Faamaloloina O Maila Matuia o le Saunoa
Mai le saunoaga a Elder Scott i le konafesi aoao ia Aperila 1992 ma Aperila 2008; ua laugatasia mataitusi tetele ma faailoga.
E mafai ona tuua oe ua mailaila ona o le faatautala, ae o na ma’ila e le manaomia ona tumau.
Ata na tusia mai Stockphoto/Thinkstock
Ou te tautala atu mai le taele o lou loto ia te outou taitoatasi ua faamailaina e le agasala mataga o le saunoa.
Sei vagana ua faamaloloina e le Alii, le saua faalemafaufau, faaletino, po o faafeuiai, e mafai ona e oo ai ini iuga matuia ma tumau. I le avea ai o oe ma se ua saunoa i ai se tasi, sa e oo i nisi o na tulaga. O na tulaga e aofia ai le fefe, faanoanoa, tausalaina, ita ia te oe lava ia, lepetia lou manatu lelei ia te oe lava, ma e aloese ai mai masani faaletagata. Pe a oo ina fai ma avega le faauaua pea o le saunoa o se tasi ia te oe, o le a tutupu mai ni lagona malolosi o le fouvale, ita, ma le inoino. O ia lagona e masani lava ona faasagatau ifo ia te oe lava, isi tagata, i le olaga lava ia, faapea foi ma le Tama Faalelagi. O taumafaiga atuatuvale e tetee atu i na tulaga o le a iu i le faaaoga sese o fualaau oona, ola le mama, lafoai le aiga, ma tulaga matuia o le pule i le ola. Sei vagana ua faasa’oina, o ia lagona o le a taitaiina atu i ni olaga, o le le toe i ai o se faamoemoe, oni ulugalii femisaai, ma le suia mai le avea ma tagata sa saunoa i ai, i le avea ma tagata saunoa. O se tasi o iuga leaga o lea mea, o le le toe faalagolagoina ai o isi lea o le a avea ma papupuni o le faamalologa.
Ina ia maua le fesoasoani, e ao ina e malamalama ai i nisi o mea e uiga i le tulafono e faavavau. O le saunoa ia te oe e mafua i le osofai ma le le tonu e se isi o lou saolotoga. Talu ai o fanau uma a le Tama o i le Lagi e olioli i le filifiliga saoloto, ae mafai lava ona i ai nisi o i latou e filifili ma le loto e solia poloaiga ma tuimomomo oe. O na amioga latou te taofiofia lou saolotoga i se vaitaimi. I le faamasinoga tonu, ma ia taui atu ma sui, ua saunia e le Alii se ala mo oe e faatoilalo ai iuga leaga o amioga e faia e isi tagata ia te oe. O le faamalologa e maua e ala i le faaaoga o upumoni e faavavau faatasi ma le fesoasoani mai o le perisitua.
Ia e silafia o filifiliga leaga e faia e isi e le mafai ona lepetia atoatoa ai lou saolotoga sei vagana ua e loto i ai. Atonu o a latou amioga e mafai ona oo ai tiga, atuatuvale, ma mafatiaga faaletino, peitai e le mafai ona latou lepetia le tulaga e faavavau o lenei olaga saasaa ma faigata i lenei lalolagi. E ao ona e malamalama o loo ia te oe le saolotoga e filifili ai e faatoilalo iuga leaga o le saunoa. E mafai e ou uiga ona pulea se suiga mo le lelei i lou olaga. E mafai ona e maua ai le fesoasoani ua faamoemoeina e le Alii ia e maua. E leai se tasi e mafai ona aveesea ou avanoa silisili pe afai e te malamalama ma ola i tulafono e faavavau. O tulafono a lou Tama Faalelagi ma le Togiola a le Alii e mafai ai ona lē faoa mai ia te oe avanoa e oo mai i fanau a le Atua.
Atonu e oo ia te oe se lagona o le taufaamatau ona o le e pule po o pulea oe. Atonu e te lagona lou saisaitia ma e leai se mea ua e iloa e mafai ona e sola ese ai. Faamolemole ia e talitonu e le finagalo lou Tama Faalelagi ia saisaitia oe i ni aafiaga le tonu, e ala i le taufaamatau o le taui ma sui, po o le fefe i ni uiga e toe faaali mai e le tagata o le aiga o saunoa ia te oe. Ia e faatuatua o le a taitaiina oe e le Alii i se faaiuga. Ia ole atu ma le faatuatua, aua le masalosalo. (Tagai i le Iakopo 1:6; Enosa 1:15; Moronae 7:26; MF&F 8:10; 18:18.)
