O Le Tulaga Faatonuina o le Ola Mama a le Alii
Mai se saunoaga na tuuina atu i le faigalotu a le Iunivesite o Polika Iaga–Idaho i le aso 22 o Ianuari, 2013. Mo le anotusi atoa i le gagana Peretania, alu i le web.byui.edu/devotionalsandspeeches.
O la tatou filifiliga e usitai pe le usitai i le tulaga faatonuina a le Atua o le ola mama o le a fuafuaina lo tatou fiafia i le olaga.
I ni nai tausaga ua mavae o lo’u tama, o se loia, sa galue i se faamasinoga. Mo le lagolagoina o lona tulaga, na ia ta’ua ai se faamasinoga e tasi—o se faamasinoga i le Faamasinoga Maualuga a Kalefonia na faia i le tele o tausaga ua mavae. Na ta’ua e le na agaia o ia se aofaiga o faaiuga a le faamasinoga maualalo e sili ona lata mai.
Sa fai mai le faamasino i lo’u tama, “Lau Susuga Callister, e le o i ai sau faamasinoga e sili ona lata mai nai lo lenei?”
Na tilotilo atu lo’u tama i le faamasino ma tali atu, “Lau Afioga e, e mafai ona ou faamanatu atu ia te oe e faapea, pe a fetalai le faamasinoga maualuga i se mea, e manaomia le na o le faatasi ona talanoa i ai. Sa luelue le ulu o le faamasino i le faamaoniga. Sa faamanatu atu ia te ia o le faamasinoga maualuga e faaleaogaina faaiuga uma o le faamasinoga maualalo, po o le a lava le tele po o le lata mai e mafai ona i ai.
E faapena foi ma le Atua lo tatou Tama—e manaomia ona ia saunoa i le na o le faatasi i le mataupu o le ola mama, ma o lena tautinoga e tasi e faaleaogaina ai manatu uma o faamasinoga maualalo, pe tuuina mai e tagata faapitoa o faiai, faufautua, tagata fai polokiki, uo, matua, po o le au faiupu o le aso.
E toetoe lava a le talitonuina e mafaufau faapea ua tuuina e le Atua i Lana fanau le mana e sili ona taua ma paia ia te Ia—o le mana e foafoa ai le ola. Talu ai na tuuina mai e le Atua ia i tatou lenei mana, o Ia, ma e na o Ia lava e toatasi, e i ai le aia tatau e faatulaga ai pe faapefea ona tatau ona faaaoga.
E faafeagai mai le tele o lagona lautele, e leai se mea leaga pe faatapulaaina e uiga i tulaga faatonuina a le Atua. Nai lo lena, e lelei, faagaeetia, ma faamaloloina ai. Latou te fausia ni sootaga o le faatuatuaina, e faaleleia atili ai lagona lelei faaletagata, latou te atiina ae ai se mafaufau mamā, ma latou te valaaulia le Agaga o le Alii e faamanuia ai olaga o le tagata lava ia ma olaga faaipoipo. O i latou o ni tulaga faatonuina ua faamaonia mo faaipoipoga fiafia ma nuu malolosi.
O le a, la, le tulaga faatonuina a le Alii mo le faaaogaina o le mana paia o le foafoaina o fanau—Lana tagavai o le ola mama? O le mea moni, o tulaga faatonuina a le Alii o le ola mama e le na o se lisi o aua ma fai ae o se mataupu faavae, lea e mafai ona faamatalaina faapenei: O le mana e foafoa ai fanau e ao ona faatinoina i le sootaga faale-faaipoipoga mo mafuaaga autu e lua: (1) ia fusifusia ai ma faamalolosia ai sootaga i le va o taitoalua ma le (2) ina ia aumaia ai agaga i le lalolagi. O nei faaaogaina ua i ai le faamanuiaga ma le faamaoniga a le Alii.
I le isi itu, o le mana e foafoa ai fanau e le tatau ona faatinoina i fafo atu o le sootaga o le tane ma le ava. O lea la, soo se manatu maua’i po o se faatinoga ofo fua atu e faaosofia ai po o le taunuu ai i le faaalia o le mana e foafoa ai fanau i fafo atu o le sootaga faale-faaipoipoga e le taliaina e le Alii.
