Matua Faamaoni ma Fanau Faalogogata Faatumauina o le Faamoemoe Ao Faatoilaloina le Malamalama Sese
O se tasi o mafatiaga sili e mafai ona mafatia ai se matua lototoa i Siona o se tamaitiiti lea e se ese mai ala o le talalelei. O Fesili o le “Aisea?” po o le “O le a sau mea sese na fai?” ma le “E mafai faapefea ona tuuina atu se fesoasoani i lenei tamaitiiti i le taimi nei?” o loo manatunatu ai pea ia mafaufau ma loto o ia matua. O nei alii ma tamaitai o loo tatalo faatauanau, suesue ma le maelega i tusitusiga paia, ma faalogo lelei i le fautuaga a taitai perisitua ma ausilali ao latou liliu atu i le talalelei a Iesu Keriso mo le taitaiga, malosi, ma le toafilemu.
O Faamatalaga mai le Au Pulega Aoao a le Ekalesia o loo faamatalaina ai le faatosinaga a matua faamaoni o fanau faalogogata o loo faaauau pea ona avea o se punavai o le mafanafana sili i aiga.1 E tulai mai le faamafanafanaga mai le faamoemoe lea e foliga mai o loo tau mai e nei savali e faapea o matua o loo faamamaluina feagaiga o le talalelei, usitai i poloaiga a le Alii, ma auauna atu ma le faamaoni e mafai ona uunaia le faaolataga o o latou atalii ma afafine o e ua se ese. Ae peitai, o le faauigaga o nei faamatalaga e nisi o tagata o le Ekalesia ua saofaga atu i se fuataga o le malamalama sese i aoaoga faavae. O le fenumiai e pogai mai le le tutusa o nei faauigaga ma le aoaoga faavae o le Togiola a Iesu Keriso ma mataupu faavae o le faitalia ma le tali atu o le tagata lava ia mo agasala ma soligatulafono.
O se iloiloga o upumoni o loo faamamafaina soo i tusitusiga faavae, iloiloga o aoaoga manino mai aposetolo ma perofeta o ona po nei, ma faamaoniga talafeagai mai faamaumauga o talafaasolopito o le Ekalesia e mafai ona faatumauina ai le faamoemoe a o talanoaina mea o loo malamalama sese ai.
Folafolaga Faaperofeta e uiga i Fanau
Na faaali mai le upusii lenei i Aoaoga a le Perofeta o Iosefa Samita, tuufaatasia e le Perofeta o Iosefa Filitia Samita i le taimi o lana auaunaga o se tusitalafaamaumau ma tusitalafaasolopito o le Ekalesia: “Pe a tuu i luga o le tama ma le tina se faamaufaailoga, na te malupuipuia a la fanau, ina ia le mafai ona leiloloa i latou, ae o le a faasaoina ona o le feagaiga a lo latou tama ma le tina.”2
O se aoaoga talitutusa, na faatatau lava i le faamatalaga a le Perofeta o Iosefa, na faia e Elder Orson F. Whitney (1855–1931) o le Korama a Aposetolo e Toasefululua i le 1929: “Sa tautino mai e le Perofeta o Iosefa Samita–ma na te le i aoaoina mai se aoaoga faavae e sili atu ona faamafanafana loto i lo lenei–o le faamauga e faavavau o matua faamaoni ma folafolaga paia ua tuuina atu ia i laua mo auaunaga lototoa i le Galuega o le Upumoni, e le gata ina faasaoina ai i laua, ae faapena foi a laua fanau. E ui lava atonu o le a se ese nisi o mamoe, ae o loo silasila mai pea fofoga o le Leoleo Mamoe ia te i latou, ma o le a i ai se taimi, latou te lagona ai le aapa atu o aao alofa o le Atua ia te i latou ma aumaia i latou i le lafu. Po o le olaga nei po o le olaga a sau, o le a latou foi mai lava. E tatau ona latou totogiina a latou aitalafu i le faamasinoga tonu; o le a latou mafatia mo a latou agasala; ma atonu foi latou te ui atu i se ala matuitui; ae afai e taitaiina mulimuli ane ai i latou, e pei o le atalii Faamaumau Oa na salamo, i se tama alofa ma le loto faamagalo ma le aiga, ona aoga ai lea o mea tiga na oo i ai. Tatalo mo a outou fanau faatamala ma lē usiusitai; uumau ia i latou ma lou faatuatua. Faamoemoe i ai, talitonu i ai, seia e vaai i le faaolataga a le Atua.”3
