Valaaulia Le Manuia
Na o le talosaga atu lava i isi pe latou te fiafia i le talalelei, e mafai ai ona e auai i le faanatinatiina o le galuega o le faaolataga.
O le faasoa atu o le talalelei e masani ona faigofie e pei o le tuuina atu o se valaaulia, tuuina atu o se fesili, po o le auai i se talanoaga. A o saunia o tatou loto e faasoa atu le talalelei, o le a taitaia i tatou e le Alii ia i latou o e ua saunia e faalogo i ai.
“Ua saunia e le [Alii] auala mo i tatou e faasoa atu ai le talalelei i le anoanoai o ala, ma o le a la fesoasoani mai ia i tatou i la tatou galuega pe afai o le a tatou galulue i le faatuatua e faataunuu Lana galuega,” na saunoa Peresitene Thomas S. Monson i le konafesi aoao ia Oketopa.1 O nisi nei o faataitaiga.
Toe Faafoe mai le Uila
Ina ua siitia atu Niki Barton ma lona faletua, o Morgan, i Arisona, ISA, le nofoaga e mafai ai e Niki ona auai i le aoga faaloia, sa amata ona la tatalo mo avanoa faafaifeautalai. “Sa ma ole atu i le Tama Faalelagi e fesoasoani ia i maua ina ia sili atu ona mataala i uunaiga a le Agaga Paia, ma ia lototoa e faatino,” o le tala lea a Niki.
I se tasi Aso Toonai, na manaomia ai e Morgan le la taavale mo le galuega, o lea sa tietie ai Niki i lana uila vilivae i le lotoa. Ae peitai, ina ua oo i le taimi e toe foi atu ai i le fale, ua leai se uila.
“O le gaoi uila o se tulaga taatele lea ma na fesili ai leoleo pe i ai se mea e ono fesoasoani e faailoa mai ai [uila gaoia]. Na ou manatuaina sa kelu e Morgan se faailoga i luga o le au na faapea mai, ‘Ou te Alofa ia te Oe.’”
Na toe tatalo tasi Niki. “Na ou ole atu ina ia ou aoaoina se mea mai le mea na tupu,” o lana tala lea. Ona ia oso lea i luga o le nofoaafi ina ia mafai ona ia faalatalata atili atu i le fale ao le’i valaau atu i lona toalua e sau e avatu o ia.
“O le isi nofoaga e tu ai le nofoaafi, sa ou vaaia ai se alii lapoa ma se pulou o loo u i tua o oso i luga o le nofoaafi, o amoina la’u uila! Sa ou vaaia le faailoga ‘Ou te Alofa ia te Oe’ i luga o le au, o lea na ou iloa ai o au e ana [le uila],” o le tala lea a Niki. Sa ia popoina le tauau o le alii.
“Sa ou fai atu, ‘Ou te fia fesili atu po o fea na e aumaia ai lena uila.’ Sa ia tali mai, ‘Mai se faatautui i le magaala.’” Na faamalamalama atu e Niki ua gaoia lana uila. Na tali mai le alii talavou e le o ia o se gaoi, ma e mafai ona toe avatu le uila a Niki.
“Na ou faafetai atu ia te ia ma fai atu i ai o le a ou fai i leoleo e valaau atu ia te ia ina ia mafai ona suesue le ‘faatautui’”, o le tala lea a Niki. “Na ia tauina mai ia te au o lona igoa o Harley ma tuu mai lana numera o le telefoni. Sa ou fai atu ia te ia o le a ma afaafa i le tau lea sa ia totogiina, talu ai ona ua faaseseina uma i maua, ma ua ou fiafia e aluese mai le nofoaafi ma lau uila ua toe faafoi mai.”
Ae ua na o le amataga lena mea.
“Ona o le fiailoa, sa ou valaauina Harley i le taeao na sosoo ai. Sa ia fai mai o loo suesue e leoleo. Ona ia fesili mai pe ma te mananao ma lo’u toalua e fai se mea i se taimi mulimuli ane o le aso. Sa ou iloaina sa ia taumafai e faauo mai.
“Talu ai ona o le Aso Sa, sa ou fai atu ia te ia ma te o i le lotu ae ma te fiafia matou te faatasi ma ia i se isi taimi. Ao ou tuuina i lalo le telefoni, na ou iloaina o se avanoa faafaifeautalai mama ma manino lenei mea. Sa ou valaau atu ia te ia ma fesili atu pe fia manao matou te o i le lotu. Sa ioe o ia! Sa ia auai i sauniga uma ma tau mai ia te au mulimuli ane sa ia lagonaina o loo talanoa tuusao atu lava ia failauga ma faiaoga ia te ia.
“O Harley sa i ai aiga i atunuu i fafo ma sa siitia ese atu i se taimi e lei leva ona matou feiloai,” o le tala lea a Niki. “Ae na avea o ia ma a maua uo, maua le faaaloalo mo le Ekalesia, ma sa faamautinoaina o ia o loo silafia o ia e lona Tama Faalelagi.”
Talanoa i le Tagata e I Ai le Tomai Faapitoa
“I se tasi aso, ina ua uma ona faalogo i se savali o le konafesi, sa ou maua se uunaiga e tatau ona ou talanoa atu i le tagata e i ai le tomai faapitoa i vai faafomai i le faleoloa,” o le tala lea a Hannah Rawhouser, e sau foi mai Arisona. “Na fai mai se leo o i totonu ia te au, ‘O ia o se tagata lelei. E tatau ona e valaaulia o ia i se gaoioiga a le Ekalesia.’”