Ou te sii maia nei nisi o tulaga faatonuina a le Alii o le ola mama ina ia faaitiitia ai soo se malamalama sese pe faauiga lua.
Faitaaga ma le Mulilua
Sa faasa e le Alii le faitaaga ma le mulilua e ui lava i lagona o le lalolagi i nei amioga. O nei faatinoga ua i ai le faaaogaina sili o le mana e foafoa ai fanau i se tasi o le isi itupa tatou te leo faaipoipo faaletulafono. O le faitaaga lena pe afai e lei faaipoipo se toatasi; o le mulilua pe afai o le toatasi po o tagata uma e toalua ua faaipoipo.
Na fai mai le Aposetolo o Paulo, “O le finagalo foi lenei o le Atua, … ina ia faamamao outou ma le faitaaga” (1 Tesalonia 4:3; faaopoopo le faamamafa). Sa fai mai foi o ia, “Tou te le Iloa ea o le amioletonu e le fai mo latou tofi le malo o le Atua? Aua ne’i faaseseina outou: o e faitaaga … ma e mulilulua … e le fai ma o latou tofi le malo o le Atua” (1 Korinito 6:9–10; faaopoopo le faamamafa).
O nisi taimi e le iloa e tagata le matautia o nei soligatulafono pe, i nisi tulaga, e faatuatuanai ese. O Korianetona na foliga mai e le iloa le matautia o le mea ina ia faia le agasala ma le fafine talitane o Isapela. Sa tuu ai e Alema, lona tama, lona tulaga matautia: “Ua e le iloa ea, lo’u atalii e, o nei mea o ni mea inosia i le silafaga a le Alii?” Alema 39:5). Na talanoa foi Iosefa i lenei mea leaga tele ina ua faaosoosoina o ia e le ava a Potifara: “Pe faapefea ona ou faia lenei mea leaga tele, ma agasala ai i le Atua?” Kenese 39:9).
Tagotago Le Talafeagai
O le tagotago le talafeagai e faaosoina ai le lagona o le mana foafoa. O lea la, i le tulaga ae lei faaipoipo, e le tusa ai ma le tulaga faatonuina o le ola mama a le Atua le tago i vaega patino po o le paia o le tino o se isi, e tusa pe o faia ni lavalava pe leai foi.1
Sauaina-Faaletagata
E ta’usalaina e le Alii le sauaina-faaletagata. O le sauaina-faaletagata o le faatinoga o le faaosofia o le mana e foafoaina ai fanau o le tino o le tagata lava ia. Na saunoa mai Peresitene Boyd K. Packer, Peresitene o le Korama a Aposetolo e Toasefululua:
“Aua nei tausalaina i le tagofia po o le taalo i lenei mana paia o le foafoaga. …
“… E le fiafia i ai le Alii, pe e le lelei foi ia te oe. E te le lagona ai le agavaa po o le mama.”2
Sootaga o le Itupa e Tasi
O nisi e taumafai e faatalitonu i tatou o le tulaga o le Ekalesia i sootaga faaletino o le itupa e tasi o se aiaiga faavae e le tumau ma e le o se mataupu e faavavau. O lena ituaiga o talitonuga e le tusa ai ma tusitusiga paia, faatasi ai ma upu a perofeta o aso nei, ma le ata o le faaolataga, o loo aoaoina uma maai le manaomia o le faaipoipoga e faavavau i le va o se alii ma se tamaitai o se tulaga i le faaeaga. O se sootaga i le itupa e tasi e le tusa ai ma le mamanu a le Atua e faavavau o tane ma ava e le gata ina i ai fanau i le olaga nei ae i ai foi le faatoateleina e faavavau i lo latou tulaga faaeaina.
Tatou te iloa o tagata taitoatasi o se atalii po o se afafine o le Atua, ma e tatau ai le taulimaina faapea. Tatou te tauivi uma ma le le atoatoa, o nisi e le o la tatou filifiliga. Ae tatou te talitonu foi i le Togiola le i’u e i ai le malosiaga i lenei olaga po o le olaga a sau e faaeeina mai ia i tatou le mana uma e tatau ai e liliu ai o tatou vaivaiga ma lē atoatoa i ni malosiaga. Na folafola mai e le Alii ia i tatou, “Afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.” (Eteru 12:27).