O faamatalaga mai ia Iosefa Samita ma Orson F. Whitney ua faauigaina e nisi o tagata o le Ekalesia e faapea o fanau faalogogata e maua atoa ia faamanuiaga o le faaolataga ona o le faamaoni ma e auala atu i le faamaoni o matua. Peitai, na suia lenei faauigaga e le mea moni e faapea o le tala aupito sili ona atoatoa o le lauga a le Perofeta sa lei mauaina e tusi talafaasolopito o le Ekalesia i le taimi sa latou tuufaatasia ai se lomiga tuufaatasi o ana aoaoga mai faamatalaga a Willard Richards ma William Clayton. I se seti e sili atu ona atoatoa o faamatalaga na tusia e Howard ma Martha Coray, o loo faaalia ai le faamaoniaina e Iosefa Samita o lana saunoaga e faalagolago le mauaina o faamanuiaga folafolaina i le usiusitai o le fanau:
“Pe a [faamauina] se tama ma se tina o se aiga, o le la fanau e lei solitulafono ua malupuipuia i le faamaufaailoga lea na faamauina ai Matua. Ma o le Tautoga lenei a le Atua i lo tatou Tama o Aperaamo ma o le a tumau e faavavau lenei aoaoga faavae.”4
O lenei faamalamalamaga e sili atu lona tumau faaleaoaoga faavae. Sei vagana ai le faamatalaga faaopoopo o loo i ai i faamaumauga a Coray, o le a feteenai ia manatu faavae o le le faatuaoia o le faaolataga mo fanau le usiusitai ma le tele o aoaoga faavae autu a le Perofeta o Iosefa Samita, e aofia ai le mataupu faavae lona lua o le faatuatua faapea “o le a faasalaina tagata ona o a latou lava agasala” (Mataupu Faavae o le Faatuatua 1:2).
E tusa foi lenei malamalama ma le tele o ni faataitaiga i tusitusiga faavae. Mo se faataitaiga, na faamalamalama atu e Alema i lona atalii o Korianetona:
“Ae faauta, e le mafai ona e natia au solitulafono mai le Atua; ma e vagana ai ua e salamo, o le a tutu o se molimau e faasaga ia te oe i le aso gataaga.
“O lenei, lou atalii e, ou te manao ia e salamo ma lafoai au agasala, ma aua e te toe alu e tusa ma tuinanau o ou mata, ae ia e faafiti oe lava i nei mea uma; ona e vagana ai ua e faia lenei mea, e le mafai lava ona e mautofi i le malo o le Atua. E, ia e manatua, ma ia e ave i ou luga, ma faafiti oe lava i nei mea” (Alema 39:8–9; faaopoopo le faamamafa).
Na folafola atu e Samuelu le sa Lamana ia sa Nifae:
“Ma ua faia nei mea i le faamoemoe ia mafai ai ona faaolaina o soo se tasi e talitonu, ma ina ia mafai ai ona oo mai i luga o soo se tasi o i latou e le talitonu se faamasinoga amiotonu; o lenei foi afai e tausalaina i latou ua latou aumai i o latou lava luga lo latou lava tausalaga.
“Ma o lenei ia outou manatua, ia outou manatua, ou uso e, o soo se tasi e fano, e fano ia te ia lava; ma o soo se tasi na te faia le amioletonu, e faia e ia ia te ia lava; aua faauta, ua outou saoloto; ua faatagaina outou tou te fai mo outou lava; aua faauta, ua tuuina mai e le Atua ia te outou se malamalama ma ua ia faia outou ia outou saoloto.