Ou te matua tautino atu pe a e mafatia i ni amioga saua, tau faasese, po o le mataifale o se tasi, e le pau ia te oe le leaga ma e le tatau ona ia te oe se lagona tausalaina. Atonu o le a tuua oe ua e ma’ila’ila i le faatautala o lena tagata ia te oe, peitai o na ma’ila’ila o le a le tumau. I le fuafuaga e faavavau, i le taimi e tatau ai a le Alii, o le a faasa’oina ai na manua pe a e faia lau vaega.Ia o le mea lea e mafai ona e faia i le taimi nei.
Saili le Fesoasoani
Afai ua sauaina oe i le taimi nei po o se taimi foi ua tuanai, saili nei loa se fesoasoani.Atonu o le a e le faatuatuaina isi ma lagona e leai se fesoasoani faatuatuaina o maua i se mea. Ia mata i lou Tama Faalelagi ma Lona Alo pele, lou Faaola. Taumafai ia e malamalama i a La’ua poloaiga ma mulimuli i ai. O le a la taitaiina oe i isi o le a faamalosiauina ma uunaia oe. O loo avanoa mo oe se taitai perisitua, e masani lava o lena taitai o se epikopo, o nisi taimi o se tasi o le au peresitene o le siteki. E mafai ona latou fausia se alalaupapa i le malamalama sili atu ma le faamalologa. Na aoao mai Iosefa Samita: “E le mafai e se tagata ona faia se mea mo ia lava vagana ua taitaiina o ia e le Atua i le ala sa’o; ma o le perisitua la e mo lena faamoemoega” (Aoaoga a Peresitene o le Ekalesia: Iosefa Samita [2007], 109).
Ia e talanoa i lou epikopo po o le peresitene o le paranesi ma le lototele. O lona valaauga e mafai ai ona avea o ia ma auupega a le Alii mo oe. E mafai ona ia tuuina atu se faavae faalemataupu faavae e taitaiina atu ai oe i le faamalologa. O loo ia te ia malamalama ma le faatinoga o le tulafono e faavavau o le a e maua ai se faamalologa o e manaomia. Ua ia te ia le aia tatau e musuia ai e le Alii mo oe. E mafai ona ia faaaoga le perisitua e faamanuia ai oe.
E mafai e lau epikopo ona fesoasoani ia e iloa uo faatuatuaina e lagolagoina oe. O le a ia fesoasoani ia te oe ia e toe maua le manatu talitonu ia te oe lava ma le manatu lelei ia te oe lava, e amata ai le faagasologa o le toe faafouina. Pe a matuia ona saunoa se tasi ia te oe, e mafai ona fesoasoani o ia te oe ia e iloa se puipuiga talafeagai ma se fesoasoani faaleatua e o gatasi ma aoaoga a le Faaola.
O Mataupu Faavae o le Faamalologa
O nisi nei o mataupu faavae o le faamalologa o le a e malamalama atoatoa i ai:
E iloa o oe o se tasi o fanau pele a lou Tama Faalelagi. E alofa atoatoa o Ia ia te oe ma mafai ona fesoasoani ia te oe i auala e le mafai e matua faalelalolagi, lou toalua, po o sau uo faamaoni ona fesoasoani atu ai. Na tuuina mai e lona Alo Lona soifua ina ia mafai e ala i le faatuatua ia te Ia ma le usiusitai i Ana aoaoga, ona mafai ona faamaloloina oe. O ia o le faamalolo sili o mai.
Ia e faalagolago i le alofa ma le agalelei o lou uso matua, o Iesu Keriso, e ala i le mafaufau loloto i tusitusiga paia. E pei o sa Nifae, o le a fetalai atu ia te oe, “Ua ou agaalofa tele ia te outou; ua tumu lou loto i le alofa mutimutivale. … Aua ua ou iloa ua lava lo outou faatuatua ou te faamaloloina ai outou.” (3 Nephi 17:7–8).