O i latou e i ai naunauga o le itupa e tasi ua i ai se tiute e (1) aloese mai le sootaga le mama ma le (2) faia mea uma i lo latou malosi ia avanoa ai i latou lava i mana faamamaina, ma le faaatoatoaina o le Togiola. Mo se taimi le tumau, e ui i lea, o i latou e i ai faanaunauga o le itupa e tasi ae le faatinoina ua agavaa e umia ia tofiga o le Ekalesia ma maua se pepa faataga o le malumalu.3
Ave o le Fili
Ou te faasoa atu nei ni faailoga matautia e muamua atu i nisi o agasala sa ou ta’ua. I nisi tulaga, o Satani e pei o se fee e taumafai e pueina i tatou. Pe afai e le aoga le ave e tasi, o le a ia taumafai le isi ma le isi seia oo ina ia maua se ave e mau lana pue. O nisi nei o ave a le tiapolo ua mamanuina e faaosofia ai i tatou e solia le tulaga faatonuina a le Atua o le ola mama.
Ponokalafi
E finagalo le Atua i Ana fanau ia le matamata i ni ata tifaga po o le TV, o i soo se uepisaite, po o le matamata i soo se mekasini e faaponokalafi i soo se itu. O le ponokalafi o soo se ata po o faamatalaga e faafiafia ai tuinanauga o le tagata. O se mea inosia i le Agaga o le Alii.
E leai se tasi e mafai ona faapea mai e tau faasese e aafiaga o ponokalafi, ma le talitonu o loo i ai se mea faapea ua na o se tepa mama. O se gata oona, inosia, ma le le faamagaloina lena o le a osofaia i le taimi lava e te faia ai lau vaai muamua ma o le a faaauau ona osofaia i le faaaogaina o se vaega atoa o le tui oona faaleagaga i vaai taitasi mulimuli ane.
Afai o e tigaina i lenei gasegase, e tatau ona e faia mea uma i lou malosi e manumalo ai. Atonu e manaomia ai le tautau atu, tatalo malosi, anapogi, faatofuina i tusitusiga paia, sui le taimi o le paie, i ni taimi aoga, tuuina atu o tapulaa maoti i le faaaogaina o le Initoneti, fautuaina faapolofesa, ma isi taumafaiga, ae e mafai ona e manumalo ai. I nisi taimi o le a avea ai le finafinau o se vaega taua tele—e leai se fualaau po o se metotia faafautuaga e foia uma ai vaisu.
Laei Letauagafau
O o tatou ofu e aafia ai e le gata i o tatou mafaufauga ma amioga ae faapena foi mafaufauga ma amioga a isi. E faapena foi, na fautuaina e Paulo le Aposetolo “fafine [e] teuteu ia i latou i ofu e onomea” (1 Timoteo 2:9).
O le auala e fai ai ofu o se tamaitai e i ai se aafiaga malosi i mafaufau ma lagona o alii. Afai e maualalo tele pe ua maualuga tele po o le fufusi tele, e mafai ona uunaia ai mafaufauga le lelei, e oo lava i le mafaufau o se alii talavou o loo tauivi ina ia mama.4
E mafai e alii ma tamaitai ona foliga lalelei ma matagofie laei, ae e mafai foi ona latou tauagafau. E faapitoa lava le mafai e tamaitai ona laei tauagafau ma i le faagasologa ua saofaga i lo latou lava taua faaletagata ma i le mama aiai o alii. I le faaiuga, o le tele o tamaitai latou te maua le ituaiga alii o loo fai agai i ai o latou ofu.
Mafaufauga le Mama
Na taua faapea, “E mafai ona e matamata i manulele o felelei ane; ae aua lava nei faatagaina i latou e fausia se faamoega i luga o lou ulu.” E leai se mea sese i le matauina o le tamaitai talavou po o le alii talavou aulelei a o la savavali ane—o se mea masani. Ae afai e liua na mafaufauga i le manao, ona fauina loa lea o le faamoega.
