Pe lelei pe a…? E mafai ona ou…?

Saunia e Heidi McConkie

O Heidi McConkie e nofo i Delaware, ISA.

O le mea lenei e mafai ona e faia e iloa ai pe faapefea ona faatatau tulaga faatonuina i le Mo le Malosi o le Autalavou i lou tulaga.

O Brooke P. o Kalefonia, ISA, e mafai ona lagonaina le femoumouai o lana tautinoga—e sili atu ona faigofie le milo faatasi ma lana au. Na faamalosia o ia e isi teine ina ia ofu e pei o i latou mo koleniga ma taaloga.

Ua uma ona filifili Brooke, e manao o ia ina ia tauagafau, ae na te lei iloaina lona uiga mo le taalo ai i lana taaloga. Pe le afaina le ofu e pei o lana au taalo i le na o le taimi lava o taaloga?

”Sa ou filifili e faia se sailiiliga,” o le tala lea a Brooke. “Sa ou vaavaai i Mo le Malosi o le Autalavou, i tusitusiga paia, lauga o le Ekalesia—mea uma sa mafai ona ou maua. E leai se mea na foliga mai e faamatala ai lo’u tulaga tonu ma tuuina mai ia te au se fautuaga patino lava. Ae na ou iloaina e silafia au e le Tama Faalelagi ma sa Ia iloa po o le a le mea e tauagafau.”

O lea na toe gaoioi ai Brooke. “Sa ou filifili loa e tootuli i ou tulivae ma tatalo,” o lana tala lea. A o ia tatalo, sa ia faaali atu lona manao e usiusitai i poloaiga ona fesili atu lea pe o le a le afaina mo ia le ofu e pei o lana au mo a latou koleniga ma taaloga.

Ina ua uma lana tatalo, na lagona e Brooke le faagaeetia faapea e le tatau ona ia suia ana filifiliga o lavalava e faamalie ai lana tupulaga. E ui lava sa le taliaina lana filifiliga, sa maua e Brooke le lototele ma le filemu i le iloaina o lana filifiliga sa faafiafiaina ai le Tama Faalelagi.

O Lau Tala

Atonu e te le’i mauaina oe lava i le faafitauli patino o Brooke, ae atonu na e feagai ma se faafitauli faigata faapena. O loo e faia le mea sili e ola i se tulaga faatonuina faaletalalelei—le tauagafau, o le faaaogaina o gagana e faagaeetia, matamata i faafiafiaga aoga, o le usitaia o le Upu o le Poto, …

Ona BAM! Ua faafaigata e se tasi lou olaga, ma faafuasei lava “ona i ai le faafeagai i mea uma” (2 Nifae 2:11) e sili atu nai lo se fuaitau e masani ona ta’ua mai tusitusiga paia. O au uo—pe atonu foi o tagata o lou lava aiga—ua faatauanau oe e ofu pe tautala po o le amio e ese mai le mea ua e lagonaina e sa’o. E te manao e faia ni filifiliga lelei o le talalelei, ae atonu ua amata ona e lagona le fememea’i: O le a le uiga o le ola ai i tulaga faatonuina i lou olaga? E pei lava o Brooke, e mafai ona e iloa au lava tali i lenei fesili e ala i le suesue, tatalo, ma faaaliga faaletagata lava ia.

Au Fesili

O lou olaga i aso uma e tumu i fesili: O le a le ofu o le a ou faia i le aoga? O le a lau meaai mo le malologa? O ai o le a ma tafafao faatasi? O nisi fesili e i ai lava tali faigofie. Pe tatau ona ou lamuina lenei fasi pulu sa ou maua i luga o le auala savali? Leai. Atonu e te le tau mafaufau faalua e uiga i lena mea. E ui lava, o nisi o au fesili, ae maise lava e uiga i tulaga faatonuina, e mafai ona fai si faigata ona tali: Po o a musika e talafeagai e faalogo i ai? E faapefea ona ou tausia le aso Sapati ia paia? O le mea e lelei ai, e le manaomia lou taumafai e maua uma tali na o oe lava. Ua faataatitia mai e o tatou perofeta soifua tulaga faatonuina o le talalelei, ma e mafai ona e suesue i a latou aoaoga i le Mo le Malosi o le Autalavou.

A uma ona e suesueina tulaga faatonuina, atonu o le a e leiloa tonu pe faapefea ona faaaoga i tulaga uma lava, ma o se mea masani lena. O loo lelei lava oe pe afai e i ai nisi fesili e uiga i se tulaga faatonuina patino mo lou tulaga e lei taliina.

Na o lou mafaufau lava i le tala o le Tusi a Mamona lea na poloaiina ai e le Alii Nifae e fau se vaa. E lei vave ona iloa e Nifae pe faapefea ona usitai i le poloaiga a le Alii, ae sa ia filifili e faataitai pea. Ma na te le’i faatali e saili le fesoasoani; na ia fesili, “O fea ou te alu i ai e mafai ona ou maua mai ai le ʼoa e faaliusuavai, ina ia mafai ona ou faia mai ai ni meafaigaluega e fau ai le vaa?” (1 Nifae 17:9). Na ia amata i le mafaufauina po o le a le laasaga muamua o le a i ai—fai meafaigaluega—ona fesili atu lea i le Alii e fesoasoani ia te ia ia iloa le auala e faia ai lena mea. Na tali mai e le Alii fesili a Nifae (ma mai lea laasaga i lea laasaga na mafai ai ona ia faauma le vaa), ma pe a e taumafai e usitai i poloaiga, e mafai ona Ia taliina foi au fesili.

