Ua Ou Iloa Nei o Loo I Ai se Atua
Carla Sofia Gavidia, Ontario, Kanata
O ni nai tausaga ua mavae sa ou auauna atu ai o se tagata faigaluega i le Malumalu o Santiago Chile. I se taimi o se tasi sifi afiafi sa amata ona ou iloa ai le faigata ona manava, o lea sa ou talosagaina ai ma le musuā e vave alu.
A o ou savali atu i le tulaga o le nofoaafi, sa ou tatalo o le nofoaafi ou te manaomia o le a i ai iina ina ia ou vave alu i le fale Sa ou manatu sa tali mai la’u tatalo ina ua ou vaai i le nofoaafi e tu i le tulaga. Ae ina ua ou latalata atu i ai, sa ou vaaia le aufaigaluega o le nofoaafi e o faatope atu e fesoasoani i se pasese o loo oso le fatu. Sa tuia e upu o lau viiga e sili ona ou fiafia i ai lo’u mafaufau: “Ua ou faia ea se lelei i le aso?”1 Na vave lava ona uunaia au e fesoasoani.
Sa ou faanatinati atu i le nofoaga na ave i ai e le aufaigaluega le alii talavou e faatali ai mo le taavale a le falemai, ma sa latou faatagaina au e nofo ai. Sa ou tatalo ia iloa le mea e fai ma augani atu i le Tama Faalelagi ina ia faasaoina le ola o le alii talavou. Ou te lei manao e tuua na o ia ma le fefe, o lea sa ou uuina ai lona lima ma taumafai e fesoasoani ia te ia e tumau ai i le toafilemu. Na ou faamautinoa atu ia te ia o loo ia te ia se olaga umi i luma ma e i ai se faamoemoega a le Atua mo ia. Sa ou maua le numera o le telefoni a lona aiga, valaau ia i latou, ma tau atu ia i latou o le latou atalii ua avatu nei i le falemai ma e le o tuulafoaia.
Ina ua taunuu atu fomai, sa ou mulimuli ia te i latou i le taavale a le falemai. Sa ou lagonaina e tatau ona ou nofo faatasi ma le alii talavou seia oo ina taunuu atu lona aiga. O le mea na ou te’i ai, na filifili fomai e tatau ona matou o ma i latou, o lea na ou uuina ai le lima o le alii talavou i le ala atoa i le falemai.
E lei leva ona matou taunuu, sa latou ave o ia i le potu mo faalavelave faafuasei, ma sa ou alu i fafo e sue lona aiga. Ina ua latou o mai, na maligi loimata o lona tina, fusi atu au i ona lima, ma fai mai sa matuai fiafia o ia o loo i ai pea ni tagata lelei i le lalolagi.
O le vaiaso na sosoo ai sa ou maua ai valaau mai le telefoni mai le alii talavou. Na ia fai mai sa fai mai fomai o le tumau i le toafilemu sa taua tele i lena taimi a o lei oo i le falemai.
Seia oo i lena aso, sa le talitonu o ia i le Atua. Sa ou le magagana ina ua ia tagi mai, “Na e laveaia lo’u ola, ma e le uma lo’u faafetai ia te oe! Ua ou iloa nei o loo i ai se Atua.”
Ina ua ou tuua le malumalu i le amataga o lena aso, sa taitaia au e le Agaga i le nofoaga sa’o i le taimi sa’o. Ou te lagona le faafetai i lo tatou Tama Faalelagi mo le taitaiina o au ma le tuuina mai ia te au o le lototele e fai e pei ona fai mai ai le viiga ma le le misia o le avanoa, e tusa lava pe pau le mea e mafai ona ou faia o le uuina o le lima o se tagata ese.