E le mafai ona tatou aloese mai le vaaia o laupapa o faasalalauga uma e le talafeagai po o se tagata o loo laei le tauagafau, ae mafai ona tatou tulieseina le mafaufauga le lelei i le taimi lava e oso mai ai. O le agasala e le o i totonu o se vaaiga faafuasei o se mea le lelei; o le agasala o le mafaufau lea i le mafaufauga i le taimi lava e sau ai. Ua ta’u mai e tusitusiga paia ia i tatou, “Aua e pei ona manatu o ia i lona loto, ua faapea lava o ia” (Faataoto 23:7).
O le mea moni, o o tatou mafaufauga e avea ma fatu o a tatou amioga. O loo i totonu ia i tatou le mana eai o tatou olaga ma o tatou mafaufauga. O mafaufauga lelei ma le leaga e le mafai ona i ai faatasi i o tatou mafaufau e pei lava ona le mafai e le malamalama ma le pogisa ona i ai i le taimi e tasi ma le nofoaga lava lea e tasi. I nisi taimi e tatau ona tatou filifili po o le fea o le avea ma a tatou malo faaaloalogia.
Afai tatou te mananao ai, e mafai ona tatou tuli ese mafaufauga leaga uma ma vave ona sui tulaga ai se pese po o se solo po o se mau e faagaeetia ai. E pei lava ona solaese le pouliuli i le oo mai o le malamalama, e faapena foi ona solaese le tiapolo i le oo mai o le lelei.
Nofoaga Tuufua ma Uo Taufaaosooso
I ni taimi ma nofoaga faapitoa, e tusa lava po o le a lo tatou malosi, e faaitiitia lo tatou tetee atu. O nisi o alii ma tamaitai e sili ona lelei i tulaga e sili ona leaga ua pauu. Sa tupu i le Tupu o Tavita a o ia vaavaai atu i a Patisepa i le po, i le taimi muamua mai se mea mamao e foliga mai e saogalemu (tagai i le 2 Samuelu 11:2–4). E leai se tasi o i tatou e tatau ona mafaufau ua tatou malolosi tele pe ua masani e tetee atu e le taitai toilalo. O nofoaga tuufua, po uumi, ma uo e le ola mama o loo i ai se malosiaga faamaneta e tosoina atu ai i tatou i puleaga a Satani.
Alofaga
E lua alofaga faifai pea e faaaoga e lagolago ai le solitulafono o le ola mama. O le muamua o le “Na ou alofa ia te ia.” O Satani o le faafoliga maoae. Na te taumafai e mili ese le tuinanau faapea o le alofa. O loo i ai se suega faigofie e iloa ai le eseesega. O le alofa e uunaia e le loto pulea, o le usiusitai i tulafono o le ola mama a le Atua, faaaloalo mo isi, ma le le manatu faapito. I le isi itu, o le tuinanau e uunaia e le le usiusitai, faamalieina faaletagata, ma le leai o se amio pulea.
O le alofaga lona lua o le “E leai lava se tasi o le a iloa.” Ua uma ona faatea ese e le Alii lena tala fatu i le tele o taimi. Sa Ia tautino mai, “o e e fouvale o le a tuia i le faanoanoa tele; ona o le a e alagaina a latou amioletonu i luga o tumutumu o fale, ma o le a faaalia a latou galuega lilo” (MF&F 1:3; faaopoopo le faamamafa).
E leai se fanua ua pogisa tele po o se tulimanu e matua tuufua lava o le a leai lava se tasi o le a iloa i se isi lava taimi. O le a silafia e le Atua, ma o le a e iloa pe a e solia Lana tulafono o le ola mama.
Salamo
Afai ua tatou faia ni mea sese o le ola mama i o tatou olaga, e mafai ona tatou salamo ona o le Togiola a Iesu Keriso. O le laasaga muamua ma le autu i le ola ai i se olaga mama mo le lumanai o le salamo i solitulafono ua mavae, e faafesuiai se faavae o le oneone i se faavae o le papa. E masani ona amata i le ta’uta’u atu.
