Mama Atoatoa i Tulaga Feusua’i

O nisi taimi e lagona e Matua le le mautinoa pe a tulai mai ni avanoa mo i latou e aoao atu ai a latou fanau e uiga i le mama i feusuaiga. Ae ui i lea, o lesona e uiga i lenei autu e mafai ona valaaulia ai le Agaga ma fesoasoani e saunia ai fanau e osia ma tausia feagaiga paia.

I itulau 50–51 o lenei lomiga, ua tusia ai e Neill F. Marriott, fesoasoani lua i le au peresitene aoao o Tamaitai Talavou faapea, “Na saunia e le Tama Faalelagi mana o le foafoaga i totonu o le faaipoipoga e mo na o faamoemoega faaleatua lava.” Ua tatou aoao mai le Tusitaulima 2: Taitaiina o le Ekalesia o na faamoemoega e aofia ai le “faaali atu ai le alofa ma faamalolosia ai sootaga o lagona ma le faaleagaga i le va o le tane ma le ava.” ([2010], 21.4.4). E mafai ona fesoasoani fautuaga nei ia te oe e aoao ai lau fanau e uiga i le mama atoatoa i feusuaiga. E mafai foi ona e tagai i le “Aoaoina Atu o le Ola Mama ma le Amio Mama” i le Liahona Oketopa 2012 mo nisi manatu i le auala e aoao atu ai lenei autu.

Fautuaga mo le Aoaoina o le Autalavou

Mafaufau e faitau faatasi ma lau fanau talavou “Matou te Talitonu i le Nofomama” saunia e Elder David A. Bednar o le Korama a Aposetolo e Toasefululua i le Liahona o Me 2013. Valaaulia i latou e fai atu fesili e uiga i le mama i feusuaiga. E mafai foi ona e faaaogaina “O Le Mama o le Tagata Lava Ia” saunia e Elder Jeffrey R. Holland o le Korama a Aposetolo e Toasefululua i le Liahona Oketopa 2000 e fesoasoani e tali ai a latou fesili.
O le autu o le mataupu aoaoina a le autalavou mo lesona i Aso Sa o lenei masina o le Togiola a Iesu Keriso. Mafaufau e faaaoga mataupu aoaoina e aoao ai lau autalavou e uiga i le salamo e manaomia mo le agasala o feusuaiga (tagai i le lds.org/youth/learn). E mafai foi ona outou faitau ma talanoaina le “Aisea ae o a Foi Mea e Tatau Ona Tautau atu i Lo’u Epikopo?” Saunia e Elder C. Scott Grow o le Fitugafulu i le Liahona Oketopa 2013.
Afai e lata ane se malumalu, mafaufau e asiasi i lotoa o le malumalu faatasi ma lou aiga ma talanoaina pe aisea e tatau ona tatou tumau ai i le mamā ina ia ulu atu i le malumalu. E mafai ona e faasoa faatasi ma i latou faamanuiaga ua e maua mai le tapuai i le malumalu. Atonu foi e te manao e fuafua se taimi mo lou aiga e fai ai papatisoga mo e ua maliliu.
Atonu e te manao e faitau faatasi ma la outou talavou le “Mama i Feusuaiga” i le Mo le Malosi o le Autalavou ([tamaitusi, 2001], 35–37) ma faamamafa atu ai faamanuiaga tatou te maua mo le tumau ai i le mama. E mafai ona e uunaia lau fanau e tusi i lalo ni sini e faatatau i le mama i feusuaiga.

Fautuaga mo le Aoaoina o Tamaiti

Atonu e te manao e fai se afiafi faaleaiga lea e te faaaogaina ai ata o le malumalu e talanoaina ai le taua ma le paia o le malumalu. Ona mafai lea ona e faamatala atu o o tatou tino o ni malumalu paia foi.
Faitau faatasi ma lau fanau le mataupu faavae lona sefulutolu o le faatuatua ma talanoa e uiga i le taua o le tausia o tatou mafaufauga ia mama. Fai se lisi o ni tusi, ata tifaga, ma pese o le a faatumulia ai lou mafaufau i mea lelei. Atonu e te manao e faitau, matamata, pe pepese faatasi ma i latou.