O le faamalologa e sili ona amata i lau tatalo ma le naunautai e ole atu i lou Tama o i le Lagi mo se fesoasoani. O le faaaoga o lou saolotoga e mafai ona e maua ai se fesoasoani faalelagi. A e faatagaina lena fesoasoani faalelagi i lou loto, o le a faamaluluina lou loto i le alofa o le Faaola ma motusia ai le taamilosaga o le sauaina lea e mafai ona liua ai le tagata na sauaina e avea ma tagata saua. O faigata, e tusa lava pe mafua i amioga le taupulea na faia ma le loto i ai o isi tagata, e mafai ona avea ma puna e tuputupu ae ai pe a iloiloina lena tulaga mai se vaaiga mamao o mataupu faavae e faavavau (tagai i le MF&F 122:7).
I le avea ai ma se na sauaina, aua le maimauina au taumafaiga e taui ma sui i le na saua ia te oe. Ia e uai atu i lou tiute e fai le mea e te mafai i lou malosi e faasa’o ai lena mea. Ia tuu le taulimaina o le tagata sa saua i a te oe i taitai o alalafaga ma Ekalesia. Po o le a lava mea latou te faia, o le a oo ina faafesagai le tagata tausalaina ma le Faamasino e sili ona atoatoa. I le iuga, o lea faasalaina le tagata saunoa e lei salamo e le Atua amiotonu. O e saua i tagata taumamaina ma taumafai e tauamiotonuina o latou lava olaga amioleaga, e ala i le faasese o isi e mulimuli i o latou ala leaga, o le a faamasinoina. O tagata faapena na lapataiina e le Matai: “Ai se na te faatausuai i se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto” (Mataio 18:6).
Ia e malamalama o lena faamalologa e mafai ona umi se taimi e alu ai. O le faamaloloina e oo mai i laasaga taitasi. A e faavavevaveina pe a faaalia le loto faafetai i le Alii mo tulaga taitasi o le a faaleleia.
Faamagalo
I le taimi faaumiumi o le toe malosi mai se taotoga faigata, e faamoemoeina e le gasegase se faamalologa atoatoa i le onosai, ma lona faalagolago i le tausiga a isi. E le faapea o taimi uma e malamalama ai o ia i le taua o togafitiga ua faamatala mai, ae o lona usiusitai o le a vave maua ai le faamalologa. E faapena foi lou tauivi ina ia faamaloloina ma’ilaila o le saua.O le loto faamagalo, mo se faataitaiga, e mafai ona faigata ona malamalama i ai, ae sili atu ona faigata ona faamagalo atu. Amata i lou le faamasino atu. E te le iloa mea atonu na mafatia ai tagata saua i le avea ma tagata manunua taumamaina. E tatau lava pea ona tatalaina mo i latou le ala i le salamo. Tuu le taulimaina o tagata saua i isi. A o e lagonaina le faaitiitia o ou tiga, o le a faigofie ai ona faamagalo atu.
E le mafai ona e soloiesea mea ua uma ona faia, a e mafai ona e faamagalo atu (tagai i le MF&F 64: 10). O le faamagalo e faamalolo ai manua leaga ma matuia, aua na te faatagaina le alofa o le Atua na te faamamaina lou loto ma le mafaufau le oona o le ita. E faamamaina ai lou loto mai le manao e taui atu ma sui. E maua ai avanoa mo le faamamaina, faamaloloina, ma le toefuataiina mai o le alofa o le Alii.
Na apoapoai mai le Matai, “Alolofa i o outou afili, faamanuia atu ia i latou o e e fetuu mai ia te outou, fai mea lelei ia i latou o e e inoino mai ia te outou, matatalo mo i latou o e latou te faaaoga outou ma le inoino ma sauaina outou” (3 Nifae 12:44; faaopoopo le faamamafa).
O le ita ma le inoino e matautia. E tele le malaia e maua ai. E tolopoina e na uiga le mapusaga ma le faamalologa sa e fia maua. O lou mafaufau pea ma lou misialofa ia te oe lava, e mafai ona liua ai le tagata sa saunoa i ai e avea ma tagata saunoa. Ia tuu atu i le Atua e fai ma faamasino—e le sili atu ona e faia e pei ona faia e Ia.