O le salamo, e ui i lea, e le na o se mataupu e faatatau i le taimi po o le lafoaia o se agasala po o le faia o se ta’uta’u atu. O le mea e aupito sili, o le salamo o se suiga faamaoni o le loto, se naunau malosi e filifili e ola i se olaga mama—e le ona o le e tatau ai, ae ona tatou te mananao e fai.
Na faamanino mai e le Atua e le mafai ona tatou solia Ona tulaga faatonuina e aunoa ma le mafatia i taunuuga, ae ona o Ia e agaalofa ma agalelei e le mafuatiaina, Na te tuuina mai ia i tatou lenei faamoemoe mamalu:
“Ona o Aʼu o le Alii e lē mafai ona Ou vaai i luga o le agasala ma sina tikeri itiiti o le faatagaina;
“E ui i lea, o ia o lē ua salamo ma faia poloaiga a le Alii o le a faamagaloina” (MF&F 1:31–32; faaopoopo le faamamafa).
I agaga faamaoni uma o e e suia o latou loto ma lafoai a latou agasala, ua Ia folafola mai, “E ui lava ina pei o ofu mumu a outou agasala, e sisina ia e pei o le kiona” (Isaia 1:18).
E ui i lea, e masani foi ona sili atu ona lelei e tumau le mama nai lo le agasala ma salamo mulimuli ane. Aisea e faapea ai? Ona oni taunuuga faapitoa o le agasala atonu e mafai ona tumau e ui lava ina ua uma ona salamo, e pei o se faama’i po o se tamaitiiti na fanau i fafo atu o le faaipoipoga po o le tauleagaina o lo tatou tulaga. O la tatou sini i le olaga e le na o le ia mama, ae ina ia atoatoa foi. E faatelevaveina le sailiga mo le atoatoa pe a tatou mama, ae faatuai pe a tatou le mama.
Na aoao mai Alema, “E lei avea lava le amioleaga ma fiafia” (Alema 41: 10). E le mafai ona tatou solia tulafono a le Atua o le ola mama e aunoa ma le faasalaga ae maua le fiafia ona o le Atua, o le na foafoaina i tatou, na tuuina i o tatou agaga se tapasa o le ola mama e taua o lo tatou lotofuatiaifo. Soo se taimi lava tatou te solia ai tulaga faatonuina o le ola mama a le Atua, e galue le lotofuatiaifo—e faalavelave mai ia i tatou, e faaosofia ai lagona o le nofosala ma le faanoanoa, ma e galue o se molimau paia e molimau atu i le moni o lena tulaga faatonuina.
E mafai ona tatou taumafai e le amanaia ma e mafai ona tatou taumafai e faaleaogaina, ae e le mafai ona tatou sosola ese mai ai. O tulaga faatonuina a le Atua o le ola mama e le mafai ona faaleaogaina; e le mafai ona faavaivaia pe fetuutuunai; e mafai ona na o le usitaia pe le usita’ia. E iu lava ina tatou teena pe taliaina. O la tatou filifiliga o le a aafia tele ai lo tatou fiafia i le olaga.
Faamanuiaga o se Olaga o le Ola Mama
O faamanuiaga o le ola i se olaga mama ma tauagafau e matagofie. O se olaga faapena o le a aumaia ai le lotofuatiaifo faaletagata ma le taua faaletagata. O le a taunuu ai i se lotofuatiaifo manino. O le a agavaa ai i tatou mo se toalua e mama a’ia’i ma o le a faaalia ai le mana e foafoa ai fanau i le sootaga o le faaipoipoga e sili atu le suamalie ma le tauia aua sa tatou faapolopoloina mo le taimi ua faamaonia e le Alii lava Ia.
Aua e alofa tele le Alii ia i tatou ma e finagalo ina ia tatou fiafia, ua Ia fofogaina mai Lona faamoemoega mo Ana fanau i nei aso e gata ai: “Aua o le a Ou faatu mai mo aʼu se nuu mamā, o e e auauna mai ia te aʼu i le amiotonu” (MF&F 100:16).
Tau ina ia avea i tatou taitasi ma se vaega o lena tupulaga mama ma taliaina atoatoa le tulaga faatonuina o le ola mama.