Aua nei Misia le Valaau mai le Telefoni
I konafesi aoao taitasi, e i ai lava se savali faapitoa mo na o oe. Aua Nei Misia!
Vaai faalemafaufau faapea o loo e faatalitalia se valaau e matuai taua lava mai le telefoni. Faafoliga, mo se faataitaiga, sa e talosaga i le taseni o kolisi ma o lau filifiliga i le pito i luga e finagalo e valaauina mai ia te oe i le po o le Aso Tofi ia e iloa ai pe ua taliaina oe. Ae o loo i ai sina faafitauli: o loo i ai se lisi umi o tagata e valaau i ai ma o le a otometi lava ona latou teena oe pe afai e te le avanoa e talanoa e uiga i faamatalaga.
Afai o le kolisi e mamao tele e le mafai ona e vaai faalemafaufau i ai, nai lo lena vaai i se isi mea na o le a e faatalitali i ai ma le naunautai. Atonu ua valaau mai se tagata e tau atu ia te oe pe ua taliaina oe i se au taalo, vasega siva, po o le aoga musika—soo se mea e sili lona taua ia te oe.
O le taimi nei, o le fesili lenei: pe o le a e faalatalata atu i lau telefoni mo lena valaau o loo faatalitalia?
O avanoa e faapea, afai e taua tele ia te oe, e te le manao ia mamao mai lena telefoni! E te le manao e misi le valaau.
E faapena foi, o masina ta’i ono uma e i ai se savali e sili ona taua mo lou lava olaga o loo faatalitali mai mo oe lava ia. Ae o loo i ai se faafitauli laitiiti: e tatau ona muamua e malaga mai mo le mauaina o le savali.
O Le Matalasi o Faaaliga
O le konafesi aoao o se taimi e siitia ai, musuia, ma faamalosia ai faaleagaga. O se avanoa taua foi e sue ai tali i fesili a le tagata lava ia.
Na aoao mai Elder Jeffrey R. Holland o le Korama a Aposetolo e Toasefululua, “O se konafesi aoao o lenei Ekalesia o se taimi maoae moni lava—o se folafolaga faalauaitele faapea ua matala le lagi, ma o le taitaiga faalelagi e moni i le aso e pei foi o le aiga o Isaraelu anamua, o le Atua lo tatou Tama Faalelagi e alofa ia i tatou ma e fetalai mai Lona finagalo e ala mai i se perofeta soifua.”1
Afai e i ai ni au fesili sa e tatalo ai, o le konafesi aoao o le taimi e mafai ai ona e maua tali i na fesili. E tusa lava pe e leai ni fesili faapitoa i lou loto, e te le iloa lava po o le fea le savali po o savali mai le konafesi aoao o le a fetaui tonu lava ma le mea e manaomia ona e faalogo i ai. E masani lava, o le musumusuga e sili ona taua tatou te maua, e fesoasoani ia i tatou e iloa le auala e sili atu ai ona auauna i isi.
O le lauga i le konafesi aoao e uiga i le konafesi aoao, na saunoa ai Peresitene Thomas S. Monson:
“Tatou te feiloai i le ta’i ono masina e fefaamalosia’i ai o le tasi i le isi, e ofo atu ai le faamalosiauga, e tuuina atu ai le faamafanafanaga, e faamalosia ai le faatuatua. Ua tatou i ai iinei e aoao. Atonu e i ai nisi o outou o loo sailia ni tali i fesili ma luitau o loo outou feagai i o outou olaga. O nisi o loo tauivi ma le le fiafia po o le oti. E mafai ona faamalamalamaina i tatou taitoatasi ma faagaeetia a o lagonaina le Agaga o le Alii”2
O savali e tuuina mai i le konafesi aoao e pei o tusitusiga paia ia i tatou i o tatou aso. Pei ona fetalai mai le Alii, “Pe i lo’u lava leo po o i le leo o a’u auauna, ua tutusa lava” (MF&F 1:38).
Afai e saunia oe lava faaleagaga mo le konafesi, aemaise lava pe afai e te silasila totoa i savali, e te mafaia ma o le a maua faatonuga ma musumusuga patino ia te oe—tusa lava pe o a ou tulaga.
Saunia e Musuia
E fesoasoani pea le faaaluina o se taimi a o lei amataina le konafesi e saunia ai mo le mauaina o faaaliga. Na fautua mai le Alii ia i tatou e saili i faaaliga: “Afai e te ole mai, o le a e maua faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma o mea filemu o mea ia e maua ai le olioli, o mea ia e maua ai le ola e faavavau” (MF&F 42:61).
E ui e mafai ona maua faaaliga faaletagata lava ia o soo se nofoaga, soo se taimi, e le tatau ona avea lena mea moni e taofia ai i tatou mai le suesueina ma le totoa o konafesi aoao. Ua na o konafesi aoao e mafai ai ona tatou faalogo i perofeta, aposetolo, ma isi taitai o le Ekalesia i ni vaega matua tetele.
I le konafesi aoao ia Oketopa 2013, sa aoaoina ai e Elder Robert D. Hales, o le Korama a Aposetolo e Toasefululua: “I le autalavou o le Ekalesia, ou te folafola atu afai o le a outou faalogo, o le a outou lagonaina le faateleina o le Agaga i totonu o outou. O le a tau atu e le Alii ia te outou mea e finagalo o Ia ia outou faia i o outou olaga.”3
E Taua Sauniga Uma
Toe foi atu i lena valaau taua mai le telefoni. A e iloaina o lena ituaiga o valaau o le a oo mai, atonu e te le se ese lava mai lau telefoni sei vagana ai ua matua talafeagai lelei. I le konafesi aoao, la, pe talafeagai le misia o se sauniga po o le lua aua e sili ia te oe le faia o isi mea mo se vaega o le faaiuga o le vaiaso? Ae faapefea pe afai e te filifili e alu e sopo i le taeao o le Aso Toonai—ae misia “na o” lena sauniga muamua—ae peitai o le sauniga tonu lena e sili ona e manaomia e faalogo i ai?
Pe o loo e nofo i se vaega o le lalolagi lea e mafai ona e matamata ai i se faasalalauga tuusao o le konafesi aoao po o lou manaomia ona faatali mo sina taimi a o lei oo atu i lou eria, e masani lava ona aoga le taimi ma le taumafaiga ia tagai totoa i lauga taitasi i le taimi lava e avanoa ai ia te oe.
Mafaufau e filifili i le asō faapea o le a e alu atu ua saunia e faalogo ma le naunau e faalogo i lauga taitasi, ma tagai totoa mo le uunaiga e aupito sili ona e manaomia e faalogo i ai.
E ui i lea, e te le iloa lava le taimi e tatagi ai le telefoni.