O le fautua atu e faagalo le saunoa o se tasi ia te oe, e le fesoasoani lena mea. E tatau ona e malamalama i mataupu faavae na e aumaia le faamalologa. O le faamaloloina e mafai ona amata i se epikopo magafagafa po o se peresitene o le siteki po o se faufautua faapolofesa atamai. Afai na gau lou vae, e te le filifili e faaleleia e oe lava ia. O faatautala po o le sauaina matuia, e mafai foi ona manuia mai se fesoasoani faapolofesa. E tele auala e amata ai le faamalologa, ae ia e manatua o se fofo atoa lava e maua mai i le Faaola, le Alii o Iesu Keriso, lo tatou Matai ma le Togiola. Ia faatuatua, faatasi ai ma galuega o le a mafai ai e Lana Togiola atoatoa, faavavau, ma le le iu ona faamalolo lou mafatia mai taunuuga o le faatautala po o le sauaina.
E ui lava ina foliga mai i le taimi nei e te le mafaia, e oo mai le taimi o le faamalologa e mafai ona e maua mai i le Faaola, o le a mafai ai e oe ona faamagalo moni le tagata na faia le faatautala. A oo ina mafai ona e faamagaloina le sauaga, o le a e mapu mai le tiga ma le loto tiga lea e manao ai Satani i lou olaga, e ala lea i le uunaia o oe ina ia e inoino i le tagata na faia le faatautala O le taunuuga, o le a e olioli i se filemu e sili atu. E ui lava o se vaega taua o le faamalologa, afai o le mafaufau i le faamagalo e atili ai ona e tiga, ia faapafala ese le vaega lena seia e maua nisi aafiaga o le mana faamalolo o le Faaola i lou lava olaga.
Lapataiga
Ou te lapataia oe e aua e te auai i togafitiga le tatau e lua na e faatetele ai lou mafatia nai lo le lelei. O ia mea: o le suesue vailiili o mea taitasi sa tutupu ia te oe i le taimi ua tuanai, ae maise lava le talanoaina i se faalapotopotoga o na tulaga: ma le tuuai i le tagata saunoa o faigata uma o lou olaga.
E faapea foi la le toe faaleleia o tulaga ua faaleagaina e le saunoa, e faia na o oulua ma faia faalilolilo ma se taitai perisitua faalagolagoina, ma afai e tatau ai na te fautuaina atu se fautua agavaa. E tatau ona matua talanoaina lelei le tulaga na mafua ai le saunoa, ina ia mafai e oe ona maua fautuaga tatau ma mafai ona puipuia ai le tagata saunoa mai le faateteleina o lona saua. Ia, o le fesoasoani a le Alii, ia e tanumia mea ua tuanai.
Ou te molimau atu ma le lotomaualalo o mea ua ou taʼu atu ia te outou e moni. E faaautu i mataupu faavae ia sa ou vaai o faaaoga e le Alii e tuu atu ai le atoatoa o le olaga ia i latou o e ua mailaila i le saunoa i i ai ma le amioleaga.
Afai e te lagona e na o se filo tuaiti lava o totoe o le faamoemoe, ia e talitonu mai ia te au, e le o se filo. E mafai ona avea lena mea ma se sootaga le motusia ma le Alii, lea e faasaoina ai lou ola. O le a ia faamaloloina pe a e tuuesea lou fefe ae faalagolago ia te Ia e ala i le taumafai e ola i Ana aoaoga.
Ia ole atu nei i le Alii e fesoasoani ia te oe (tagai i le Mamona 9:27; Moronae 7:26, 33). Filifili nei e talanoa i lau epikopo. Aua e te vaai i mea uma ua e oo i ai i le olaga i ni tioata ua nenefu i mailaila o le saunoa. E tele naua mea o le olaga e matagofie. Tatala faamalama o lou loto ma faaulufale atu i ai le alofa o le Faaola. Pe a toe foi mai mafaufauga mataga o aafiaga o le saunoa sa e oo i ai i le taimi ua tuanai, ia e manatua lona alofa ma lona mana faamalolo. O lou faanoanoa o le a liua i le filemu ma le mautinoa. O le a e tapunia se tusi mataga a e susueina ni tusi o le fiafia.