O Le Meaalofa o le Aso Fanau a Lau Epikopo

Mariana Cruz, Rio de Janeiro, Pasila

I lo’u aso fanau i se tasi taeao o le Aso Sa, sa ma sauni mo le lotu ma lo’u toalua ae tatagi le telefoni. Sa ou tali atu, ae fai mai le epikopo “Ou te iloa o le asō o lou aso fanau, ae e mafai ona ta feiloai i lo’u ofisa i le 30 minute? Ou te fia talanoa ia te oe.”

I le fiailoa, sa ou faanatinati atu i le lotu.

I lona ofisa, fai mai le epikopo ia te au, «Sister Cruz, o loo i ai sau meaalofa o le aso fanau mo oe. Ua valaauina oe e le Alii e avea ma peresitene o Tamaitai Talavou. Pe e te taliaina lenei valaauga? Sa ou lagona le lofituina, ae na ou taliaina le valaauga. Sa lagolagoina ma vaetofia au i lena aso.

Ina ua ou foi atu i le fale ina ua tuua le lotu, sa ou nofo i luga o lo’u moega. O le mamafatu o le tiutetauave na taia au. Sa ou tagi ma lagona le le agavaa mo le galuega. Oka se tiutetauave e taitai na tamaitai talavou! Sa ou papatiso ina ua 22 ou tausaga ma e lei auai lava i ni gaoioiga a Tamaitai Talavou muamua. E mafai faapefea ona avea au ma peresitene o Tamaitai Talavou?

Sa ou faia le mea e tasi na ou iloa e tatau ona faia—na ou tootuli ma ole atu i le Tama Faalelagi mo le taitaiga i lenei valaauga fou. I lena taimi, sa ou maua ai se aafiaga o le a le galo lava ia te au. A o ou vaai faalemafaufau i tamaitai talavou taitasi, sa ou malamalama o i latou taitasi o se afafine o le Tama Faalelagi. Sa manaomia e i latou taitasi se peresitene e alofa ia te ia, ma mafai ona fesoasoani ia te ia e malamalama i le alofa o le Atua ia te ia. Sa ou vaai i lo’u mafaufau i igoa o tamaitai talavou uma lava ua le toaaga mai (ou te lei feiloai lava i ai), ma sa ou malamalama o i latou foi o afafine o le Tama Faalelagi ma na manaomia lo’u manatu atu. Sa ou lagonaina le malosi o i latou taitoatasi.

Sa le faigofie masina na sosoo ai. Sa ou galue malosi e e faamasani i tamaitai talavou taitasi ma malamalama i ona manaoga. Faatasi ai ma tamaitai talavou e toaaga mai, na fesoasoani le matou au peresitene ia i latou sa le toaaga mai e toe toaaga mai. Sa ou vaaia le aao o le Alii o loo galuega i le tele o auala.

Ina ua faamaloloina au mai lo’u valaauga, sa ou popole atonu sa mafai lava ona sili atu mea ou te faia. Ina ua taunuu atu i le fale, sa ou tootuli ma ole atu i le Tama Faalelagi pe na taliaina la’u auaunaga. Sa ou maua se faalogona matagofie ua faafiafiaina o Ia.

Sa ou mafaufau i tua i lena aso fanau lea na mafai ai ona ou le taliaina le valaauga ona o isi ou tiutetauave uma lava. Ae o au le tagata semanu e tele mea ou te le maua i le le taliaina o le valaauga. Semanu ou te le mauaina le avanoa e aoao ai le lotomaualalo, maua le malamalama, atiina ae le onosai, ma avea ma se meafaigaluega i aao o le Alii. Ae o le mea e sili semanu ou te le mauaina le faatuatuaga o le Alii na Ia tuuina mai ia te au, ma semanu ou te le aoaoina o le avanoa e auauna atu o se meaalofa.