O Le Misiona Paia a Iesu Keriso: Malamalama o le Lalolagi

Ia suesue ma le agaga tatalo i lenei mataupu ma saili ia iloa le mea e faasoa atu. E faapefea e le malamalama i le soifuaga ma le misiona a le Faaola ona faateleina ai lou faatuatua ia te Ia ma faamanuia ai isi e te leoleoina e ala i faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

A o tatou faasolo ina malamalama o Iesu Keriso o le Malamalama o le Lalolagi, o le a tatou faateleina lo tatou faatuatua ia te Ia ma avea ma se malamalama i isi. Na molimau mai Keriso i Lana matafaioi o le “malamalama moni e faamalamalamaina alii uma [ma tamaitai] e o mai i le lalolagi” (MF&F 93:2) ma fetalai mai ia tatou “tuu i luga [Lona] malamalama ina ia susulu atu i le lalolagi” (3 Nifae 18:24).

Ua molimau mai foi o tatou perofeta i le Malamalama o Keriso. Fai mai Peresitene Henry B. Eyring, Fesoasoani Muamua i le Au Peresitene Sili: “O taimi uma lava e te filifili ai e taumafai e ola atili e faapei o le Faaola, e tatau ona faamalosia lau molimau. O le a e iloaina mo oe lava o Ia o le Malamalama o le Lalolagi. … O le a e faasusulu atu i isi le Malamalama o Keriso i lou olaga.”¹

Fai mai Elder Quentin L. Cook o le Korama a Aposetolo e Toasefululua i le avea ai o i tatou o se malamalama i le lalolagi: “E tatau ona tatou puipuia o tatou aiga ma ia taulamua faatasi ma tagata uma o faamoemoega lelei i le faia o mea uma e mafai ona tatou faia e faasaoina le malamalama ina ia puipuia, faamoemoe, ma le ola mama i o tatou nuu.”²

Mai Tusitusiga Paia

Ioane 8:12; Mataupu Faavae ma Feagaiga 50:24; 115:5

Mai lo Tatou Talafaasolopito

O loo faaauau e tamaitai o le Au Paia o Aso e Gata Ai i le taimi nei ona uu i luga lo latou malamalama.

I le fogafale lona 80 o se fale maualuga i Hong Kong, i Saina, sa fatuina ai e se tamaitai nofofua e i ai manaoga faapitoa o le tino—e na o ia lava le Au Paia o Aso e Gata Ai i lona aiga—se fale na avea ma se sulufaiga e lagona ai e ia ma tagata asiasi mai le uunaiga a le Agaga. Sa ia tuuina faalatalata ia te ia ana tusitusiga paia, lana tusi lesona o le Aualofa, ma lana tusi pese. Sa ia malaga i le malumalu e faatino ia sauniga mo ona tuaa.³

Sa tausia e se tina amiotonu i Pasila lana fanau i le malamalama o le talalelei. O pese o le peraimeri e faatumuina ai le siosiomaga o lona fale piliki mumu, ma o ata mai le Liahona o malumalu, perofeta a le Atua, ma le Faaola na ufitia ai le puipui. Sa ositaulaga i laua ma lona toalua ina ia faamauina i le malumalu ina ia mafai ona fananau mai le la fanau i totonu o le feagaiga. O lana tatalo faifai pea, ia fesoasoani le Alii ia te ia e aumaia le malamalama, upumoni, ma le malosi o le talalelei i lana fanau.⁴