“Ua ia tuuina mai ia te outou ia mafai ona outou iloa o le lelei mai le leaga, ma ua ia tuuina mai ia te outou ia mafai ona outou filifili le ola po o le oti; ma e mafai ona outou faia le lelei ma toefuataia outou i le mea ua lelei, pe toefuatai mai le mea lelei ia te outou; pe mafai foi ona outou faia le leaga, ma toefuatai mai le mea ua leaga ia te outou” (Helamana 14:29–31; faaopoopo le faamamafa).
E faapena foi ona faamaoniaina e le tele o tusitusiga paia faaopoopo ia mataupu faavae o loo fai ai alii ma tamaitai ma sui ua faamanuiaina i le filifiliga saoloto ma e tali atu mo a latou lava manatu, upu, ma galuega.5
O Aao o le Tausiga Faalelagi
E leai ni faamaumauga a le Ekalesia e uiga i soo se aoaoga faaopoopo i lenei autu patino mai le Perofeta o Iosefa Samita. E ui ina tele isi taitai o le Ekalesia ua se ese lo latou faamamafaina o itu eseese o faamatalaga a Iosefa Samita, o Orson F. Whitney, ma isi, sa latou malilie i luga o le mea moni e faapea o matua o e faamamaluina feagaiga o le malumalu ua i ai i se tulaga e faaaoga ia aafiaga faaleagaga i le aluga o taimi i a latou fanau. E mafai ona maua e tagata faamaoni o le Ekalesia le mafanafana i le iloaina faapea e mafai ona latou maua ia folafolaga o le taitaiga ma le mana faalelagi, e ala i le musumusuga a le Agaga Paia ma faamanuiaga o le perisitua, i a latou taumafaiga e fesoasoani ai i tagata o le aiga ina ia maua faamanuiaga o le faaolataga ma le faaeaga.
Na faamatalaina e Elder Whitney e faapea, e mafai ona manatu i “Aao o le Tausiga Faalelagi” o se ituaiga o mana faaleagaga, o se toso po o se uunaiga faalelagi lea e faatosinaina ai se tamaitiiti ua se ese ia toefoi atu i le lafu i se taimi mulimuli. E le mafai e sea ituaiga aafiaga ona faaleaogaina le faitalia o se tamaitiiti ae e mafai ona valaaulia ma faailo atu i ai. I le faaiuga, e tatau i se tamaitiiti ona faaaoga lana faitalia ma tali atu i le faatuatua, salamo ma le faamoemoega atoa o le loto, ma galulue e tusa ma aoaoga a Keriso.
Sa tuuina mai e Peresitene James E. Faust (1920–2007), lea sa avea muamua ma Fesoasoani Lua i le Au Peresitene Sili, le faamalamalamaga aupito sili ona atoatoa o lenei manatu faavae taua e faavavau:
“Ou te talitonu ma talia le saunoaga faamafanafana a Elder Orson F. Whitney:
“‘Sa tautino mai e le Perofeta o Iosefa Samita—ma na te le i aoaoina mai se aoaoga faavae e sili atu ona faamafanafana loto i lo lenei—o le faamauga e faavavau o matua faamaoni ma folafolaga paia ua tuuina atu ia i laua mo auaunaga lototoa i le Galuega o le Upumoni, e le gata ina faasaoina ai i laua, ae faapena foi a laua fanau. E ui lava atonu o le a se ese nisi o mamoe, ae o loo silasila mai pea fofoga o le Leoleo Mamoe ia te i latou, ma o le a i ai se taimi, latou te lagona ai le aapa atu o aao alofa o le Atua ia te i latou ma aumaia i latou i le lafu. Po o le olaga nei po o le olaga a sau, o le a latou foi mai lava. O le a latou totogia la latou aitalafu i le faamasinoga tonu; o le a latou mafatia mo a latou agasala, ma atonu foi latou te ui atu i se ala matuitui; ae afai e taitaiina mulimuli ane ai i latou, e pei o le atalii faamaumau oa na salamo, i se tama alofa ma le loto faamagalo ma le aiga, ona aoga ai lea o mea tiga na oo i ai. Ia tatalo mo a outou fanau faalogogata ma le le usiusitai; ia tausia pea i latou ma le faatuatua. Ia tumau i le faamoemoe ma le faatuatua, seia outou vaaia le faaolataga a le Atua.’6
“O se mataupu faavae i lenei saunoaga e masani ona le amanaiaina, o le tatau lea i fanau le usiusitai ona salamo atoatoa ma ‘pagatia mo a latou lava agasala’ ma ‘totogi la latou aitalafu i le faamasinoga tonu.’ Ua ou iloa o le taimi nei ‘e saunia ai e feiloai ma le Atua’ [Alema 34:32]. Afai e le salamo fanau faalogogata i lenei olaga, mata e lava le malosi o maea tuaiti o le faamauga mo i latou e galueaiina ai lo latou salamo? I le Mataupu Faavae ma Feagaiga ua tau mai ai ia i tatou, ‘O e e salamo o e ua oti o le a togiolaina, e ala i le usiusitai i sauniga o le maota o le Atua,
“‘Ma a uma ona latou totogi o le sala o a latou solitulafono, ma mulumulu mama, o le a latou maua se taui e tusa ma a latou galuega, aua o i latou o ni suli o le olataga’ [MF&F 138:58–59].
