Alii. Ina ua ou aapa atu e fasioti Isaako, na valaau mai se agelu ia te au, ua faapea mai, “Soia le oo lou lima i le tama, … aua ua ou iloa nei ua e mata’u i le Atua, ina ua e le taofia … o lou atalii e toatasi.”⁹ Na saunia e le Alii se mamoe poa e osi ai le taulaga e sui ia Isaako, lea na ma ofoina atu ma Isaako i le Alii.¹⁰

Ona o lo’u usiusitai, na toe faamautinoa mai ai e le Alii Lana feagaiga: “Ou te matua faatoateleina lava lau fanau e pei o fetu o le lagi, … o lau fanau e manuia ai atunuu uma o le lalolagi; aua ua e usiusitai i lau upu.”¹¹