O Se Togalaau e Tumu i Faamanuiaga

Saunia e Linda Pratt

E faavae i se tala moni

ŪŪŪ! ŪŪŪ! ŪŪŪ! Sa tu se pi pisi lanu samasama i se fugalaau i talane o Andrea. Sa ia oso i luga ma faanatinati ese atu. E le fiafia Andrea i pi. Sa alu atu o ia i se isi vaega o le togalaau e vele vao i talane o se laau tamato lauusiusi.

Sa mafanafana le la i le papatua o Andrea. Sa mafai ona ia lagona atu Tina o latalata ane i laina o sana. Na faafuasei lava ona faalogoina e Andrea isi ūūūū. ŪŪŪ! ŪŪŪ! ŪŪŪ! Sa tamoe o ia e sue Tina.

“Ua tele naua pi, Tina! na ia fai mai ai. “Ou te fia galue i le togalaau e aunoa ma ni pi”

“Tatou te manaomia pi ina ia ola ai la tatou togalaau,” o le tala lea a Tina. “Na foafoaina e Iesu pi ina ia feaveaia fatu o laau ina ia mafai ona tatou maua a tatou meaai e fiafia i ai.”

“A aunoa ma pi o le a leai sa tatou faatoaga?” O le fesili lea a Andrea. Sa ia mafaufau e uiga i ana laau uma e fiafia i ai. E fiafia o ia i fugalaau mananaia. E fiafia o ia e ai sitolōperi ma tamato. O le a faanoanoa o ia e ola i se lalolagi e aunoa ma na mea.

“Ou te fiafia na faia e Iesu laau,” o le tala lea a Andrea. “Ua ou fiafia sa Ia faia foi pi!”