“Tatou te manatuaina na faamaumauina e le atalii faamaumau oa lona tofi, ma ina ua uma sa ia toe foi i le fale o lona tama. O iina sa talia ai ma le fiafia o ia e lona aiga, ae ua uma ona faamaumau lona tofi. [Tagai Luka 15:11–32.] E le faoa e le alofa mutimutivale le faamasinoga tonu, ma o le mana o le faamauga o matua faamaoni, e na o tuutuuga lava o le salamo o a latou fanau faalogogata ma le Togiola a Keriso, e toe maua mai ai. O le a olioli fanau faalogogata ua salamo i le faaolataga ma faamanuiaga uma e aumai faatasi ai, ae o le faaeaga e matua sili atu. E tatau ona maua atoatoa. O le fesili po o ai o le a faaeaina e tatau ona tuu atu i le Alii i Lona alofa mutimutivale.
“O loo i ai lava nai tagata o lo latou fouvale ma amioga faatiapolo e matua tele naua ua latou ‘aveesea ai le mana e salamo ai.’7 O lena faamasinoga e tatau foi ona tuu atu i le Alii. Na Ia fetalai mai ia i tatou, ‘O A’u, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma’ [MF&F 64:10].
“Atonu e le o tuuina mai ia i tatou i lenei olaga ia malamalama atoatoa i le auala e tumau ai noataga o faamauga o matua amiotonu i a latou fanau. Atonu o loo tele atu ni punavai aoga i le galuega nai lo le mea ua tatou iloa.8 Ou te talitonu o loo i ai se uunaiga malosi faaleaiga a o faaauau pea le faatosinaga a tuaa faapelepele mo i tatou mai le isi itu o le veli.”9
O aoaoga a Peresitene Faust ua aotele ai ma le mautu mea tatou te iloa ma lē iloa e uiga i matua amiotonu ma fanau faalogogata. O le faatosinaga a matua o e faamamaluina feagaiga ma usiusitai i poloaiga o le mea moni e mafai ona maua se aafiaga faaleagaga taua tele i luga o fanau o e ua se ese e ala i le faagaoioia o aao o le Tausiga faalelagi—i auala e lei faaalia atoatoa ma e le o malamalama atoatoa i ai. Ae peitai, o faatosinaga amiotonu a matua (1) e le suitulaga i le olaga o se tagata le manaomia o le togiola ma le mana faamalosiau o le Togiola a Iesu Keriso, (2) e le puleaina ia taunuuga o le faaaogaina ma le le amiotonu o le faitalia, ma le (3) e le aveesea le tiutetauave o se tagata i le avea ai ma se sui “e fai … ae le faamalosia” (2 Nifae 2:26).
Atonu e maua e matua faamaoni le malosi e tumau ai a o latou mulimuli i faataitaiga a isi matua amiotonu o i ai fanau le usiusitai. I le Tusi a Mamona, na fautuaina pea lava pea e le Tama o Liae ona atalii faalogogata ia liliu atu i le Alii. Na “tautala atu [Liae] ia Lamana, ua faapea atu: E maumau e pe a na mafai ona pei oe o lenei vaitafe, e tafe atu pea i le punavai o le amiotonu!