O Au Tali

A i ai ni au fesili e uiga i le auala e ola ai i se tulaga faatonuina patino po o le usitai i se poloaiga faapitoa, alu muamua i tusitusiga paia, Mo le Malosi o le Autalavou, Faamaoni i le Faatuatua, fautuaga a perofeta, ma le tatalo. E mafai ona e sue mau talafeagai o loo lisiina i tamaitusi po o lauga o konafesi aoao—e mafai foi ona e faalautele atu ia aofia ai mau faaopoopo i lau sailiga. A o e saili le malamalama e ala i le suesueina o le talalelei, o le Agaga Paia o le a “faamalamalama ai [lo’u] malamalamaaga” (Alema 32:28).

E mafai ona e liliu atu foi i tagata o le aiga, uo, ma taitai o le Ekalesia mo se fesoasoani. E mafai ona latou taialaina oe i punaoa aoga, tuuina atu le lagolago ma le faamalosiau, ma e mafai foi ona faasoa mai ni aafiaga patino e uiga i mataupu talitutusa ma pe na faapefea ona latou manumalo i o latou luitau.

O nisi taimi e tusa lava pe ua uma na tatalo, toe faitauina Mo le Malosi o le Autalavou, suesueina tusitusiga paia, ma saili mo fautuaga, atonu o loo e lagonaina o loo e feseseai i se puao o le le mautonu e faatatau i ni tulaga faatonuina faapitoa. E ui lava na e mauaina ni fautuaga lelei, o le faaaogaina i ou tulaga e mafai i nisi taimi ona foliga mai e pei o le taumafai e sue se auala e ala i le faaaogaina o le faafanua o le lalolagi nai lo se faafanua o le auala. I nisi taimi atonu e tatau ona e faia se faaiuga vave e aunoa ma le tau suesueina ma le manatu mamafa i se taimi umi.

I tulaga uma, ia manatua o le tatalo o se punaoa mamana. E le o se auala mulmuli lea; o le tatalo o se nofoaga sili e amata ai lau sailiga mo le malamalama ma se meafaigaluega aoga i le gasologa o le ala. E silafia lelei e Tama faalelagi lou tagata patino—au meaalofa, ou luitau, ou malosiaga, ma au tauiviga. O lea afai e te le iloa pe faapefea ona e iloa le ala sili e mulimuli ai i tulaga faatonuina o le Ekalesia i se tulaga patino, aua e te popolevale. Na te silafia! E faigofie lava ona pau atu i le mailei o le taumafai ia faafetaui le talalelei i lou olaga; ae nai lo lena, e mafai ona Ia faaali ia te oe le auala e faafetaui ai lou olaga i le talalelei. Pe a e tatalo i le faatuatua, o le a Ia aoao oe, ma tuuina atu tali mo na o oe lava “i le minute tonu lava” (MF&F 100:6) e te manaomia ai. O lena avanoa mo faaaliga faaletagata lava ia o se tasi o faamanuiaga maoae ua ia i tatou ona sa tatou papatiso, ma mauaina le meaalofa o le Agaga Paia.

O Lau Faataitaiga

A o e ola i tulaga faatonuina a le Atua, e mafai ona avea oe o se malamalama i isi o loo siomia oe. E mafai ona e uunaia i latou e tausi i poloaiga. Ma afai latou te le mautonu pe faapefea ona usitai, e mafai ona e aoaoina i latou i lenei mamanu mo le sailia o tali i a latou fesili patino.

A o e taumafai e fai se faataitaiga lelei, aua le ofo tele pe afai o nisi taimi o isi—e oo lava ia i latou o loo taumafai e ola i le talalelei—aua e te faia i taimi uma le filifiliga lava lea e tasi e te faia. Afai e te lagona le le fiafia, tau lava ia manatua o se tasi, atonu o Tina po o Tama, e toe manaomia ona aoao atu ia te oe tali i fesili e sili autu—e pei o Pe tatau ona ou lamuina lenei fasi pulu sa ou maua i luga o le auala savali? O lea ia taumafai e onosai ia te oe lava ia ma isi a o tatou galulue e tau mafaufau tali i fesili e faigata teisi, le ituaiga lea e le manaomia ai se tali ioe po o le leai. E faapefea ona ou ola i lenei tulaga faatonuina i lo’u olaga? Ia manatua o i tatou uma o tagata lē atoatoa o loo aoao mai lea aso i lea aso e ola i se talalelei atoatoa ma galulue agai i le faaatoatoaina o i tatou lava. O se faagasologa e faifai pea.

Ma e mafai ona e faia se matafaioi ola i lena faagasologa! Ia sailia ma le mataalia tali i au fesili patino ma uunaia isi ia faia foi faapea. A o e faia lena mea, manatua pea e tusa lava po o a filifiliga a isi, e mafai ona e filifili e tausi poloaiga a le Tama Faalelagi.