O le isi taimi sa i ai Hana i le auala e sau sao ai i totonu le taavale, sa ia vaavaaia o ia, ae sa le’i i ai. Na faaauau pea, le uunaiga.
“O ni nai vaiaso mulimuli ane, sa ou toe oo ane ai, ma ua i ai o ia iina. Faatasi ai ma le faamoemoe o le a puupuu lo’u taimi, sa ou agai sao atu loa i le mataupu. ‘E te lotu?’ o lau fesili lea. Sa ia tu ma le faateia ona fai mai lea ioe. Sa ou tuuina atu ia te ia lau kata pisinisi. ‘Valaau mai ia te au i se taimi,’ sa ou fai atu i ai ma aluese mai. ‘Ia, sa fai lau vaega,’ o lou mafaufau lea. ‘O le a le toe i ai nei ni ou lagona e faalavelave soo mai.’”
I lona ofo tele, sa ia valaau mai i le aso na sosoo ai ma faailoa mai o ia o Greg Eiselin. “Sa ia fai mai mulimuli ane, talu ai o i maua uma o ni talavou ma e nofofua, sa ia manatu o loo ou talosagaina o ia mo se tafaoga faamasani,” o lana tala lea. “Ae sa iu ina ma talanoa e uiga i mataupu faalelotu mo le tolu itula, ma sa amata ona ia aoao e uiga i le Ekalesia.” I le taimi nei o loo auauna atu ia Elder Eiselin faafaifeautalai faamisiona i Monatana, ISA.
Fai atu i le Tagata e Faafoeina le Lifi
I le avea ai ma se tagata e 26 tausaga le matua, na galue Robert G. Ellis Jr. o se alii leoleo i le ofisa o le Senate i Uosigitone, D.C., ISA.
“Sa ou faaaluina le tele o taimi e mafaufau loloto i mea sa ou aoaoina e uiga ia Iesu,” o lana tala lea. “E lei auai lou tama ma lou tina i soo se ekalesia, ae sa la faatagaina au ou te alu, ma sa ou fiafia e auai i le tele o tapuaiga.” I le avea ai ma se talavou matua faatoa faaipoipo, sa ia lagonaina e tatau ona papatisoina o ia—ae o le fea o ekalesia?
“Na atuatuvale lou agaga. Sa ou manao ia maua se ekalesia e faamaoni i aoaoga a Keriso. E fai mai tagata o lotu uma o le Ekalesia a le Alii, ae sa le’i faatuai lo latou fai mai o isi tapuaiga na sese. Sa ou tatalo, ‘ou te fia papatiso, ae ou te le iloa po o le fea ekalesia e auai.’”
O le manatuaina o le fetalaiga a Iesu Keriso, “Ole atu, ona foaiina mai ai lea ia te outou” (Mataio 7:7), na ole atu ai pea Robert. I se tasi aso a o faigaluega o ia, na toe lagona ai foi e Robert le atuatuvale, ma oo mai loimata i ona mata.
“Sa ou lagonaina le fefe ma sa le iloa pe o o’u manatu na sa’o pe sese.Ona oo mai lea o se lagona toafilemu ia te au. E aunoa ma le matuai iloaina pe aisea na ou faia ai, sa ou savali atu i se tagata o faafoeina le lifi ma fesili atu, ‘O le a le ekalesia e te auai ai?’”
O le tagata e faafoeina le lifi o Norman Maxfield, o se faifeautalai ua maea lana misiona o loo auai i le Iunivesite o Georgetown.
“Sa ia tilotilo mai i luga mai nisi tusi. Sa ou iloaina sa faateia o ia. Sa ia fai mai, ‘O au o se Mamona. Aisea?’
“Sa ou fai atu, ‘Ou te fia papatiso, ae ou te le iloa po o le fea ekalesia e auai.’
“Sa ia fesili mai, ‘O le a se mea e te talitonu i ai?’
“‘Iesu Keriso,’ o le tali sa ou tuuina atu ma le mitamita.
“Na ia fesili mai, ‘E mafai ona ou faamatalaina atu e uiga i laʼu ekalesia, o Le Ekalesia a Iesu Keriso o le Au Paia o Aso e Gata Ai?’ A o ia faamatalaina mai ia te au o le Ekalesia a Keriso na toefuataiina mai i le lalolagi, sa ou iloa ua taliina au tatalo. Sa matagofie le lagona i totonu ia te au.”
O le 1977 lena. I le taimi nei ua avea Brother ma Sister Ellis ma tagata o le Ekalesia i Virginia, ISA.
Faalagolago i le Alii
Na saunoa mai Elder Dallin H. Oaks o le Korama a Aposetolo e Toasefululua faapea “pe a tatou tutu e avea ma ‘molimau a le Atua i taimi uma ma i mea uma’ (Mosaea 18:9), o le a tatalaina e le Alii auala mo i tatou e saili ma le talafeagai fesootaiga ma i latou o e o loo saili i ai. O le a oo mai lenei mea pe a tatou saili le taitaiga ma pe a tatou galulue ma le faamaoni ma le alofa faaKeriso mo isi.”2
E ioe uma lava ia Niki, Hana, Greg, Robert, ma Norman o mea sa ia fai atu ai e moni.