“Ma sa tautala atu foi o ia ia Lemuelu: E, maʼumau e pe a na mafai ona pei oe o lenei vanu, e tumau ma mausali, ma lē maluelue i le tausiga o poloaiga a le Alii!
“O lenei sa tautala atu o ia i nei mea ona o le ua maaa o Lamana ma Lemuelu; aua faauta sa muimui i laua i lo laua tama i mea e tele” (1 Nifae 2:9–11).
Mulimuli ane, ina ua latalata ona tuua e Liae lenei lalolagi, sa ia valaaulia pea ma uunaia ona atalii faalogogata ina ia “faalogologo [atu i ana] upu” (2 Nifae 1:12):
“Ala mai ia! Ma tutulai mai i le efuefu, ma faalogo mai i upu a se matua tetete, o le ua lata ona outou faataatia i lalo lona tino i totonu o le tuugamau malulu ma ligoligoa. …
“Ma ou te manao ia outou manatua e tausi i tulafono ma faamasinoga a le Alii; faauta, o le mea lenei sa sili ona popole i ai loʼu agaga mai le amataga.
“Sa mamafa tele loʼu loto i le faanoanoa mai lea taimi i lea taimi, ona sa ou fefe, neʼi afio mai le Alii lo outou Atua i o outou luga i le atoatoa o lona toasa ona o le maaa o o outou loto, ina ia vavae ese outou ma faaumatia e faavavau; …
“E, ou atalii e, pe a na le mafai ona oo mai o nei mea i o outou luga, ae ia mafai ona avea o outou ma tagata sili ona lelei ma faapitoa o le Alii. Ae faauta, ia faia lona finagalo; ona o ona ala e amiotonu e faavavau” (2 Nifae 1:14, 16–17, 19).
Sa faaali atu le agelu a le Alii ia Alema le Itiiti ma tau atu: “Ua faafofogaina e le Alii talosaga a lona nuu, ma talosaga foi a lana auauna, o Alema, o lē o lou tamā; ona sa tatalo atu o ia ma le faatuatua tele e uiga ia te oe, ina ia mafai ona aumai o oe i le malamalama o le upumoni; o lea, o le pogai lenei ua ou sau ai, e faatalitonu oe i le mana ma le pule a le Atua, ina ia talia talosaga a ana auauna, e tusa ma lo latou faatuatua” (Mosaea 27:14).
O lenei aafiaga ofoofogia na oo mai o se vaega o tatalo a Alema—lea na faalua ona iloaina e le agelu o se auauna a le Atua. O le mea lea, e mafai e matua faamaoni ona valaaulia le mana o le lagi e uunaia a latou fanau. E ui i lea, e tumau pea ona pulea e na fanau i latou lava, ma o le filifiliga ia salamo pe leai o la latou lava. Na salamo Alema le Itiiti mai ana agasala ma fanauina i la le Agaga (tagai Mosaea 27:24), o le taunuuga lea o loo moomoo i ai ia matua uma o fanau faalogogata ma o latou loto atoa.
Ao onosai ma faapalepale pea matua i le alolofa ia latou fanau ma avea ma faataitaiga ola o soo o Iesu Keriso, o loo latou aoao atu ma le mataalia tele le fuafuaga o le fiafia a le Tama. O le tumau mausali o ia matua o le a tuuina atu ai se molimau mamana e uiga i mana togiola ma faamalosiau o le Togiola a le Faaola ma valaaulia ia fanau faalogogata ia vaavaai atu i mata fou ma faalogo i taliga fou (tagai Mataio 13:43).
O le galue e tusa ai ma aoaoga a le Faaola e valaaulia ai le mana faaleagaga i totonu o o tatou olaga—mana e faalogo ma gauai atu ai, mana e iloatino ai, ma le mana e tumau ai. O le avea ma soo tuuto ua na o le pau lea o le tali sili i soo se fesili ma luitau.